Бæрæгбоны фæдыл уагъдцæуæг цытджын мадзалы фæстæ киноконцертон зал «Чермен»-æй нæ республикæйы къухдариуæгад æмæ уазджытæ сæ фæндаг акодтой Цхинвалы районы Къостайыхъæумæ. Уым бæрæгбоны цытæн Культурæйы министрады къухдариуæгадæй организацигонд æрцыдис этнографион мадзал «Нæ фыдæлты хæзнатæ», зæгъгæ. Бæрæгбонон мадзалы официалонæй хайад райстой Президент Бибылты Анатоли æмæ Цæгат Ирыстон-Аланийы сæргълæууæг Битарты Вячеслав.
Этнографион бæрæгбоны хайад райстой нæ республикæйы æппæт районтæ дæр. Ам нæ республикæйы архайæг куыстуæттæ – Бæгъиаты суаруадзæн завод æмæ сæнуадзæн «Ирон сæн»-ы рауадзгæ продукци хаст æрцыдысты адæмы рæгъмæ. Бæрæгбоны æппæт уазджытæн дæр сæ бон уыдис æмæ саргъ кодтаиккой цы фараст хуызы сæнтæ дзы уыдис, уыдонæн. Сæнтæн аккаг аргъ скодтой дыууæ Ирыстоны къухдариуæггæнджытæ дæр дегустацийы рæстæджы.
Хорз, хъæздыг фысымтæй сæхи æвдыстой этнографион мадзалы нæ республикæйы æппæт районтæ дæр дзы цы къæбицтимæ æрбынат кодтой, уыдоны. Алкæцы фысымтæ дæр ирон æгъдаумæ гæсгæ æртæ уæливых, æртæ фæрск æмæ дзаггарзимæ æмбæлдысты сæ уазджытыл. Уыдоныл радгай азылдысты уазджытæ æмæ-иу сын федтой сæ националон къæбицтæ.
Дзауы районы къæбицы фысымтæ дæр тынг хорз сæхи бацæттæ кодтой бæрæгбонмæ. Уыдон сæ къæбицы фынг афтæ рæсугъд равæрдтой, афтæ бæркадджын сын уыдис æмæ йæм адæм кæсынæй не фсæстысты. Хицæн къуымы та равæрдтой хъæдæрмæгæй конд хæдзарон мигæнæнтæ, æрмдæсны Козайы фырты куыстытæй. Районы сфæлдыстадон къорд дзы æххæст кодтой ирон зарджытæ. Уыдон се ‘ппæт дæр уыдысты ирон национ уæлæдарæсы.
Уазджытæ цы диссаджы хъæздыг, хæрзад æмæ цымыдисон къæбицтæн уыдысты æвдисæн, уыдоныл стыр æхсызгонæй архайдтой æмæ сæ бацæттæ кодтой администрациты кусджытæ. Уый тыххæй Президент Бибылты Ана-толи дæр банысан кодта, зæгъгæ, ахæм традицион къæбицты æмæ хъæлдзæг зæрдæйы равгы руаджы адæймаг хуыздæр банкъары этнографион бæрæгбон. Бæстæйы сæргълæууæг арфæ ракодта фысымтæн 26 августы бæрæгбоны сæраппонд æмæ сын йæ цæст бауарзта алыхатт дæр ахæм хъæздыг æмæ дзадджын фынгтæ сæ хæдзæртты дæр цы æвæрой, Ирыстон цæмæй бæркадджын æмæ фæрнджын уа æмæ сæ зæрдæтæ рухс кæной сæ цардæй.
Этнографион бæрæгбоны ма организацигонд æрцыдис фоторавдыст дæр «Остановись, мгновение, ты родное!», кæцыйы бацæттæ кодтой Адæмон сфæлдыстады республикон центры хъæппæрисæй. Адæм ма стыр цымыдисимæ уыдтой Ленингоры районы сывæллæтты хæдзары хъомылгæнинæгтæ сæхи къухтæй цы алыгъуызон æрмæджытæ æмæ нывтæ сарæзтой, уыдонмæ дæр.
ЦХУЫРБАТЫ Ларисæ
Comments are closed, but trackbacks and pingbacks are open.