Куыд æрвылаз дæр, афтæ та ацы аз дæр нæ республикæйы уагъд цæуынц мысæн æмæ фыдохы мадзæлттæ, цыран нæ дзыллæйад, радон хатт æрымысынц августы хæсты цаутæ, хæст кæй цард ахаста, уыдоны рухс нæмттæ. Иу ахæм мысæн мадзал уагъд æрцыд РХИ-йы Информаци æмæ мыхуыры комитеты пресс-центры, цыранмæ хуынд æрцыдысты нæ республикæйы соматикон рынчындоны дохтыртæ, хирургтæ, медицинон хотæ, санитаркæтæ, афтæ ма нæ республикæйы дзулфыцæн комбинаты сæргълæууæг Цхуырбаты Вадим. Уыдон фембæлды рæстæджы æрымысыдысты, 2008 азы августы мæйы хæстон архайдтыты райдианæй цы зын куыст кодтой, æппæт уыдæттæ. Æппæт нæ республикæйы соматикон рынчындоны медицинон персонал августы цауты рæстæджы равдыстой стыр фæразондзинад, хъæбатырдзинад æмæ егъау профессионализм, сæ тыхтыл на ауæрдгæйæ, æнæрынцойæ æххуыс кодтой цæфтæн. Уыдонæй алчи дæр, зын уавæртæм нæ кæсгæйæ, æппæт дæр арæзтой, цæмæй рынчынтæ, цæфтæ райсой æмбæлон æххуыс. Операцитæ кодтой зын уавæрты, фæлæ сæ къухтæ нæ ауагътой æмæ-иу кæрæдзи фарсмæ æрбалæууыдысты, цæмæй сæ хæс æххæст кæной цæсгомджынæй. Фембæлды рæстæджы нæ республикæйы сæйраг онколог Григори Кулиджанов куыд радзырдта, афтæмæй нæ республикон соматикон рынчындоны ныккæнды уыцы бонты операцитæ арæзт æрцыд 300 бæрц адæймагæн. Уый ма куыд загъта, афтæмæй-иу бирæ цæф æмбæстæгты рынчындонмæ адæм ластой сæхи транспортыл, фæлæ иууыл уæззаудæр цæф æмбæстæгты, кæй зæгъын æй хъæуы, ластой Тагъд æххуысы машинæтыл.Сæ цардыл нæ ауæрдгæйæ, Тагъд æххуысы станцы кусджытæ дæр кодтой стыр ахсджиаг куыст. Григори Кулиджанов куыд фехъусын кодта, афтæмæй 8-æм августы, иннæ бонтæм абаргæйæ, рынчындонмæ фылдæр цæф æмбæстæгтæ ласт цыдысты, уымæн æмæ иннæ бонты фадат нæ уыд, цæмæй цæфты æрбаласой рынчындонмæ. «Мах куыстам æхсæвæй-бонæй, улæфт нын нæ уыд, нæ медицинон персонал афтæ тынг фæллад уыдысты, æмæ-иу цæугæ-цæуын дæр афынæй сты. Уæлдай стыр бузныг мæ фæнды зæгъын, уыцы уæззау бонты чи куыста, æппæт уы-донæн, уæлдай зын уыд сылгоймæгтæн, уымæн æмæ уыдон куыстой, æппæт зындзинæдтæм нæ кæсгæйæ, æмæ сæ куыст æххæст кодтой цæсгомджынæй. Уыцы бонты стыр бæрндзинад æвæрд æрцыд нæ медицинæйы патриарх Зæгъойты Никъалайыл. Стыр куыст ма бакодтой уæд хæдзарадон блокы кусджытæ дæр, кæцытæ ифтонг кодтой рухс æмæ дизелон генераторы æнæкъуылымпы куыст», – радзырдта Григори Кулиджанов. Уый ма радзырдта ахæм цымыдисон цау дæр, зæгъгæ, операци кæнгæйæ нæ операцион столы бын бамбæхст стыр сау куыдз. Сырдтам æй операцион блокæй, фæлæ нын нæ ракуымдта, æмæ уым баззад дыууæ операцийы рæстæджы. «Диссаг уый уыд, æмæ горæтмæ уæрæсейаг æфсæддонтæ куы æрбахызтысты, уæд куыдз дæр фесæфт. Æвæццæгæн, исты нысан уыд, уымæн дæр», – загъта Григорий Кулиджанов.
– Нæ медицинон кусджытæ 2008-æм азы августы бонты бакодтой иттæг стыр куыст, – дзырдта йæ мысинæгты нæ республикæйы рынчындоны хирургион хайады гæс Остъаты Александр. «Махæн нæ дохтыртæ, уыцы нымæцы Зæгъойты Никъала, кæцы уыцы бонты къухдариуæг кодта нæ куыстæн æп-пæт нæ рынчындоны кусджытæ бакодтой стыр куыст, зын уавæртæм нæ кæсгæйæ. Фæнды мæ æрымысын, не ‘хсæн чи на лис, фæлæ уыцы бонты стыр лæггад чи бакодта, нæ уыцы коллегæты: Бестауты Айвар, Цхуырбаты Сергей, Тыбылты Таймураз æмæ Чилæхсаты Людмилæ», – банысан кодта Остъаты Александр. Йæ ныхæстæм гæсгæ æппæт медицинон кусджытæ, дохтырæй суанг санитаркæйы онг лæвæрдтой туг, цæмæй баххуыс кодтаиккой хæстон архайдтыты рæстæджы фæцæфуæвджытæн. «Ис ахæм рагон латинаг æмбисонд «Амонд æхсардзинады нæй, фæлæ хъабатырдзинады». Æмæ махæн нæ адæмæй иууыл уæззаудæр æмæ трагикондæр бонты ам чи уыд, знагимæ цæсгомæй цæсгоммæ чи сæмбæлд, уæззау хæстон уавæрты чи куыста, уыдон равдыстой егъау хъæбатырдзинад æмæ æнгомдзинад», – банысан кодта Остъайы фырт.
Нæ республикæйы дзулфыцæн комбинаты къухдариуæггæнæг Цхуырбаты Вадим йæ мысинæгты мысгæйæ, банысан кодта, зæгъгæ, 2008-æм азы августы хæстон архайтыты рæстæджы, комбинат кæй куыста, уый уыд нæ адæмæн моралон æххуыс дæр. «2008-æм азы августы хæстон архайдтыты рæстæджы, кæй зæгъын æй хъæуы, æххормагæй ничи амардаид, фæлæ нæ коллектив аскъуыддзаг кодта, зæгъгæ, цыфæнды уæззау уавæрты дæр куыст не ‘руромдзыстæм. Уый уыд, куыд моралон æххуыс не ‘мбæстæгтæн, афтæ. Тынг æхстытæм нæ кæсгæйæ-иу нæ æмбæстæгтæ куыддæрты æрбацыдысты нæ комбинатмæ æмæ-иу хъарм дзул ахастой, æмæ уый та у царды нысан. Стыр хъайтардзинад равдыстой нæ рынчындоны æппæт коллектив, нæ фæсивæды минæвæрттæ, кæцытæ сæ æвзонг кармæ нæ кæсгæйæ, райстой сæ къухмæ хæцæнгарз æмæ слæууыдысты Фыдыбæстæ знагæй хъахъхъæнджыты рæнхъыты. Хъыгагæн, комбинаты кусджытæй дыууæйæ – Икъоты Александр æмæ Пухаты Эдуард фæмард сты, адæмæн кæрдзын куы ластой, уæд æхстыты бын. Уыцы уæззау бонты адæм тасдзинад дæр нал æнкъардтой», – банысан кодта Цхуырбаты Вадим. Уый ма йæ æрымысыд, нæ республикæйы рынчындоны кусæг Хæныкъаты Тамарæ æхстытæм нæ кæсгæйæ, йæ хæдзары уынджы медицинон æххуыс кæй кодта цæфтæн. Уымæ-иу æвзонг цæф лæппутæ æрбалыгъдысты туг калгæйæ æмæ-иу сын бакодта егъау медицинон æххуыс. Æппæт уыдæттæ нымад цæуынц сгуыхтдзинадыл.
Цхуырбаты Вадим ма æрымысыд уæрæсейаг фидауынгæнджыты стыр патриотизм. Хæстон цауты рæстæджы не ‘мбæстæгтæ равдыстой стыр æнгомдзинад, хъайтардзинад бирæтæ дзы сæ царды аргъæй балхæдтой махæн сабырад.
ТАНДЕЛАТЫ Виленæ
Comments are closed, but trackbacks and pingbacks are open.