Хӕдархайгӕ аивадон къордты æркаст-конкурс

Цхинвалы районы Культурӕйы управленийы сӕргълӕууӕг Гаглойты Ростислав хъӕууон хӕдархайгӕ аивадон коллективтӕн ауагъта ӕртыккаг ӕркаст-конкурс. Уым хайад райстой Дменис, Тъбет, Къостайыхъӕу ӕмӕ Зары хъӕууон хæдархайгæ къордтӕ, сæ арæхстдзинад равдыстой хореографи ӕмӕ вокалӕй. Сценӕмӕ фыццаг рахызт Дменисы хъӕууон Культурӕйы хӕдзары хӕдархайгӕ аивадон къорд (кафджыты ахуыргӕнӕг Козаты Р.). Райдианы Козаты Аланӕ аив бакаст Хетӕгкаты Къостайы ӕмдзӕвгӕ «Ӕнӕ хай», уый фӕстӕ чызджыты къорд зӕрдӕмӕдзӕугӕ сӕххӕст кодтой ирон уӕздан кафт «Хонгӕ» ӕмӕ «Чызджыты кафт». Зарджытӕ: «Ма мыл сис, бӕрзонд Хуыцау, дӕ къух» ӕмӕ «Мӕ Ирыстон» хорз азарыдысты чызджытӕ Икъаты Анусийы разамындӕй. Лӕппуты кафджыты къорд та тынг хорз сӕххӕст кодтой «Дыууӕ хӕлары кафт» ӕмӕ «Хӕх-хон кафт». Уый фӕстӕ сӕ аивадон арӕхстдзинад фенын кодтой Тъбеты хъӕууон Культурӕйы хӕдзары архайджытӕ (сӕ аивадон разамонӕг  Мӕлдзыгаты Ф.) Хетӕгкаты Къостайы ӕмдзӕвгӕ «Мӕгуыры зӕрдӕ» аив бакаст Багаты Аринӕ, тынг хорз азарыд Джусойты Кристинӕ зарджытӕ «Рудзынг» ӕмӕ «Тархъӕды бӕлас» ӕмӕ йын сценӕмӕкӕсджытӕ кодтой зӕрдиаг къухӕмдзӕгъд. Кафджыты къорд та аивадуарзджыты размӕ рахаста «Ӕнӕнкъуысгӕ кафт», «Хонгӕ», «Зилгӕ», «Абхазаг кафт» ӕмӕ «Хӕх-хон кафт».

Аив ӕмӕ зӕрдӕмӕдзӕугӕ уыдысты, Къостайыхъӕуы аивадон архайджытӕ цы номыртӕ рахастой сценӕмӕкӕсджыты размӕ, уыдон. Уый та, сӕйраджыдӕр, уыд сӕ аивадон къухдариуӕггӕнӕг Лолоты Дуняйы ӕвӕллайгӕ архайды руаджы. Сӕ репертуары уыдысты ирон дзыллон кафт «Симд», «Чызджыты кафт», «Ӕгъдауы кафт», «Зилгӕ», «Кӕсгон кафт» ӕмӕ ӕндӕртӕ, сӕххӕст ма кодтой цалдӕр зарӕджы дӕр. Кӕронбӕттӕны сценӕмӕ рахызт Зары хъӕуы аивадон коллектив ӕмӕ акафыдысты «Чызджыты кафт» ӕмӕ «Хонгӕ», сӕххӕст кодтой зарӕг «Ирон ӕвзаг» ӕмӕ радзырдтой ӕмдзӕвгӕ дӕр.

Жюрийы уӕнгтӕ ӕркасты ӕппӕт коллективты дӕр схор-зӕхджын кодтой Культурӕйы управленийы грамотӕтӕй. Хореографийæ ӕртыккаг бынат бацахста Зар, дыккагмӕ рахызт Тъбет ӕмӕ фыццаг бынат та адих кодтой Дменис ӕмӕ Къостайыхъӕуы хӕдархайгӕ аивадон къордтӕ. Вокалӕй ӕртыккаг бынат фӕци Дменисы, дыккаг – Къостайыхъӕу ӕмӕ фыццаг бынат та бацахста Тъбеты аивадон коллектив. Алкӕмӕн дӕр радтой зæрдылдарæн лӕвӕрттӕ. Жюрийы фӕндонмӕ гӕсгӕ ма сценӕйыл сӕ аивадон арӕхстдзинады тых-хӕй призтӕй хорзӕхджын ӕрцыдысты хицӕн архайджытӕ – Дудайты Эльбрус, Кокойты Иван, Амандӕ, Багаты Артур, Гаглойты Каринӕ, Джусойты Георги, Хуыбиаты Аннӕ, Багаты Сӕрмӕт, Тыджыты Аланӕ, Хуыбиаты Миленӕ ӕмӕ ӕндӕртӕ.

                                                                                    ХУЫБИАТЫ Никъала