Цыфæнды горæт дæр фидауы йæ цъæхдарæнтæй. Цæмæй уыдон аив уой, уый тыххæй та сæ рæстæгæй-рæстæгмæ хъæуы æхсæдын. Хурбонтæ сæ къух амонынц нæ горæты хæрзарæзтады комбинаты кусджытæн æмæ бæлæсты æхсæдынц. «Ныртæккæ у уæлдай къалиутæ бахсæдынæн тынг хорз рæстæг. Зымæджы бæлæстæ кæндзысты фынæй æмæ та уалдзæджы куы райхъал уой, уæд ног къалиутæ рауадздзысты æмæ фæрæсугъддæр уыдзæн æмткæй бæлас. Бæлæсты хус цæнгтæ ралыг кодтам Фидауынгæнджыты, 8-æм июны, Путины уынгтыл æмæ цæрæн массивы. Кæд нæ боныгъæдтæ бауадзой, уæд иннæ уынгтыл дæр бакæндзыстæм ахæм куыстытæ. Адæмæй чидæртæ не ‘мбарынц, бæлæсты цæнгтæ лыг кæнынæн цы нысаниуæг ис æмæ немæ быцæу ныхас фæкæнынц. Электротелтæ дæр бæлæсты къалиуты ‘хсæн фæвæййынц æмæ зынгæ дæр нал фæкæнынц. Тæссаг у кæрæдзийыл куы аныдзæвой æмæ авари куы æрцæуа», – радзырдта нын кусджытæй сæ иу.
Специалисттæ дæр афтæ амонынц: «Уый у æнæмæнг процедурæ. Бæласæн йæ хус къалиутæ куынæ бахсæдай, уæд низджын кæнынц, уалдзæджы сыфтæр нæ ракалдзæн. Бæлæсты æрмæст æхсæдын нæ хъæуы, фæлæ ма – сæ бындзæфхæдтæм зилын, чъырæй сæ сцæгъдын дæр. Бæлæсты уидæгтæ æфхæрд баййæфтой уынгтæ цалцæг кæныны рæстæджы дæр. Æрвылаз дæр нæ горæты сцалцæг кæнынц цалдæр уынджы æмæ æнæбахъыгдаргæ нæ вæййынц бæлæсты уидæгтæ. Хуыздæр у, кæй зæгъын æй хъæуы, цæмæй ног бæлæсты мыггæгтæ сагъд цæуа алы аз дæр», – зæгъы биолог Саулохты Владимир.
УАЗÆГТЫ Марфа
