Республикæ Хуссар Ирыстоны Хицауады Сæрдар Пухаты Эрик ауагъта кусæгон æмбырд, цыран æруынаффæ кодтой республикæйы цæрæн пункттæ нуазыны æмæ донхæргæнæн донæй сифтонг кæныны фарстытыл.
Æмбырды куысты хайад райстой Хицауады Сæрдары хæдивæг-Экономикон рæзты министр Бекъойты Геннади, Хъæууон хæдзарады министр Пухаты Лев, Паддзахадон уагдон «Мелиораци»-йы къухдаруиæггæнæг Хуыгаты Вадим, Геологи, геодези, картографи, экологи æмæ æрдзæй пайда кæныны фæдыл Комитеты Сæрдары хæдивæг Тедеты Батрадз, профилон парламентон комитеты минæ-вæрттæ æмæ æндæр официалон адæм.
Хицауады Сæрдар æмбырды хайадисджытæн бахæс кодта, цæмæй бакусой, хъæутæ донæй сифтонг кæныны фæдыл программæ саразыны фарстыл, кæцы арæзт уыдзæн фидæны азтæн.
«Мах кусæм республикæйы хъæуты доны цухдзинады проблемæ планбæрцæй аскъуыддзаг кæныныл, фæлæ фарст домы комплексон ахаст æмæ мах æввахс бацыдыстæм æххæст програм-мæ саразыны фарстмæ финансон скондимæ. Хъæууон цæрæн пункттæ нуазыны æмæ донхæргæнæн донæй сифтонг кæнын у, мæ хъуыдымæ гæсгæ, республикæйы районты цæрджыты цард фæбæрзонддæр кæныны ахсджиаг фарстатæй сæ иу. Алы хъæуæн дæр ис йæхи геологон хицæндзинæдтæ æмæ йæхи фадæттæ. Кæмдæр хъæуы цъай скъахын, кæмдæр та саразын хъæуы доны канал. Æнæмæнгхъæуæг у информаци æрæмбырд кæнын проблемон цæрæн пунктты фæдыл, ноджы ма иу хатт бынаты анализ скæнын уавæрæн æмæ уæ фæндтæ æрбавдисын Хицауадмæ», – загъта Хицауады Сæргълæууæг.
Хуыгаты Вадимы ныхæстæм гæсгæ, республикæйы ис цыппар донхæргæнæн каналы: Чъехы, Уанаты, Тирипоны, Салтвийы, кæцыты æнæмæнгхъæуæг у æрвылаз дæр кусæгон уавæры дарын, уæлдайдæр быдырон куыстыты рæстæджы. 2019 азы сыгъдæг æрцыдысты каналон донвæдтæ Дменисы хъæуæй суанг Дисеуы хъæумæ, 2020 азы та Арцеуы хъæуæй суанг Присмæ. Куыстытæ дарддæр цæуынц, фæлæ ис техникон ифтонгады цухдзинад.
Хицауады æруынаффæ кæндзысты Паддзахадон уагдон «Мелиораци»-йы техникæйы парк рауæрæхдæр кæныны фарстыл, уый тыххæй фехъусын кодта Пухаты Эрик.
«Æнæмæнгхъæуæг у техникон ресурстæн аргъ скæнын. Кæд æнæмæнгхъæуындзинад фæзына нырыккон бурæгæнæн ифтонгад балхæнынæн, уæд æз цæттæ дæн сымахимæ уыцы фарстыл æруынаффæ кæнынмæ. «Мелиораци»-йы хъæуы фадæттæ донвæд æмæ донхæргæнæн хызæгтæ рауæрæх кæнынæн, кæцытæ аххæсдзысты, доны цухдзинад цы хъæутæ æййафынц, уыдоныл», – банысан кодта Хицауады сæргълæууæг.
Дыууæ къуырийы æмгъуыдмæ профилон уагдæттæ хъуамæ бацæттæ кæной æмæ бавдисой Хицауады Сæрдармæ республикæйы хъæуты донифтонгады инфраструктурæ саразыны фæдыл информацион бæрæггæххæттытæ æмæ фæндтæ.
Comments are closed, but trackbacks and pingbacks are open.