Сырх Дзуары Дунеон Комитет у хӕдбар организаци ӕмӕ йӕ хӕстӕ ӕмӕ ны-сӕнттӕн ис гуманитарон характер. Уыдон та сты, цӕмӕй хӕстон конфликттӕ ӕмӕ ӕндӕр мӕгуырау уавӕрты бахауӕг адӕймӕгты цард бахъахъхъӕнын ӕмӕ сын баххуыс кӕнын. Ацы организаци ныр цалдӕр азы йӕ хӕрзиуӕгон архайд кӕны Хуссар Ирыстоны – куыд горӕты, афтӕ районты дӕр ӕмӕ комплексон ӕххуыс кӕны цӕрджыты иууыл тыхстдӕр категорийæн. 1989-92-ӕм азты ӕмӕ 2008-ӕм азы хæсты фӕстиуӕгӕн ӕбӕрӕгӕй чи фесӕфт, уыдон хъысмӕт сбӕрӕг кӕнын у ацы Комитеты сӕйрагдӕр приоритеттӕй сӕ иу. Организацийӕн ис ӕдзухон бастдзинад хицауады ӕппӕт ӕмбӕлон структурӕтӕ ӕмӕ ӕбӕрӕгӕй фесӕфӕг бинонты уӕнгтимӕ ӕмӕ архайы, чи фесӕфт, уыдон хъысмӕт базоныныл. 2018 азы июлӕй декабры мӕйы онг ма ӕрӕмбырд чындӕуыд 4 контролон биологон хуызӕджы. Афтӕ ӕмӕ ӕрӕмбырдгонд хуызӕгты иумиаг бӕрц у 146. Уымӕй дарддӕр ма агуырды тыххӕй ноджыдӕр ӕмбырд кодтой куырдиӕттӕ, афтӕ ма 1989-92-ӕм конфликтты азты ӕбӕрӕгӕй фесӕфӕг хиуӕтты цардӕгасы тыххӕй информаци базонын. Уыцы архайды фӕлгӕтты Комитет ноджы райста иу куырдиат. Уымӕ гӕсгӕ ӕрӕм-бырдгонд куырдиӕттӕ ӕмӕ анкетӕтæ Хуссар Ирыстон ӕмӕ Уӕрӕсейы Федерацийы систы 77 ӕмӕ 56 адӕймаджы. Ноджы ма Комитеты кусджытӕ цӕр-джытимӕ фембӕлдысты 16 хатты, зæрдæ кæдæм æхсайы, ахæм бынӕтты ныгӕд чи сты, уыдон тыххӕй уӕлӕмхас зонӕнтӕ райсыны тыххӕй.
Ноябры мӕйы организацийы хайадистӕй уыд ӕбӕрӕгӕй фесӕфӕг адӕймӕгты хъысмӕт базоныны тыххӕй Координацион механизмы ӕртындӕсӕм фембӕлд ӕмӕ йӕ куысты хайад райстой Уӕрӕсе, Хуссар Ирыстон ӕмӕ Гуырдзыстоны минӕвӕрттӕ.Уыдон ӕрдзырдтой, 90-ӕм азты ӕмӕ 2008-ӕм азты ӕбӕрӕгӕй чи фесӕфт, уыдон хъысмӕт ӕмӕ бынат базоныны тыххӕй.
Бинонты бастдзинад сӕндидзын кӕныны Программӕйы фӕлгӕтты Комитет ӕххуыс кӕны, конфликты фӕстиуӕгӕн йӕ хӕстӕджытӕ ӕмӕ хиуӕттимӕ бастдзинад кӕмӕн нал ис, уыдонӕн ӕмӕ сын фадат дӕтты сӕ хиуӕттӕм Сырх Дзуары Ныстуан арвитын кӕнӕ та семӕ телефонон бастдзинад сифтонг кӕнынӕн. Конфликты фӕстиуӕгӕн бинонты уӕнгтӕй чи фӕиппӕрд, уыдонӕн зын вӕййы ӕдзухон бастдзинад сифтонг кӕнын сӕ хӕстӕджытимӕ.
Ахӕм бионтӕн баххуыс кӕныны тыххӕй Комитет ивгъуыд аз ӕрӕмбырд кодта дыууӕ Ныстуаны, афтӕ ма сарæзта 25 телефонон бастдзинады. Уый ма ноджыдӕр ӕмархайд кӕны, бинонтӕй кӕрӕдзийӕ чи фӕиппӕрд, уыдон кӕрӕдзимӕ ӕрбаввахс кӕныныл. Йӕ хорз архайды фӕрцы ацы рӕстӕгмӕ се ‘ввахс адӕймӕгтимӕ ӕрбаиу сты 3 адӕймаджы. Куыд ирӕттӕ, афтӕ гуырдзиаг ӕмбӕстӕгтӕй дӕр йӕ бартӕ кӕмӕн ӕристой, уыдон Комитеты ӕмархайды фӕрцы федтой сӕ хиуӕтты ӕмӕ сын барвыстой ӕрвитӕггӕгтӕ.
Социалон ӕгъдауӕй Комитет ӕдзухдӕр ӕххуыс кӕны хӕлцадон ӕмӕ ӕнӕхӕлцадон товартӕй иууыл тыхстдӕр категорийы адӕймӕгтӕн. Ахӕм ӕххуыс ӕрвылквартал дӕр бакӕнынц бирӕсывӕллонджын бинонтӕн, иунӕгӕй чи цӕры, ахӕм зӕрӕдтӕн ӕмӕ ӕндӕртӕн. Цӕвиттон, ивгъуыд азы дыккаг ӕмбисы ахӕм ӕххуыс бакодта 229 бинонтӕн, æдæппæт 500 адӕймагӕн Хуссар Ирыстоны цыппар районы дӕр. Хӕлцадон ӕмӕ ӕндӕр товартӕй иухаттон ӕххуыс райстой, горӕт Цхинвалы сӕ хӕдзӕрттӕ кӕмӕн басыгъдысты, уыцы бинонтӕ дӕр.
Хъармгӕнӕн сезоны ӕрбалӕудмӕ 114 ӕвӕрӕз бинонтӕн суг радтой 456 кубометры. Йӕ кусджытӕ дарддӕр дӕр цыдысты æвæгæсæг ацæргæ адæймæгты хӕдзӕрттӕм. Ахæмтæ уыдысты13 адӕймаджы. Уыдонмӕ Цхинвалы горӕты цыдысты ӕрвылбон дӕр, къуыри иу хатт та цыдысты Цхинвал, Ленингор ӕмӕ Знауыры районты хъӕутӕм. Алкӕмӕн дӕр се ‘нцой балӕууыдысты хӕлцадон продукттӕ ӕлхӕнын ӕмӕ сын сӕ бынатмӕ фӕхӕццӕ кӕныны, зылдысты сын сӕ цӕрӕн бынӕттӕм, сыгъдӕг сӕ кодтой, хастой сын дон, ӕххуыс сын кодтой ӕнӕниздзинад хъахъхъӕныны уагдӕттӕм бацӕуынӕн. Бынӕттон хицауадимӕ ӕнгом архайгæйæ, Дунеон Комитеты экономикон ӕдасдзинады хайады кусджытӕ административон ӕгъдауӕй се ‘нцой балӕууыдысты 25 ӕмбӕстагӕн. Уыдонӕн алыхуызон аххосӕгтӕм гӕсгӕ сӕ бон нӕ баци сӕ документтӕ бацӕттӕ кӕнын кӕнӕ та нӕ райстой социалон ӕххуыстӕ. Уымӕй дарддӕр ма Комитет Ӕнӕниздзинад хъахъхъӕнын ӕмӕ социалон рӕзты министрад районты ветслужбӕтӕ, цӕрӕнуатон-коммуналон хӕдзарады хайадтӕн лӕвары хуызы радтой 7 уазалгӕнӕны, ӕртӕ донцъирӕнтӕ ӕмӕ агротехникӕйӕ алыхуызон фӕсауӕрц хӕйттӕ. Ивгъуыд азы дыккаг ӕмбисы 10 адӕймаджы бахатыдысты Комитетмӕ ӕмӕ райстой ортопедион ӕххуыс: ӕхсӕз сахъатджыны райстой коляскæтæ, дыууӕйӕн се ‘нцой балӕууыдысты протезтӕ райсынӕн, бакодтой æндæр хуызты æххуыс дæр. Банысангонд рӕстӕджы Комитеты ӕмархайды фӕстиуӕгӕн ӕвӕстиат медицинон лӕггад кӕй хъуыд, уыцы 82 уӕззау рынчынӕн баххуыс кодтой Цхинвалӕй Тбилисы медицинон уагдӕттӕм фӕхӕццӕ кӕныны, 77 пациентӕн та хирургион ӕххуыс бакӕныны.
ХУЫБИАТЫ Никъала
Comments are closed, but trackbacks and pingbacks are open.