Бӕрӕгбонон концерт

  Бӕрӕгбон арфӕтӕй фидауы, уый у йӕ рӕсугъдгӕнӕг, йӕ мидис. О, фӕлӕ уӕддӕр алы бӕрӕгбон дӕр иууыл тынгдӕр хъӕлдзӕгдзинадӕй фӕхайджын вӕййы, аивады цӕрдхъом тых ӕм куы фӕхӕццӕ вӕййы, уӕд. Афтӕ уыд Республикӕ Хуссар Ирыстоны Хӕдбардзинад банымайыны бон Цхинвалы районы Къостайыхъӕуы дӕр. Районтӕ ӕмӕ Цхинвалæй ӕрбацӕуджытӕ ӕрмӕст дзаджджын фынгтӕ нӕ равӕрдтой, уыдонӕй ӕрбацӕуӕг адӕмы нӕ хынцыдтой, фӕлӕ ма сын сӕ зӕрдӕтӕ рухс кодтой сӕ хъӕздыг ӕмӕ мидисджын аивадӕй дӕр.

Ногарӕзт сӕрдыгон сценӕмӕ рахызтысты, Цхинвалы районы культурӕйы управленийы цы аивадон коллективтӕ ис, уыдонӕй цалдӕр. Ацы управленийы хистӕр Гаглойты Ростиславмӕ ис куысты хорз фӕлтӕрддзинад, арӕхстджынӕй архайы ӕмӕ домы коллективӕй ӕрвылбонон куыст хуыздӕр рацаразын ӕмӕ уымӕ гӕсгӕ кӕддӕриддӕр сӕ аивадӕй барухс кӕнынц сценӕмӕкӕсджыты зӕрдӕтӕ. Афтӕ та уыд ацы бӕрӕгбоны дӕр. Сценӕйыл фыццаг сӕ аивад равдыстой кафджыты ансамбль «Амонд»-ы артисттӕ ӕмӕ иттӕг аив сӕххӕст кодтой ирон дзыллон кафт «Симд». Дӕсны фӕндырдзӕгъдӕг, аив хъӕлӕсы хицау ӕмӕ кафты фӕзилӕнтӕ хорз ӕххӕстгӕнӕг –  ахӕмӕй зонынц сценӕмӕкӕсджытӕ Саппиаты Зӕлинӕйы. Йӕ разамынд ӕмӕ хайадистӕй квартеты уӕнгтӕ Хацырты Земӕ, Гогинова Кристинӕ ӕмӕ Задыты Олеся сӕххӕст кодтой цалдӕр ирон ӕмӕ уырыссаг зарӕджы. Зарӕггӕнджытӕ Хуыгаты Дзамболат, Хацырты Земӕ ӕмӕ Ӕлборты Малхаз ма азарыдысты зарджытӕ «Ӕнӕ дӕу», «Уарди, буц дидинӕг», «О, уыцы дыууӕ сау цӕсты» ӕмӕ ӕндӕртӕ. Кафджыты къорд ма аивадуарз-джыты зӕрдӕтӕ барухс кодтой «Хонгӕ кафт», «Чызджыты кафт», «Абхазаг кафт»-ӕй, Тедеты Вадим та йӕ арӕхстдзинад равдыста «Хъаматимӕ кафт»-ӕй.

Ирон зарды аивады рӕзтӕн ӕппӕт йӕ тых ӕмӕ хъару не вгъау кӕ-ны нӕ республикӕйы адӕмон артист, Хетӕгкаты Къостайы номыл премийы лауреат Дзаттиаты Анисим. Зӕрдӕмӕдзӕугӕ уыдысты, йӕ разамындӕй Дзауы нӕлгоймӕгты хор цы зарджытӕ азарыдысты, уыдон – «Ирӕй-Ирмӕ» ӕмӕ «Зарӕг Ирыстоныл» ӕмӕ балхӕдтой аивадуарзджыты зӕрдӕтӕ. Уый фӕстӕ сценӕйыл сӕ аивадон арæхстдзинад ӕвдыстой Цхинвалы горӕты Культурӕйы хӕдзары коллективтӕ. «Ирон»-ы аивадон къухдариуӕггӕнӕг у Хуыгаты Дианӕ ӕмӕ йӕ разамындӕй йӕ кафджытӕ сӕххӕст кодтой цалдӕр зӕрдӕмӕдзӕугӕ номыры. Уый фӕстӕ адӕмы размӕ рахызт ӕвзонг лæппу Зассеты Максим ӕмӕ йӕ зӕрдӕмӕдзӕугӕ курдиаты тыххӕй балхӕдта аивадуарзджыты зӕрдӕтӕ. Уый тынг хорз радзырдта ӕмдзӕвгӕ, зӕрдӕмӕдзӕугӕ ӕмӕ  дӕсны арӕхстдзинад равдыста, кафт ӕмӕ зарӕджы номыртӕ куы сӕххӕст кодта, уӕддӕр. Йӕ аивадӕй адӕмӕн ӕхцондзинад ӕрхаста дӕсны зарӕггӕнӕг Багаты Шота, сценӕ-мӕкӕсджыты зӕрдӕмӕ тынг фӕцыдысты йӕ сӕххӕстгонд зарджытӕ «Ихджын дӕ, ихджын, суадон» ӕмӕ «Ӕз уарзтон сау цӕстытӕ». Зындгонд ӕххӕстгӕнӕг ӕмӕ рӕсугъд хъӕлӕсы хицау Тасойты   Игорь та азарыд «Чызджыты хуыздӕр» ӕмӕ «Родина моя». Кӕронбӕттӕны бӕрӕгбоны хайадисджытӕн сӕ арӕхстдзинад фенын кодтой Знауыры районы хӕдахуыр артисттӕ. Галуанты Людӕйы фыст ӕмдзӕвгӕ «Мӕ Ирыстон» хорз сӕххӕст кодта Тхелидзе Аннæ, ӕвзонг чызг Кокойты Иринӕ та азарыд зарджытӕ «Райгуырӕн зӕхх», «Родина», уыд ма дзы ӕндӕр номыртӕ дӕр. Иудзырдӕй, бӕрӕгбонон концерт уыд зӕрдӕмӕдзӕугӕ ӕмӕ адæм арфӕ кодтой артисттӕн.

       ХУЫБИАТЫ Никъала