Бакæнгæ дистанцион ахуырадæн развæлгъау анализ æмæ карантины фæуды фæстæ ахуырадон процесс адарддæр кæныны варианттыл æруынаффæ кодтой Хуссар Ирыстоны Ахуырады министрады къухдариуæгадæн скъолаты директортимæ фембæлды рæстæджы.
Иу мæйы дæргъы Ахуырад æмæ зонады министрады уынаффæмæ гæсгæ горæты æмæ районты æппæт скъолатæ рахызтысты дистанцион ахуырадмæ.
Ахуыргæнджытæ сæхæдæг куыд банысан кодтой, афтæмæй иумæйагæй интернет платформæйы фæрцы архайынц скъоладзаутæн сæ 70 проценты.
Ахуырады министры хæдивæг Гаглойты Элиса фæндон бахаста, цæмæй сентябрмæ урæд æрцæуа ахæм предметты ахуырадон процесс, кæцыты программæйыл фæтых сты æмæ сæ ныртæккæ кæнынц фæлхатт.
«Кæцы предметты программæтыл нæма фæтых сты, уыдоныл дзургæйæ та ахуыр адарддæр кæнын хъæуы ныры режимы», – банысан кодта уый.
Уымæй уæлдай ма фæндон бахастæуыд, цæмæй сентябры ахуыр адарддæр уа техпредметты фæдыл, кæцыты гæнæн нæй дистанцион æгъдауæй сахуыр кæнын.
Уыимæ иумæ ахуырадон процесс гæнæн ис æмæ адарддæр уа июны мæйы, карантинон мадзæлттæ сисыны фæстæ, цæмæй дистанцион ахуырады рæстæджы цы æрмæджытыл куыст æрцыд, уыдон рабæрæг кæной.
«Æз афтæ хъуыды кæнын, æмæ, хорз уаид июны мæйæ спайда кæнын, карантин сисыны фæстæ нын куыстмæ ахизыны фадат кæд уа, уæд», – банысан кодта Ахуырад æмæ зонады министр Гасситы Натали.
Йæ ныхæстæм гæсгæ, 9-æм æмæ 11-æм кълæсты рауагъдон фæлварæнты фарстыл куыст цæуы. «Дистанцион æгъдауæй фæлварæнтæ ауадзынæн гæнæн нæй, мах хъуыды кæнæм, уыцы процесс куыд сорганизаци кæнæм, цæмæй максималонæй бахъахъ-хъæнæм сывæллæтты æдасдзинад», – банысан кодта министр.
Æмбырды фехъусын чындæуыд 1-æм къласæй 8-æм къласы онг ахуырдзаутæ иу къласæй иннæ къласмæ ахизыны фæлварæнтæ кæй нæ дæтдзысты, ахуыргæнджытæн рекомендаци æрцыд, цæмæй ахуыры азы дистанцион ахуырады фæстиуджытæм гæсгæ ахуыры азы нысæнттæ æвæрд æрцæуой.
Ахуырады министрад фæнд кæны, ахæм рæстæджы дистанцион ахуырады альтернативон хуыз бакæныны фарстыл бакусын.
Comments are closed, but trackbacks and pingbacks are open.