Цæгат Ирыстоны социалон – экономикон рæзты фидæны сæйраг нысæнттæ æмæ ивгъуыд азы бæрæггæнæнты тыххæй республикæйы цæрджытæм йæ æрвылазон доклад-æрвыстæджы фæсидт республикæйы Сæргълæууæг Битарты Вячеслав. Уый бæлвырд радзырдта 2019 азы сæ къухы цы бафтыд саразын, уый тыххæй, уыимæ муниципалон, стæй регионалон хицауадæн дæр.
Битары-фырт куыд банысан кодта, афтæмæй цæрджыты царды æмвæзад бирæ фæуæлдæр социалон-экономикон къабазы. Дзæуджыхъæуы аив кæнынмæ здæхт æрцыд фылдæр æргом, ацы аз реконструкци фæуыдзæн Центрон парк, Уæлахизы проспектмæ здæхт цæуы йæ историон хуыз, Уæлахизы бæрæгбонмæ фæлгонц цæуынц горæты æппæт объекттæ, цалдæр километр ивд æрцыдысты æфсæн рель-сытæ, арæзт цæуы уæгъдибар хъæбысхæсты спорты гал-уан, цыппæрдæс спортивон-дзæбæхгæнæн комплексы, культурæйы хæдзæрттæ, суворовон æфсæддон училище æмæ афтæ дарддæр.
Республикæйы Сæргълæууæг ранымадта ивгъуыд азы сæ къухы цы бафтыд, уый дæр. Уыдон сты: тарнизты дзæбæхгæнæн æмæ онкологийы диспансерты арæзтад, клиникон рынчындоны бындурон цалцæг, цалдæр хъæуы медицинон пункттæ æмæ амбулаториты сарæзт, культурæйы хæдзæртты цалцæг, æфсæнвæндæгты уæлцъар ивын, Мæздæгмæ цыбыр фæндаг бакæнын æмæ бирæ æндæртæ.
Битарты Вячеслав ма дзырдта демографийыл, бюджеты фæрæзтыл, аивад æмæ культурæйы рæзтыл, æндæр регионтимæ базарадон ахастдзинæдтыл, туризмыл, чи нал кусы, уыцы куыстуæтты сног кæныныл, хæххон цæрæнуæтты программæйы рæзтыл, хæсты ветерантæн æппæт уавæртæ саразын æмæ бирæ æндæр ахсджиаг нысæнттыл. Республикæйы Сæргълæууæг фæсидт æппæт хицауиуæггæнæг органтæм ног нысæнттæ æвæстиатæй царды рауадзынмæ.
“Махæн нæ къухы æппæтдæр бафтдзæн иумæйаг хъаруйы руаджы. Цас сарæзтам, æрмæст уыдæттæ нæ хъæуы нымайын, фæлæ ма сæм цы цæстæй кæсæм, уыдæттæ дæр. Кæрæдзийы фарсмæ балæууын, уæзы хай дæхимæ райсын – æппæт уыцы æууæлтæй кæддæриддæр хъæздыг уыдысты нæ бирæнацион адæм. Мах хъуамæ афтæ кусæм, цæмæй алы хæдзары, алы бинонты ‘хсæн дæр æрбынат кæна циндзинад, фæрныгад. Æрмæстдæр афтæмæй ис республикæйы рæзты тыххæй дзурæн”, – загъта кæронбæттæны Битарты Вячеслав.
Нæ уацх.
Comments are closed, but trackbacks and pingbacks are open.