Фонд “Подари крылья”-йы хъæппæрисæй Цхинвалы конд æрцыд коррекцион класс. Йæ разамонӕг Цхуырбаты Татьяна радзырдта, пандеми куыд бандӕвта коррекцион классы ахуырыл, уый тыххӕй.
«Карантин ӕрурӕдта сывӕллӕттимӕ куыст коррекцион къласы», – загъта фонды разамонӕг Цхуырбаты Татьянæ. Сывæллæттимæ кусы квалификациджын коррекцион психолог Къусраты Ингæ. «Алы сывæллонмæ дæр хъæуы индивидуалон ахаст. Аутизмæй рынчын сывæллæттæй алкæмæндæр хъæуы сæрмагонд программæ. Азæй-азмæ аутизмæй рынчын сывæллæтты нымæц фылдæр кæны. Хуссар Ирыстоны дæр ис ахæм сабитæ. Хъæуы сын фадат дæттын хиуыл баууæндынæн. Фæнды мæ ныййарджытæн зæгъын, цæмæй уыдон дæр сæ сывæллæттимæ фылдæр кусой», – зæгъы психолог.
Коррекцион кълас бакодтой Цхинвалы ныййарджыты куырдиатӕй. Цхуырбаты Татьянæ йæ зæрдæмæ æввахс айста фæкæсинаг сывæллæтты хъысмæт æмæ уыцы нысанæн сарæзта банысангонд фонд дæр. Хæрзаудæн фонды директор куыд зæгъы, афтæмæй ныййарджытӕй фондмӕ цыд бирӕ куырдиӕттӕ йæ бакӕныны тыххæй. Сывæллæттæн сæ фылдæрæн ис аутизмимæ пробле-мæтæ. Къласы сывӕллӕттимӕ кусынц хъазты формӕйы, уадзынц къордон ӕмӕ сӕрмагонд уроктӕ, психолог та сын ӕххуыс кӕны ӕхсӕнады цардмӕ сæ ӕрбаиу кӕнынæн.
«Сывӕллӕттӕн ахуыртӕ куы ӕруромынц, уӕд уый тынг ӕвзӕр у, уымӕн ӕмӕ уыдон ферох кӕнынц сӕ зонындзинӕдтӕ. Ахæм сывæллæттæм хъæуы уæлдай хъусдард здахын», – загъта Цхуырбаты Татьянæ.
Афтӕ ма Цхуырбаты чызг йæ ныхасмæ бафтыдта, зӕгъгӕ, коррекцион къласы дуӕрттӕ бакӕндзысты, рес-публикӕйы ахуырадон уагдӕттӕ куы скусой, уӕд.
Хуссар Ирыстоны 24 ноябрӕй ахуыр райдыдтой кӕстӕр кълӕстæ, афтӕ ма йӕ дуӕрттӕ бакодта скъолайы агъоммӕ къорд ӕмӕ Цхинвалы скъола-интернаты коррекцион класс дæр.
Хӕрзаудӕн фонд “Подари крылья” кусы Хуссар Ирыстоны 2017 азӕй фӕстӕмӕ. Фонд ӕмбырд кӕны фӕрӕзтӕ уӕззау рынчын сывӕллӕтты ӕххуысӕн, организаци кӕны хӕрзаудӕн культурон мадзӕлттӕ, фестивальтӕ, равдыстытӕ ӕмӕ армукъатӕ.
Адæм кæрæдзийы фæрцы цæрынц. Кæрæдзийыл аудын, кæрæдзийæн æххуыс кæнын, кæрæдзийы циныл цин кæнын, кæрæдзийы рисыл риссын ирон лæгæн йæ туджы ис. Уымæн дзырдтой фыдæлтæ: “Хæрзиуæг – удыбæстæ”, “Хорз ракæнæг зæдты ‘мбал у”.
Дриаты Лейла
Comments are closed, but trackbacks and pingbacks are open.