Милицийы ӕхсӕнадон фӕтк хъахъхъхъӕныны управленийы кусджытӕ горӕт Цхинвалы фадыгон инспектортимӕ иумӕ уадзынц профилактикон мадзӕлттӕ – бӕрӕг кӕнынц ӕмбӕстӕгты, кӕцытӕм ис регистрацигонд ӕхсӕнгӕрзтӕ кӕнӕ та хорзӕхджын ӕрцыдысты ӕхсӕнгарзӕй. Инспектортӕ уӕлдай хъусдард здахынц ӕхсӕнгӕрзты дарыны уавӕртӕм – кӕм ӕвӕрд сты, дӕгъӕлӕй ӕхгӕны сейф ӕви нӕ. Закъонмӕ гӕсгӕ сейфы дӕгъӕлтӕ ӕрмӕстдӕр хъуамӕ уой ӕхсӕнгарзы хицаумӕ. Басгӕрстой ма сын сӕ бары гӕххӕттытӕ дӕр. Фадыгон инспектор Остъаты Олег куыд зӕгъы, афтӕмӕй ныридӕгӕн басгӕрстой 170 адӕймаджы ӕмӕ дарддӕр дӕр кæндзысты ацы куыст.
«Мах ахӕм мадзӕлттӕ уадзӕм рæстæгæй-рæстæгмæ, ома, бӕрӕг кӕнӕм ӕхсӕнгӕрзты хицӕутты, цахӕм уавӕрты дарынц се ʻхсӕнгӕрзтӕ ӕмӕ нӕмгуытӕ. Сбӕлвырд дзы кӕнӕм ахӕмты, кӕцытӕн сӕ бары гӕххӕттыты ӕмгъуыдтӕ ацыдысты ӕмӕ сын сӕ сног кӕнын кӕ-нӕм. Кӕннод ӕхсӕнгарз ист хъуамӕ ӕрцӕуа. Сӕмбӕлӕм ма ахӕм фӕткхалӕн цаутыл дӕр, кӕцыты фӕстиуӕгӕн мах бахъӕуы ӕхсӕнгарз йӕ хицауӕй байсын ӕмӕ йын йӕ лицензи сӕхгӕнын. Стӕм хатт ма сӕмбӕлӕм ахӕм цаутимӕ дӕр ӕмӕ ӕхсӕнгарзы хицау ацӕуы цӕрынмӕ ӕндӕр ранмӕ ӕмӕ йӕ фадыгон инспекторӕн нӕ фехъусын кӕны. Ахæмтимӕ та бакӕнӕм профилактикон куыст», – зӕгъы Остъаты Олег.
Ахӕм профилактикон мадзӕлттӕ уадзынц районты дӕр ӕмӕ нысан у, цӕмӕй ӕхсӕнгарзимӕ баст фыдбылызтӕ ма æруагъдæуа.
ДЖИОТЫ Алыксандр
