Мидхъуыддæгты министрады къухдариуæгад министры хæстæ рæстæгмæ æххæстгæнæг Пухаты Мерабы сæргълæудæй æмæ милицийы сæрмагонд нысаниуæджы къорды рæнхъон сконд сæ командир Плиты Игоры сæргълæудæй дидинджытæ æмæ веноктæ сæвæрдтой, ТЕК-ы цы цыртдзæвæн ис, уым. Ам 1992 азы гуырдзиаг фашистты ныхмæ хъазуатон тохты фæмардысты спецкъорды кусджытæ æхсæзæй. Цалдæрæй та дзы уæззау цæфтæ фесты, уыдоны нымæцы Пухаты Мераб дæр.
Не знæгтæ хъавыдысты ауылты Цхинвалмæ ныббырсынмæ, фæлæ сын нæ хъæбатыр хæстонтæ аккаг ныхкъуырд кæй радтой, уый фæстиуæгæн сæ фæндтæ фæсыкк сты. Фæлæ ацы ран æнустæм баззадысты æрыгон лæппуты удтæ, кæцытæ алцы-дæр сарæзтой сæ адæмы бахъахъхъæныны тыххæй. Ирон адæмæй рох хъуамæ макуы уой Гæбæраты Станислав, Гуыбаты Зураб, Дзабиты Геннади, Кожухов Юри, Михайленко Александр æмæ Санахъоты Григорийы рухс нæмттæ.
«Ӕрвылаз дæр 7 июны мах ссæуæм ацы цыртмæ æмæ æрымысæм нæ хæстон æмбæлтты нæмттæ. Ахæм цыртытæ нæм, хъыгагæн бирæ ис, фæлæ махæн нæ хæс у, цæмæй сæ ма рох кæнæм. Кæстæр фæлтæртæн дæр хъуамæ амонæм æмæ æмбарын кæнæм, цæхæм фыдвæндæгтыл рацыдысты Ирыстоны адæм æмæ кæй фæрцы стæм ныр сæрыгас, уыдоны. Цалынмæ сæ хъуыды кæнæм, уæдмæ уы-доны нæмттæ дæр цæрдзысты», – банысан кодта Плиты Игорь.
ДЖИОТЫ Александр
Comments are closed, but trackbacks and pingbacks are open.