Ульяновскаг артисттæ барухс кодтой зæрдæтæ
18-æм сентябры Республикæйы боны цытæн Ульяновскы областы кафт æмæ зарды паддзахадон ансамбль «Волга»-йæн паддзахадон драмон театры уыд концерт. Хуссар Ирыстонмæ сæ æрхуыдтой нæ республикæйы Культурæйы министрадæй.
Ансамблы коллектив концерты сæххæст кодта сæ репертуары иууыл аивдæр музыкалон номыртæ. Уыдоны ирдæй зыны Ульяновскы областы адæмты традицитæ æмæ культурæйы хицæндзинæдтæ. Сæ арæхстдзинад зындис куыд сæ кафты, афтæ сæ зарды. Цымыдисон æмæ аив уыдис сæ уæлæдарæс.
Бæрæгбонон концерты сæрмагондæй хайад райстой нæ республикæйы Культурæйы министр Зæгъойты Рада, Ульяновскы областы аивад æмæ культурон политикæйы министр Евгения Сидорова, афтæ ма Хуссар Ирыстоны Уæрæсейы минæварады минæвæрттæ æмæ бынæттон цæрджытæ.
Уазæг коллективæн концерты райдианы арфæ ракодта Зæгъойты Рада æмæ банысан кодта дыууæ бæстæйы хæларадон ахастыты нысаниуæг. «Ивгъуыд фæззæджы махмæ гастролон балцы фæуазæг Ульяновскы æрыгон сценæмæкæсæджы театр æмæ уæдæй абонмæ не ‘хсæн райтынг сты хæларадон ахастытæ. Ацы сæрд та нæ суазæг кодтой уыдон. Хуссар Ирыстоны культурон бонтæ æнтыстджынæй ацыдысты Ульяновскы. Уырыссаг сценæмæкæсджытæ стыр аргъ скодтой ирон культурæ æмæ аивадæн, афтæ ма тынг сæ зæрдæмæ фæцыдис нæ ансамбль «Симд»-ы артистты арæхстдзинад дæр. Уымæ гæсгæ мах ныр кæрæдзийыл æмбæлæм хæларæй æмæ цины æнкъарæнтимæ», – банысан кодта министр.
Евгения Сидорова та сценæмæкæсджыты зæрдыл æрлæууын кодта, зæгъгæ, Ульяновскы область 2009 азæй фæстæмæ æмгуыстад кæны Хуссар Ирыстонимæ æмæ Республикæйы боны цытæн арфæ ракодта Хуссар Ирыстоны æмбæстæгтæн. «Культурæтæ адæмы æнгомгæнæг кæй сты, уый æцæг у æмæ ныры дуджы та уый у æнæмæнгхъæуæг. Абон цæттæ у Ульяновскы област æмæ Хуссар Ирыстоны хсæн æмгуыстады сразыдзинад. Ууыл сразы ис Уæрæсейы Федерацийы Хицауады сæрдар Михаил Мишустин æмæ тагъд рæстæджы йыл цытджын æгъдауæй бафысдзыстæм нæ къухтæ, – загъта Евгения Сидорова. Уый фæстæ бакаст Ульяновскы областы губернатор Алексей Русскихы арфæйы фыстæг Республикæ Хуссар Ирыстоны Президент Гаглойты Алан æмæ нæ бæстæйы цæрæг адæмы номыл.
Президент Гаглойты Алан ансамбль «Волга»-йы концерты фæстæ дыккаг бон йæхимæ райста Ульяновскы областы аивад æмæ культурон политикæйы министр Евгения Сидоровайы. Фембæлды ма хайад райста нæ республикæйы Культурæйы министр Зæгъойты Рада дæр.
Бæстæйы сæргълæууæг, арфæ ракодта Евгения Сидоровайæн Хуссар Ирыстонмæ кæй фæуазæг ис, уый сæраппонд æмæ банысан кодта, Хуссар Ирыстон æмæ Ульяновскы областы æхсæн культурон æмгуыстад активонæй кæй рæзы æмæ кæй фидар кæны, уый:
«Мах, ирон адæм, кæддæриддæр аргъ кæнын зонæм хæларадон ахастытæн. Рагæй фæстæмæ аргъ кæнæм, нæ фыдæлтæ Уæрæсейы Федераци æмæ хицæн регионтимæ цы хæларадон ахастытæ райтынг кодтой, уыдонæн. Тынг æхсызгон нын у, уæ культурæимæ æввахсдæр зонгæ кæныны хъуыддаг. Стыр бузныг уын зæгъын, абон не стыр циныл сымах дæр кæй цин кæнут æмæ нын нæ бæрæгбон уæ архайдæй кæй срæсугъд кодтат, уый тыххæй. Фидарæй мæ уырны, нырæй фæстæмæ дæр нæ бæстæты хсæн хæларадон ахастытæ фидарæй-фидардæр кæй кæндзысты æмæ нæ адæмтæ кæрæдзийæн кæй аргъ кæндзысты, уый», – банысан кодта Гаглойты Алан.
Йæ рады Евгения Сидорова дæр арфæ ракодта, тынг хорз сæ кæй суазæг кодтой, уый сæраппонд æмæ Гаглойты Аланмæ радта Ульяновскы областы губернатор Алексей Русскихы арфæйы фыстæг Республикæйы боны цытæн.
Президент Гаглойты Алан Ульяновскы областы аивад æмæ культурон политикæйы министр Евгения Сидоровайы схорзæхджын кодта Хæлардзинады орденæй.
Нæ уацх.
