УÆДДÆР ХÆЛД ЦÆУЫ АРÆНТЫЛ ХИЗЫНЫ ФÆТК

Цæрæн пункт Эргнетмæ хæстæг уагъд цæуынц Инциденттæ ма æруадзын æмæ сæм хъусдард здахыны фæдыл механизмты фæлгæтты техникон фембæлдтытæ. Ацы форматы радон фембæлды рæстæджы хуссарирыстойнаг фарс фехъусын кодта, гуырдзиаг-хуссарирыстойнаг паддзахадон арæнтыл хизыны фæткхалæн цаутæ кæй фылдæр кæнынц. Уыцы фæткхалæн цауты хайадисджытæ сты кæнæ полицийы кусджытæ сæхæдæг, кæнæ та уыдон ардыдæй æрцæуынц хæлд. Уый тыххæй фехъусын кодта информацион фæрæзтæн хуссарирыстойнаг делегацийы сæргълæууæг Коцты Егор, фембæлдæн хатдзæгтæ аразыны рæстæджы.

Йæ ныхæстæм гæсгæ гуырдзиаг æнæхицауадон организацийы минæвар, цавæрдæр Кацарава Дауыт фехæлдта Хуссар Ирыстонимæ паддзахадон арæнты фæтк. Гуырдзиаг полициæгты минæвæрттæ уымæй размæ архайдтой уый арæнтæм ма рбауадзыныл. Фæлæ ацы хатт уыдон дæр фæивтой сæ хъуыды. Уый нæ, фæлæ ма Дауыт систа киноныв дæр, цыран уый алы позæтæ аразгæйæ, æвдисы арæнгæрон информацион нысæнттæ. Егоры ныхæстæм гæсгæ æппæт ацы бархалæн цаутæ иуварс хъуамæ цæуой æмæ фæткхалæн цаутæ та хаст цæудзысты дунеон æмæхсæнады хъусдардмæ.

Хуссарирыстойнаг делегацийы сæргълæууæджы ныхæстæм гæсгæ та ноджыдæр зæрдыл æрлæууын кодтой, Знауыры районы Уисты хъæуы æнæзакъонон гуырдзиаг пост æвзæрырдæм кæй æндавы ацы районы уавæрыл. Ноджыдæр банысан кодтой, ацы уавæр æрбæстон кæныны фæндæттæ кæй сты, цæмæй Хуссар Ирыстоны территорийæ ацы пост иуварс æрцæуа!

Механизмты форматы рæстæджы ма Хуссар Ирыстонæй хайадисджытæ уæлдай хъусдард аздæхтой, нæ Республикæйы уæлдæфон тыгъдад кæй халдæуы Гуырдзыстоны рдыгæй тæхæн аппаратты руаджы, уыцы фактмæ. Дæнцæгæн æрхастой дыууæ цауы, кæцытæ хынцыд æрцыдысты механизмты форматы фæстаг фембæлдæй фæстæмæ. Уыдон уыдысты верттæхæг æмæ рæуæгмоторон хæдтæхæг, кæцытæ æрбатахтысты нæ территоримæ æмæ уымæй халынц æндæр бæстæйы уæлдæфон тыгъдад.

«Хуссар Ирыстоны минæвæрттæ бахынцыдтой, гуырдзиаг фарсæрдыгæй ахæм архæйдтытæн дарддæр бынат мауал хъуамæ уа, уымæн æмæ уыдон сты радон инциденттæм здæхт, æмæ сæ фæдыл бæрндзинад дæр хæсдзысты сæхæдæг», – банысан кодта ныхасгæнæг.

Коцты Егор ма куыд фехъусын кодта, уымæ гæсгæ механизмты фæстаг фембæлдæй фæстæмæ арæнтæ халыны цауты тыххæй урæд æрцыдысты Гуырдзыстоны фондз æмбæстаджы.

Нæ уацх.