Хуссар Ирыстоны Президент Бибылты Анатоли Республикон бирæпрофилон медицинон центрæн балæвар кодта коронавирус сбæрæг кæныны тыххæй 1500 экспресс-тесты.
«Медцентрæн баххуыс чындæуыд хæрзаудæр фонд «Иууон Алани»-йы фонды фæрæзты хыгъдæй, кæцыйы бындурæвæрæг у Бибылты Анатоли. Республикæйы цыппар районæн дæр æрвыст æрцыд фæйнæ 100 экспресс-тесты», – фехъусын кодта РХИ-йы Æнæниздзинад хъахъхъæныны пресс-службæ.
Бирæпрофилон медицинон центры директоры хæстæ æххæстгæнæг Джиоты Витали куыд банысан кодта, афтæмæй экспресс-тесттæ тынг фæцыбыр кæнынц, коронавирусы инфекци сбæрæг кæныны тыххæй пациентыл цы рæстæг хардз цæуы, уый.
«Пациентæн кæд коронавирусы инфекци сбæрæг, уæд æрвыст цæуы инфекцион рынчындонмæ, куы нæ йын сбæрæг уа, уæд та æрвыст цæуы, кæнæ республикон рынчындонмæ, кæнæ та йæ филиалтæй искæцымæ. Пациенты температурæ бæрзонд куы вæййы, уæд ын æвæстиатæй сбæрæг кæнын бахъæуы йæ диагноз. Уый оперативонæй сбæрæг кæнынæн та æххуыс кæнынц экспресс-тесттæ», – банысан кодта Джиоты Витали æмæ бузныджы ныхæстæ загъта бæстæйы сæргълæууæг Бибылты Анатолийæн, йæ ахадгæ æххуысы тыххæй.
Comments are closed, but trackbacks and pingbacks are open.