Хуссар Ирыстоны скъолаты ахуырадон процесс ногæй райдайдзæн ацы къуырийы кæронмæ, – хъусын кæнынц РХИ-йы Ахуырады министрады пресс-службæйы.
«15-æм январы ахуырадон процесс райдайдзæн астæуккаг æмæ хистæр кълæсты ахуыргæнинæгтæн, афтæ ма Цхинвалы бирæпрофилон колледжæн, уыцы категориты ахуырдзаутæн, кæцытæ уый размæ карантины тыххæй раконд æрцыдысты ахуыры дистанцион формæмæ. Уыимæ хъахъхъæд цæудзысты æнæмæнгхъæуæг санитарон нормæтæ», – загътой пресс-службæйы.
Уым ма зæрдыл æрлæууын кодтой, зæгъгæ, райдиан скъолаты фондзбонон ахуыры процессмæ (къуырисæрæй – майрæмбонмæ) æрæвнæлдтой ивгъуыд аз 24-æм ноябры, уыимæ сывæллæттæн урокты нымæц къаддæргонд æрцыд.
«Ахæм мадзæлттæ ист æрцыдысты пандемийы тыххæй, цæмæй райдиан скъолайы ахуырдзаутæ къаддæр рæстæг æрвыстаиккой ахуырадон уагдоны. Ныр уыдон ахуыр кæндзысты æрвылбонон режимы, 2020 азы сентябры райдианы сфидаргонд расписанимæ гæсгæ. Уымæй дарддæр ма къуырисæрæй йæ куыст сног кæндзæн фæсурокты ахуыргæнæн къорд дæр».
Пресс-службæйы банысан кодтой, зæгъгæ, астæуккаг скъолаты ахуыры процесс урæд æрцыд коронавирусы инфекцийы ныхмæ архайды фæдыл оперативон штабы уынаффæмæ гæсгæ. Æмбæлон уынаффæйæн йæ архайд урæд цæуы 2021 азы 15-æм январæй. «Ахуыры дистанцион формæ æмбæлон æгъдауæй уагъд кæм нæ цыд, уыцы ахуырадон уагдæтты ахуыргæнджытæ скъолайон программæмæ бахæсдзысты бæрæг корректировкæтæ, цæмæй ахуырдзаутæ баххæст кæ-ной, цы программæ рауагътой, уый», – бамбарын кодтой пресс-службæйы.
Хуссар Ирыстоны æппæт скъолатæ карантинмæ æхгæд æрцыдысты ивгъуыд аз 21 октябры оперативон штабы уынаффæмæ гæсгæ коронавирусон инфекци, грипп æмæ карз респираторон-вирусон инфекци кæй апарахат, уый тыххæй. Фæстæдæр ахуырадон процесс сноггонд æрцыд райдиан кълæсты æмæ хъæууон чысылкомплектон скъолаты.
Comments are closed, but trackbacks and pingbacks are open.