ÆХХÆСТ КÆНЫНЦ СЕ ‘РВЫЛБОНОН СЛУЖБÆЙОН ХÆСТÆ

Кæд æмæ ныры карз эпидемиологон уавæры милицийы бахæсджын кодтой, цæмæй сæ хъус дарой карантинон режиммæ æмæ ма æруадзой бархалæн цаутæ, уæддæр се ‘рвылбонон службæйон хæстæн æнæ æххæстгæнгæ нæй. Уый фæдыл фæндагон змæлды æдасдзинады инспекци раздæрау уадзы профилактикон мадзæлттæ, рейдты рæстæджы фæлæууынц республикæйы фæндæгтыл æмæ бæрндзинадмæ кæнынц фæткхалджыты.

Профилактикон мадзæлттæ нысанмæздæхт сты авариты нымæц фæкъаддæр кæнынмæ. Уымæн æмæ фæндагон-транспортон цаутæ республикæйы фæндæгтыл арæх æрцæуы, рынчындæттæм дæр бахауынц бирæтæ, æрцæуы уды зиæнттæ дæр, æмæ ацы ситуаци исты амæлттæй рараст кæнын хъæуы. Уый фæдыл Мидхъуыддæгты министрады къухдариуæгад фæндон рахастой, цæмæй профилактикон мадзæлттæ республикæйы фæндæгтыл уагъд цæуой арæхдæр æмæ фæткхалджытæ та æййафой карздæр æфхæрд. Кæд æмæ басгæрстыты рæстæджы шофыртæн сæ рæстæгæй бирæ нæ байсынц, уæддæр дзы разыны ахæмтæ, кæцытæ се ‘нæразыдзинад равдисынц, – чи йæ комкоммæ фæзæгъы, чи та интернеты фæкалы цъыф инспектортыл. Æмæ уый та раст нæу. Кæд æмæ фæткхалæг нæ дæ, уæд инспекторæй цæмæй тæрсыс, нæуæд иу адæм не стæм, кæй дзы дæлдзиныг кæнæм.

«Аваритæ æрцæуынæн цыдæриддæр фæткхалæн цаутæ ахъаз сты, æппæт уыдонмæ дарæм уæлдай хъусдард. Кæд æмæ исчи фена нозтджын шофыры, кæнæ ахæм шофыры, кæцы халы фæтк æмæ æхсæнадон сабырад, уæд æнæмæнг фехъусын кæнæд милицимæ. Махæн дæр хуымæтæг адæм куы нæ æххуыс кæной, уæд нын зын у барсæтджыты раргом кæнын», – сиды цæрджытæм фæндагон змæлды æдасдзинады батальоны командир Коцты Алим.

Рейдон мадзæлтты рæстæджы ма инспектортæ бæрндзинадмæ æркæнынц ахæм фæткхалджыты, кæцытæ фæцæуынц стыр тагъдадæй, светофоры сырх рухсыл аскъæрынц, фæндагон нысæнттæм нæ фæкæсынц, сæ машинæтæ бар кæм нæй, ахæм рæтты бауромынц.

Экономикон фыдракæндтæ ма æруадзыны управленийы кусджытæ дæр регуляронæй зилынц нæ республикæйы дуканитыл æмæ ма алыгъуызон базарадон объекттыл. Басгæрстыты рæстæджы сæ хъус уæлдай тынгдæр дарынц æнæакцизон кæнæ æнæлицензион карз нозтытæм æмæ тамакотæм. Кæд æмæ дзы ахæмтыл бамбæлынц, уæд дызæрдыггаг товар конфискаци æрцæуы, товары хицауыл арæзт æрцæуы административон суагъæ æмæ стæй материалтæ æрвыст æрцæуынц тæрхондонмæ.

Нæ уацх.