Таможнæйон пост «Раздæхæн» кусы раздæры режимы

15-æм марты байгом Ленингоры районы, Хуссар Ирыстон æмæ Гуырдзыстоны ‘хсæн арæн.

Куыд зонæм, афтæмæй раздæр уадзæн пункт Раздæхæны лæууыдысты Уæрæсейы арæнхъахъхъæнджытæ. Бæлццæттæ цы продукци ластой, ууыл контроль кæнын сæ компетенциты нæ уыд æмæ бæлвырд сгæрст нæ цыдысты. Уымæ гæсгæ Ленингоры бынæттон цæрджытæ æнæкъуылымпыйæ дыууæрдæм кодтой. Гуырдзыстонæй цы машинæтæ цыд, уыдонæн арæнхъахъхъæнджыты домæнтæм гæсгæ сæ бон уыд 50 кг. онг уæзтæ ласæн. Фæлæ кæмæдæрты уый фаг нæ каст æмæ хъалон фидын кæй нæ хъуыд, уый тыххæй сæ бон уыд арæныл суткæйы мидæг цалдæр хатт ахизын. Афтæмæй бизнесы куыст кодтой. Уавæр фæивта 2018 азы, Хуссар Ирыстоны Тамож-нæйон управленийы кусджытæ Раздæхæны пост куы сæвæрдтой, уæд. Таможнæйы кусджытимæ ма ам æрлæууыдысты фитосанитарон цæстдарды специалисттæ дæр. Уымæн æмæ халсæрттæй дарддæр уырдыгæй ластæуыд фыдызгъæл дæр. Бæрæг куыд у, афтæмæй та Гуырдзыстоны арæх фосыл фæзынынц хæцгæ низтæ.

Ног домæнтæм гæсгæ, арæны сæрты чи хизы, уыдоны машинæтæ сгарынц фитосанитарон службæ дæр. Рабæрæг кæнынц халсæрттæ æмæ дыргъты нитраттæ æмæ æндæр зианхæссæг буарадтæ ис æви нæ, уый. Уæлдай хъусдард цæуы дзидза æмæ æхсыры продукттæм. Таможнæйыл хизгæйæ æнæмæнг сбарын хъæуы товар, уый фæстæ йæ хицау хъуамæ бафида, цы æмбæлы, уыцы хъалон. Æрмæстдæр декларацийы райсыны фæстæ йæ бон уыд æрбахизын йæ ласæггæгтимæ амалиуæггæнæгæн.

2019 азы райдианы Гуырдзыстоны хæцгæ низ H1N1 куы фæзынд, уæд Хицауады уынаффæмæ гæсгæ æхгæд æрцыдис Хуссар Ирыстонмæ æрбахизæн арæн. Ныр низ кæй ныннымæг, уымæ гæсгæ гом æрцыдысты арæнтæ дæр.

Мах бацымыдис кодтам, Ленингоры районы таможнæйон посты исты ивындзинæдтæ æрцыд, æви нæ. Уый фæдыл Таможнæйы сæйраг управленийы куыд загътой, афтæмæй: «Ленингоры районы таможнæйы ног хуызы пост арæзт æрцыд ивгъуыд аз. Хицауады уынаффæмæ гæсгæ 119 статьяйы 5 пунктмæ ивындзинæдтæ хаст куы æрцыд, уæд. Уыцы ивындзинад ахъаз уыд, фыццаджыдæр, Хуссар Ирыстоны бюджет фæхъæздыгдæр кæныны нысанæн. Ныртæккæ Гуырдзыстонæй цы халсæрттæ æмæ дыргътæ ласт цæуынц, уыдон раздæрау сгарынц фитосанитарон цæстдарды специалисттæ. Уый фæстæ амалиуæггæнæг йæ товарты номыгъд бафидар кæны декларацийæ, бафиды таможнæйон фиддонтæ.

Таможнæйон управлени нырма нæ хъавы ивындзинæдтæ бахæссын Хицауады уынаффæмæ. Уый фæстæ, зæгъгæ, кæд ногдзи-нæдтæ уа, уæд сæ фехъусын кæндзыстæм адæмæн.

Уазæгты Марфæ