Женевæйаг дискусситы фæлгæтты цы механизм арæзт æрцыд Инциденттæ ма æруадзын æмæ сæм хъусдард здахыны фæдыл, уымæн æрæджы уыд йæ 86 рабадт. Уый хъусдард здахы Хуссар Ирыстон æмæ Гуырдзыстоны ‘хсæн паддзахадон арæнтыл уавæрмæ. Механизмты ацы фембæлд уыд продуктивон, боны фæткы 20 фарстыл уынаффæ цыд дæргъвæтин рæстæг.
Механизмты куыстæн фæстиуджытæ аразгæйæ, Постконфликтон бæстонкæнынады фæдыл Хуссар Ирыстоны Президенты æххæстбарджын минæвар Джиоты Мурат банысан кодта, Арчил Тъатъунашвилийы амæлæты охыл гуырдзиаг фарс æнæбындур аххосæгтæ кæй размæ кæны Хуссар Ирыстоны ныхмæ. Гуырдзиаг делегаци куыд банысан кодта, уымæ гæсгæ ацы æмбæстагæн æрмæст йæ мард буар цы радтой, уый йеддæмæ йын нæ уыд экспертон хатдзæг.
«Мах ноджыдæр банысан кодтам, хуссарирыстойнаг фарс æппындæр кæй ницы аххосджын уыд Тъатъунашвилийы амæлæты. Ацы æмбæстаджы мæлæт æрцыд йæ зæрдæйы лæмæгъдзинады аххосагмæ гæсгæ. Уый уыд Гуырдзыстоны спецслужбæты афицер, уымæ гæсгæ Хуссар Ирыстоны æнгæс службæтæм уымæ бирæ фарстытæ уыд, æмæ нæ хъуыд удæгасæй.
Алкæйы мæлæт дæр трагикон у, æмæ Хуссар Ирыстоны азымджын кæнын та æнæбындур у. Уымæ гæсгæ ноджыдæр фæлхатт кæнын – гуырдзиаг фарсмæ æндæр экспертон фæстиуæг нæй æмæ сæ ныхæстæ сты мысæггаг», – банысан кодта Джиоты Мурат.
Æххæстбарджын минæвары ныхæстæм гæсгæ Хуссар Ирыстон æмæ Гуырдзыстоны паддзахадон арæны уавæры фæдыл, механизмты фæстаг фембæлдæй фæстæмæ хуссарирыстойнаг фарс æрхаста конкретон факттæ Гуырдзыстоны уæвæг Евроцæдисы миссийы хъусдарджытæн. Карзæй банысан кодтой, Евроцæдисы миссийы мандаты куыст æрмæст Гуырдзыстоны территорийыл кæй у, æмæ йæ минæвæрттæн нæ республикæйы арæн-тæм хизыны бар кæй нæй.
Механизмты фæлгæтты ма дзырд цыд, æрæджы Гуырдзыстоны чырыстон аргъуаны минæвæрттæ Хуссар Ирыстоны территорийыл Адзысæры хъæумæ хæстæг аргъуаны службæ кæй хъуамæ ауагътаиккой.
Хуссар Ирыстон, Гуырдзыстон æмæ Евроцæдисы хъусдарджыты миссийы ‘хсæн цы рæвдз бастдзинады хахх кусы, уый руаджы райстам информаци, зæгъгæ, гуырдзиаг митрополит аргъуанмæцæуджытимæ кæны службæ ауадзыны фæнд. Уыдонæн Хуссар Ирыстон разыйы дзуапп нæ радта, кæй зæгъын æй хъæуы, уымæн æмæ уый у паддзахадон арæнтæ фехалыны хъуыддаг. Фæлæ уæддæр гуырдзиаг чырыстон аргъуаны минæвæрттæ 6-æм майы архайдтой арæнтæй æрбахизыныл, фæлæ арæнхъахъхъæнджыты куы федтой бынаты, уæд сæ службæ ауагътой гуырдзиаг хъæу Адзвисмæ хæстæг. Гуырдзыстоны чырыстон аргъуаны архæйдтытæ РХИ-йы Президенты æххæстбарджын минæвар банымадта провокационыл – нæй сын æндæр аргъ скæнæн, уымæн æмæ уыдон серьезонæй фæвазыгджын дæр кодтаиккой уавæр.
«Гуырдзиаг аргъуаны минæвæрттæ иттæг хорз зонынц, Адзысæры хъæуы цур аргъуан Хуссар Ирыстоны территорийыл кæй ис, уымæ гæсгæ Гуырдзыстоны ‘рдыгæй арæны сæрты цыфæнды хуызы ахызт дæр у æнæзакъонон архайд», – банысан кодта ныхасгæнæг. Ацы архæйдтытæ хуссар-ирыстойнаг фарс абарста, уымæй размæ азты арæнтыл уавæр фендыгъддæр кæнынмæ гуырдзиаг аргъуаны ног бафæлвæрдимæ.
Иумиагæй сисгæйæ, механизмты куыст Джиоты Мурат банымадта ахсджиагыл, цæмæй арæнгæрон районты уавæр бæстон цæуа æмæ дзы кæд инциденттæ сæвзæра, уæд рæстæгыл бæстон цæуой. Уый ма куыд банысан кодта, уымæ гæсгæ 1-æм мартæй абоны онг нæ арæнхъахъхъæнæг службæтæ арæны фæтк халыны фæстиуæгæн æрурæдтой 13 гуырдзиаг æмбæстаджы. Æмбæлон процедурæты фæстæ уыдон æрвыст æрцыдысты республикæйæн æддæмæ.
Къæбулты Маринæ
Comments are closed, but trackbacks and pingbacks are open.