Сæйраг у цæрджыты æнæниздзинад

Фембæлд æнæниздзинад хъахъхъæныны фадыджы минæвæрттимæ

Президент Бибылты Анатоли фембæлд æнæниздзинад хъахъхъæныны фадыджы минæвæрттимæ. Фембæлды рæстæджы уынаффæ цыд цæрджытæн  фыццаг медико-санитарон æххуысы фæдыл хæстыл æмæ ацы фадыджы раз цы проблемæтæ лæууы, уыдоныл.

Фембæлды хайад райстой Æнæниздзинад хъахъхъæнын æмæ социалон рæзты министр Тотчиты  Георги, Республикон бирæпрофилон медицинон центры директор Кокойты Маирбег, Цхинвалы горæтон поликлиникæйы сæйраг дохтыр Санахъоты Тамарæ, фадыгон дохтыртæ, республикæйы районты сæргълæуджытæ.

Президент катайдзинад равдыста, квалификацион медицинон æххуыс райсыны тыххæй рынчынтæ республикæйæн æддæмæ  арæх кæй ацæуынц, уый тыххæй.

«Дохтырты куыст мах хъуамæ схизын кæнæм æмбæлон æмвæзадмæ. Мæн фæнды, цæмæй адæм баууæндой нæ дохтыртыл, уый та æххæстбæрцæй баст у сымахыл, уæ профессионалон ахастыл», – загъта Бибылты Анатоли.

Уый ма банысан кодта Хуссар Ирыстоны цæрджыты æнæмæт ахаст се ‘нæниздзинадмæ æмæ сæм æрсидт, цæмæй лæмбынæгдæр сæ хъус дарой медицинон лæггæдты фыццаг службæты æмвæзадыл низæй рагфæдзæхстмæ.

Райдиан медико-санитарон службæйы æнæштатон специалист Цъæритты Инна радзырдта республикæйы районты фельдшерон-акушерон пунктты куысты тыххæй.

«Райдиан медико-санитарон службæ у сæйраг цæг. Республикæйы  районты кусы 49 фельдшерон-акушерон пункты. Ахсджиаг у сæ техникон уавæр, уыдон сты районты дæлбар, медицинон æххуыс бакæныныл та контроль кæны Æнæниздзинад хъахъ-хъæнын æмæ социалон рæзты министрад», – загъта уый.

Цъæритты Инна фельдшерон-акушерон пункттимæ баст проблемæты кой дæр ракодта. Уый сæрмагондæй радзырдта, уыдонæй иуæй-иутæн проблемæтæ кæй ис коммуникацитимæ æмæ сæм дон кæй нæй, уый тыххæй.

Йæ ныхæстæм гæсгæ, ныртæккæ цæуы управленийы централизаци, бæлвырддæрæй та – фельдшерон-акушерон пункттæй райдайгæйæ, медицинон организациты цæуынц Æнæниздзинад хъахъхъæнын æмæ социалон рæзты министрады контролы бынмæ.

 Уый тыххæй Дзауы районы администрацийы сæргълæууæг Джиоты Андрейæн  йæхи хъуыды ис. Йæ ныхæстæм гæсгæ,  районты сæргълæуджыты æххæстбартæн фæлæмæгъдæргæнæн нæй фельдшерон-акушерон пунктты архайдыл контроль кæныны хъуыддаджы, уыцы нымæцы кадрон политикæйы хъуыддаджы дæр.

Джиоты Андрей фæндон бахаста, цæмæй Æнæниздзинад хъахъхъæнын æмæ социалон рæзты министрад йæ архайдыл уынаффæ кæна районты сæргълæуджытимæ.

Президенты бацымыдис кодта фельдшерон-акушерон пунктты куыстыл Æнæниз-дзинад хъахъхъæнын æмæ социалон рæзты министрады æндæвдадмæ.

Тотчиты Георги куыд бамбарын кодта, афтæмæй «ведомствойæн ис потенциал, ис ын ресурс æмæ, уыцы здæхтытæ баиу кæнгæйæ, райсæн ис, æмбæстæгтæ цæмæ æнхъæлмæ кæсынц, ахæм фæстиуæг».

Дзырд ма цыд Цхинвалы горæтон æмæ Цхинвалы районон поликлиникæты Республикон бирæпрофилон медицинон центрмæ раконд кæй æрцыдысты, æмæ уыцы хъуыддаг куыд бандæвта цæрджытæн медицинон лæггæдтæ бакæныны хъуыддагыл.

Цхинвалы горæтон поликлиникæйы сæйраг дохтыр Санахъоты Тамарæ æрхаста, 2018 æмæ 2019 азты дыууæ поликлиникæ цы æмбæстæгты райстой, уыцы статистикæ. Уый банысан кодта, зæгъгæ сæ поликлиникæ Республикон бирæпрофилон медицинон центрмæ куы рацыд, уæдæй фæстæмæ сæм бирæ фылдæр æмбæстæгтæ райстой.

«Техникон ифтонгад бæрæг фæхуыздæр, фæзынд нын ног фадæттæ дæр. Ивгъуыд азимæ абаргæйæ, фыццаг квартал цы æмбæстæгты райстам, уыдон 11 минæй схызтысты 20 мины онг. Пациенттæн æнцонвадат у иу бынатмæ æрбацæуын æмæ уым алыгъуызон медицинон лæггæдтæ райсын. Ныртæккæ цæуы диспансеризаци. Махæн планы ис цæрджыты 80 процентæн диспансеризаци ауадзын», – банысан кодта Санахъоты Тамарæ.

Йæ рады Тотчиты Георги куыд загъта, афтæмæй  горæтон поликлиникæ цы зæронд бæстыхайы уыд, уый дзуапп нæ лæвæрдта нырыккон домæнтæн, нæ дзы уыд сæвæрæн  бæрзондтехнологион медицинон иф-тонггæрзтæ, сæрмагондæй та кабинетты нæ уыд рентгены руаджы рынчынты басгарын, медицинон персоналæн зиан кæй хаста, уый аххосæй.

Фадыгон дохтырты куысты эффективондзинады тыххæй бæстæйы сæргълæууæджы фарстæн дзуапп дæтгæйæ, Санахъоты Тамарæ банысан кодта, зæгъгæ, къахдзæфтæ арæзт цæуы, сæ куысты цы иуæй-иу цухдзинæдтæ ис, уыдон аиуварс кæныны тыххæй.

«Махæн горæт Цхинвалы ис 16 фадыджы. Иу фадыгмæ хауы  1200 – 1700 цæрæджы бæрц. Фадыгон дохтыры рæстæг дих цæуы рынчынты райсын æмæ фадыгыл азилыныл», – фехъусын кодта горæтон поликлиникæйы сæйраг дохтыр.

Бибылты Анатоли æрсидт фадыгон дохтыртæм, цæмæй лæмбынæгдæр сæ хъус дарой пациентты проблемæтæм, цæмæй низтæ сæ райдианы иуварс цæуой æмæ фæхуыздæр уа медицинон лæггæдты гъæд.

«Сымахыл баст у не ‘мбæстæгты æнæниздзинад, уæ куыст гæнæн ис бандава арæх рынчындонмæ сæ цыдыл. Кæд уæ Президенты æххуыс хъæуа ацы хæстлæвæрд аскъуыддзаг кæныны тыххæй, уæд уæ фидарæй бауырнæд, кæй райсдзыстут уыцы æххуыс. Республикæйы цæрджыты æнæниздзинад у приоритетон», – банысан кодта Президент.

Фембæлды кæрон паддзахады сæргълæууæг радта хæслæвæрд, цæмæй 15 маймæ скуса централизацигонд клинико-диагностикон лаборатори, кæцы раивдзæн, раздæр цы зæронд ифтонггæрзтæй пайда чындæуыд, уыдоны.

Уый Знауыры администрацийы сæргълæууæгæн бахæс кодта, цæмæй бакуса ацы аз Хъорнисы хъæуы фельдшерон-акушерон пункт саразыны фарстыл, Æнæниздзинад хъахъхъæнын æмæ социалон рæзты министрадæн та бахæс кодта ординатурæйы ахуыр адарддæр кæныны æмæ хъæуæг специалистты квалификаци фæбæрзонддæр кæныны тыххæй лимиттæ рахицæн кæныны здæхты бакусын.

РХИ-йы Президенты æмæ Хицауады пресс-службæ