Нæ республикæйы къухдариуæгад ахуыргæнæн уагдæттæм здахы уæлдай хъусдард. Аразынц сын алыхуызон уавæртæ, цæмæй сæ ахуыры процесс мацæмæй къуылымпы кæна. Ахуырдзауты æдасдзинады фæдыл дæр ист цæуынц алыхуызон мадзæлттæ. Милицийы кусджытæ æрвылрайсом дар фæлæууынц ацы уагдæтты цур æмæ хъахъхъæнынц æхсæнадон фæтк æмæ ахуырдзауты æдасдзинад. Фæлæ уыдон, æвæццæгæн, фаг не сты æмæ æрæджы æрæвнæлдтой скъолаты рæзты æфсæйнаг æмбæндты арæзтадмæ. Уыцы æмбонд æвæрд цæуы тратуарæй машинæты фæндагы ‘хсæн, цæмæй æнæххæст кары сывæллæттæ уой æдасдæр. 12-æм æмæ 9-æм скъолаты раз ныры уонг дæр ахæм æмбонд арæзт уыдис æмæ ныр та æрæвнæлдтой иннæ скъолатæм. Ныридæгæн аразæн куыстытæ цæуынц 6-æм, 2-æм æмæ 5-æм скъолаты раз. Ацы æмбондты арæзтад стыр ахъаз фæуыдзæнис сабиты æдасдзинадæн.
Уымæй уæлдай ма ахуыргæнæн уагдæтты раз æвæрд æрцæудзысты светофортæ фистæг бæлццæттæн. Ныридæгæн дзы цалдæр сæвæрдтой, фæлæ нырма нæ кусынц. Уыдонæн сæ куысты принцип у ахæм, æмæ дæ фæндагæн иннæ фарсмæ ахизын куы бахъæуа, уæд светофоры бын-мæ арæзт кнопкæйыл ныххæц æмæ ма-шинæты змæлд æрлæудзæнис. Фистæг бæлццонæн ис бæрæг рæстæг, цæмæй ахиза иннæ фарсмæ.
Ацы арæзтадон куыстытæ куыд цæуынц, уый фæдыл бæрæггæнæг ацыдысты Мидхъуыддæгты министр Наниты Игорь, Фæндагон змæлды æдасдзинады управленийы сæргълæууæг Джиоты Алан æмæ Цхинвалы цæрæнуатон-коммуналон хæдзарады управленийы хистæр Лалыты Сослан. Уыдон бынаты федтой арæзтад æмæ сæ фæндæттæ бахастой, цæмæй эксплуатацийы рæстæджы къуылымпыдзинæдтæ къаддæр уой. Банысан кодтой, зæгъгæ нырма бирæ бакусын хъæуы ахуырдзаутимæ, цæмæй светофорты куыст уа нывыл. Лалыты Сослан куыд фехъусын загъта, афтæ-мæй ацы мадзæлттæ ист цæуынц программæ «Ӕдас горæт»-ы фæлгæтты.
Уымæй уæлдай ма, Фæндагон змæлды æдасдзинады управленийы хистæры хæдивæг Дзеранты Хох куыд фехъусын кодта, афтæмæй æввахс рæстæджы горæты сног кæндзысты «зебра»-тæ. Уый фæдыл балхæдтой ног хуыз ахорæнтæ, кæцытæ æхсæвыгон дардмæ дæр æрттивынц.
Ахæм светофортæ сæвæрыны хъуыддаг тынг хорз у, бирæ бæстæты дзы пайда кæнынц. Фæлæ уый афтæ нæ нысан кæны, æмæ кæй кæд фæнды, уæд ахиза, – цалдæр адæймагæй куы амбырд уой, уæд хъуамæ иумæ ахизой. Махмæ нырма нæ кусынц, фæлæ мæм афтæ кæсы, цыма уыцы уынгты светофорты скусынæй фæстæмæ машинæтæн азмæлæн нал уыдзæнис. Алчидæр дзы хицæнæй хиздзæнис иннæ фарсмæ. Стæй ма скъоладзаутæм дæр цинау кæсдзæнис æмæ шофырты мæстæй мардзысты. Кæй зæгъын æй хъæуы, ахуырдзаутимæ милицийы кусджытæ профилактикон мадзæлттæ ауадздзысты, бацамондзысты сын светофорæй архайыны æууæлтæ. Фæлæ сывæллæттæм уæддæр хъæудзæнис хъусдарын. Уый фæдыл æнæмæнг хъæуы видеокамерæтæ сæвæрын, цæмæй бæрæг кæной фæткалджыты. Кæннод афтæмæй алы светофоры цур дæр милицийы кусæг хъуамæ лæууа, цæмæй æнæхъуаджы мачи иу кæна светофор æмæ ма халой æхсæнадон фæтк.
ДЖИОТЫ Александр
Comments are closed, but trackbacks and pingbacks are open.