Ивгъуыд къуырийы кæрон Хуссар Ирыстоны паддзахадон университеты кусæгон фембæлд уыд Æнæниздзинад хъахъхъæнын æмæ социалон рæзты министр Джыгкайты Томас æмæ университеты ректор Тедеты Вадимæн. Уый тыххæй нын фехъусын кодтой Æнæниздзинад хъахъхъæнын æмæ социалон рæзты министрады пресс-службæйы.
Тедеты Вадим æмæ Джыгкайты Томас æруынаффæ кодтой æмгуыстад кæныны фарстатыл, афтæ ма цæмæй Хуссар Ирыстоны паддзахадон университеты ауадзой Æхсæнадæмон медицинон конференци.
«Ацы фембæлд уыд ахсджиаг, уымæн æмæ æруынаффæ кодтой æмгуыстад кæныны фæдыл фарстатыл, уыдон нымæцы университеты ахуыргæнджытæ æмæ студенттæн диспансеризаци сорганизаци кæныны фарст æмæ актуалон темæты фæдыл лекцитæ уадзын. Фембæлды кæрон Джыгкайты Томас ныфс бавæрдта, зæгъгæ, кæддæриддæр цæттæ у студенттимæ фембæлынмæ дæр», – банысан кодтой пресс-службæйы.
Нæ уацх.