Аивгъуыйгæ къуырийы информацион агентад «Спутник»-ы уагъд æрцыд брифинг нæ Республикæйы Уæлвæткон уавæрты министр Тадтаты Аланы хайадистæй. Брифингы райдианы Тадтаты Алан æрдзырдта, фæстаг къуырийы дæргъы нæ республикæйы æхсæнады цы фарст тыхсын кодта, ууыл. Уый та уыд, 10 боны дæргъы Транскавказы автомагистраль цæгатирыстоны фарс бирæ мит æруарыны фæстиуæгæн æхгæд кæй æрцыд, уый тыххæй. Транскавказы автомагистраль у иунæг фæндаг, кæцы Хуссар Ирыстоны иу кæны йæ стратегион партнер Уæрæсеимæ.
Уый цыбыртæй æрдзырдта æппæт сæвзæргæ уавæры аххосæгты тыххæй æмæ ацы фарст куыд скъуыдзаг æрцыд, уый тыххæй. Республикæ Хуссар Ирыстоны Президены бахæсмæ гæсгæ æппæт сæвзæргæ уавæримæ Транскавказы автомагистраль Цæгат Ирыстоны фарсæрдыгæй йæхæдæг бæрæг кодта Уæлвæткон уавæрты министр Тадтаты Алан. «Нæ республикæйы президенты бахæсмæ гæсгæ, æз бæрæг кодтон, Транскавказы автомагистралыл цæгат фарсæрдыгæй æрвылбондæр цы куыст цыд, уый. Хуссарирыстойнаг фарсæрдыгæй фæндаг мит æруарды фæстæ, фыццаг бонæй фæстæмæ цыд сыгъдæг. Уыцы куыстытæ уым æххæст кодтой «Дорэкспострой»-ы сæрмагонд техникæ. Уыдон куыстой нæ республикæйы Уæлвæткон уавæрты министрады кусджытимæ иумæ», – банысан кодта Тадтаты Алан. Уый куыд фехъусын кодта, афтæмæй фæстаг 10 азы дæргъы уыйас митæруард æмæ уыйбæрц зæйцыдтытæ цæгатирыстойнаг фарс никуы уыд. Транскавказы автомагистралы цæгатирыстойнаг фарсы сæвзæргæ уавæримæ нæ æмбæстæгтæ базонгæ сты, нæ республикæйы паддзахадон телеуынынады журналисттæ бынатæй цы репортажтæ арæзтой, уыдоны руаджы. «Кæй зæгъын æй хъæуы, цæгатирыстойнаг фарсы фæндагсыгъдæггæнджытæ дæр сæ куыст кодтой, фæлæ уыдонæн сæ уæззау техникæ баззад иууыл проблемондæр фадгуыты æмæ сæ бон нæ уыд сæ ракæнын, цæмæй уыцы техникæйы руаджы фæндаг сыгъдæг æрцæуа. Уый фæдыл мах нæ цæгат коллегæтæн фехъусын кодтам, кæй сын баххуыс кæндзыстæм сæрмагонд техникæйæ. Нæ хъуыдыимæ сразы сты уыдон, æмæ уыцы бон, нæ республикæйы фæндагсыгъдæггæнджыты иу къорд æмæ сæрмагонд техникæ – экскаватор æмæ бульдозер арвыстам Транскавказы автомагистралы цæгат фарсмæ. Цалдæр боны дæргъы нæ фæндагон службæйы кусджытæ куыстой фæндаг митæй сыгъдæг кæныныл æмæ се стыр куысты фæстиуæгæн Транскавказы автомагистраль баконд æрцыд. Фæндаг цалдæр боны æхгæд кæй уыд, уый нæ республикæйы цæрджытæй бирæты тыхсын кодта, фæлæ тæссаг уавæрты ахсджиагдæр у адæмы цард æмæ уый тыххæй уыд фæндаг æхгæд. Махæн нæ куыст у баст цардæн тæссаг уавæртимæ, фæлæ уыцы тасмæ нæ кæсгæйæ, нæ кусджытæ цæсгомджы-нæй æххæст кæнынц сæ куыст. Уый фæстиуæгæн нæ республикæйы Хицауады Сæрдар Пухаты Эрикы бахæсмæ гæсгæ, фæндагыл чи куыста, уыдон хъуамæ схорзæхджын кæнæм паддзахадон хорзæхтæй, мах министрад та сæ схорзæхджын кæндзæн ведомствæйон хорзæхтæй» – фехъусын кодта Тадтаты Алан.
Министры ныхæстæм гæсгæ, æнæаххосæй Транскавказы автомагистраль æхгæд никуы уыдзæн. Уый куыд загъта, афтæмæй Республикæ Хуссар Ирыстон æмæ Цæгат Ирыстоны хицауадты æмвæзадыл дыууæ министрадæн арæзт ис иумиаг архайдты план. Уыцы планмæ гæсгæ хуссарирыстойнаг æмæ цæгатирыстойнаг уæлвæткон уавæрты министрадты кусджытæ сæ куыст феххæст кæнынц Росавтодор æмæ Гидрометимæ зæйтæ æрцæуыны ныхмæ. «Мах ацы ведомствотимæ кусæм иумæ æмæ боныгъæдмæ гæсгæ нæ куыст феххæст кæнæм. Уæрæсейы Уæлвæткон уавæрты министр Цæгат Ирыстонмæ кусæгон балцы рæстæджы ауагъта йæ дæлбар ведомствойы кусджытæн æмбырд, цыран хайад райстой Росавтодоры кусджытæ.Уыцы рабадты рæстæджы дзырд цыд, цæмæй æнæхъæн аз æппыныдзухæй куса Транскамы автомагистраль. Уый тыххæй арæзт хъуамæ æрцæуа 4 километры дæргъæн галерея. Уæрæсейы Федерацийы Хицауады æмвæзадыл арæзт æмæ куыст цæуынц ацы проекты реализацийы документыл æмæ æмбæлон службæтæ та фарст скъыддзаг кæндзысты галерея саразыны фæдыл. Республикæ Хуссар Ирыстоны Президент æмæ Уæрæсейы Федерацийы Президенты фембæлды рæстæджы баныхас кодтой медицинон модулимæ паддзахадон материалон резерв саразын æмæ уæл-вæткон уавæрты рæстæджы вертолет радтын Хуссар Ирыстонæн. «Ивгъуыд азы кæрон мæнæн уыд фембæлд мæ уæрæсейаг коллегæ Евгений Зиничевимæ, нæ фембæлды рæстæджы мах къухтæ бафыстам Республикæ Хуссар Ирыстон æмæ Уæрæсейы Федерациимæ сразыдзинадыл, цыран дзырд цæуы уæлвæткон уавæрты фæстиуæгæн паддзахадон æмæ материалон базæ саразын æмæ медицинон модулимæ вертолет райсын. Ацы фарсты материалон резерв дих æрцыд 3 этапыл. Фыццаг этапы арæзт хъуамæ æрцæуой проектон-сметон документаци, дыккаг этапы – 2020 азы арæзт цæудзысты æфтауцдæттæ æмæ æртыккаг этапы та 2021 азы ифтонг хъуамæ æрцæуой æппæт хъæуæг æрмæджытæй» -банысан кодта Тадтаты Алан. Уый ма куыд загъта, афтæмæй цалынмæ вертолет райсыны фарст скъуыддзаг не ‘рцыд, уæдмæ Хуссар Ирыстон уæлвæткон уавæрты рæстæджы йæ бон у æххуыс æркура вертолет сæ уæрæсейаг коллегæтæй. Абоны онг Хуссар Ирыстоны ис сæрмагонд фæзуæттæ, цыран йæ бон у æмæ æрбада сæрмагонд борт.
Танделаты Виленæ
Comments are closed, but trackbacks and pingbacks are open.