Скъолайон каникултæ Хуссар Ирыстоны райдыдтой рагацау – 21 октябрæй æмæ адаргъ уыдзысты 15 январмæ. Карантины уыдзысты, канд горæты скъолатæ нæ, фæлæ ма районты ахуырадон уагдæттæ дæр.
Ныртæккæ куыст цæуы ахуырадон процессы цыды фарстыл. Ис алыхуызон платформæтæ, дистанцион ахуыры фæрæзтæ. Хъуыддагмæ цæстдард æххæст кæндзысты скъолаты разамонджытæ æмæ ахуырады министрад.
Санитарон эпидемиологон службæ ахуырадон азы райдианы æрбарвыста сæрмагонд гæххæтт алы ахуыры уагдонмæ дæр, цыран дзырд цæуы æнæмæнгхъæуæг санитарон домæнтыл. Æрвылбондæр сæрмангондæй хъуамæ æфснайд цæуой хатæнтæ, ахуыргæнджытæ пайда кæной гигиенæйы æрмæджытæй. Кæд ахуыргæнджытæн зын у маскæты уроктæ уадзын, уæддæр сæ хъуамæ пайда кæной. Зындæр у райдайæн кьлæсты ахуыргæнджытæн, кæцытæ бон цалдæр сахаты кусынц маскæты мидæг.
Æппæт дуне карз низы фæстиуæгæн цы уавæры бахауд, уый махыл дæр бандæвта. Дистанцион ахуырæй, куыд не скъолаты ахуыргæнджытæ, афтæ ахуыргæнинæгтæ дæр, æййафынц зындзинæдтæ. Ацы уавæр бирæбæрцæй бандæвта ахуыры æмвæзадыл, бирæ скъоладзаутæн нæй интернет ресурстæ, нæй сын компьютертæ æмæ нырыккон телефонтæ интернет бастдзинадимæ. Иуæй-иу бинонты ‘хсæн ис цалдæргай сывæллæттæ æмæ иу телефон интернет бастдзинадимæ. Афтæмæй уыдон бахъæуы «рады» лæууын, цæмæй сæ алчи дæр рахиза онлайн урокмæ, райсой сæ хæслæвæрдтæ æмæ сдзуапп кæной сæ ахуыргæнджытæн. Ахæм скъоладзаутæ, кæцытæн нæй интернет-бастдзинад сæ ахуыргæнджытимæ, фæстейæ баззадысты ахуырадон программæйæ æмæ уый хъуыдыйаг у.
Æмæ ма нæм ис ахæм сывæллæттæ дæр, кæцытæ сæ ахуыргæнджытимæ контакты нæ цыдысты ахуыры рæстæджы дæр. Фæлæ сæ зонындзинæдтæ иннæ сывæллæттæй къаддæр нæ уыдысты. Алы сывæллон дæр æндæртæй хицæн кæны. Уæлдай æндæрхуызон сты, аутизмæй хъыгдард чи у, уыдон. «Ахæм сывæллæттæм фæхъæуы уæлдай фылдæр хъусдард. Иннæтæй сæ иппæрд куы нæ кæнай, уæд фæстейæ нæ баззайдзысты. Алы сывæллонмæ дæр хъæуы индивидуалон ахаст. Ахæм сабитæ хицæн кæнынц уымæй, æмæ дунемæ кæсынц æндæр цæстæй. Мах та сын хъуамæ фадат дæттæм æхсæнадмæ хæстæгдæр уæвынæн», – радзырдта сывæллæттæй сæ иуы мад. «Ахуыргæнæг æрмæст амонгæ нæ кæны, канд къласы бæрны нæ бацæуы, фæлæ дзуапп дæтты алы ахуырдзауы тыххæй дæр хицæнæй. Уый хъуамæ зона, рахиздзæн сывæллон йемæ контакты дистанцион уавæры æви нæ. Базона, цы аххосагмæ гæсгæ не сдзуапп кодта, æмæ йын саргъ кæна йæ зонындзинæдтæн йæ уавæрмæ гæсгæ», – зæгъы æндæр ныййарæг.
Иннæ дæсныйæдтимæ абаргæйæ, ахуыргæнæджы дæсныйад у æппæтæй вазыгджындæр æмæ арфæйагдæр. Ныхасæн баззади, зæгъгæ, дам, Арв æмæ Зæххы астæу сывæллоны удæй сыгъдæг-дæр нæй æмæ ахуыргæнæджы уд дæр сывæллæттимæ кусгæйæ сыгъдæгдæр кæны.
Афтæ у ахуырдзауты хъуыддаг дæр: иутæ ног æрмæгыл уайтагъд фæхæст вæййынц, иннæтæн æй хъæуы фæлхатт кæнын, аннæтæ та йæ æппындæр нæ бамбарынц. Ахуыргæнæг хъуамæ уыдæттæ æмбара æмæ хицæнæй бакуса алы сывæллонимæ дæр. Уыд афтæ дæр: скъоладзау йæ хæдзарон куыст бацæттæ кодта, фæлæ не сдзуапп кодта видеобастдзинады руаджы, æмæ йын ахуыр-гæнæг «дыууæ» нывæрдта. Иннæ хатт дæр – афтæ. Уый ууыл дзурæг нæу – саби зынхъомылгæнинаг у, кæнæ зивæггæнаг. Ахæм ахастæй сывæллон, гæнæн ис æмæ психологон травмӕ дæр райса.
Зындзинæдтæ ма æййафынц хистæр кары ахуыргæнджытæ дæр, компьютерон технологиты зо-нындзинæдтæ сын фаг кæй нæй, уымæ гæсгæ. Уыдон сты дуджы ног фæзындтæ æмæ сусæггаг нæу, алчи сыл æххæст æмвæзадыл кæй нæма фæцалх, уый.
Цхинвалы 1-æм астæуккаг скъолайы директор Гобозты Русуданы хъуыдымæ гæсгæ дистанцион ахуырæн ис куыд æппæрццаг, афтæ æвæрццаг миниуджытæ дæр. «Райдианы онлайн ахуыртæм ахуыргæнинæгтæй бирæтæ нæ кастысты серьезонæй æмæ уымæ гæсгæ нæ хызтысты уроктæм, фæлæ куыдфæстагмæ махæн бантыст не скъолайы ахуыргæнинæгты 70-75 проценты æрбаиу кæнын. Дистанцион ахуыры системæйæн схонæн ис æнцонвадат, фæлæ, хъыгагæн, нырма нæй фаг ресурстæ æмæ компьютерон комуникацитæ, цæмæй æххæстбæрцæй пайдагонд цæуа ацы ахуыры формæйæ». Ацы къахдзæфтæ фыццаг рады сты не ‘нæниздзинадмæ здæхт æмæ сты рæстæгмæ, цæмæй сывæллæттæ хæдзары бадгæйæ дæр æвдæлон ма уой.
Дистанцион ахуыры хуызæй пайда кæнынц республикæйы ахуырадон уагдæттæн сæ фылдæр, уымæ гæсгæ бирæ организацион фарстытæ аззадысты фæстийæ. Фæлæ сезонон æмæ коронавирусы гриппæй рынчынты нымæц куы фæкъаддæр уа, уæд ахуырадон процесс фæстæмæ æрыздæхдзæн йæ раздæры бынатмæ.
Дриаты Лейла
Comments are closed, but trackbacks and pingbacks are open.