Инциденттæ ма æруадзын æмæ сæм хъусдард здахыны фæдыл механизмты форматы дунеон организациты минæвæртты хайадистæй Хуссар Ирыстон æмæ Гуырдзыстоны минæвæрттæн фадат ис сæвзæргæ инциденттæ, паддзахадон арæнты уавæр æмæ æндæр æрцæугæ цаутыл æмæ сæйраг та – æдасдзинады фарстыл æруынаффæ кæнынæн. Бæрæг куыд у, уымæ гæсгæ дæргъвæтин рæстæджы нæ ивы механизмты куысты фæтк.
Хуссар Ирыстонæй делегацийы сæргълæууæг, Фæсконфликтон фарстатæ бæстонкæныны фæдыл РХИ-йы Президенты Æххæстбарджын минæвары хæдивæг Коцты Егор механизмты радон фембæлдæн хатдзæгтæ аразгæйæ банысан кодта, ацы форматы фæлгæтты регионы æдасдзинады фарст сæйраг кæй у. Ацы фарсты фæдыл Хуссар Ирыстоны позици у æнæаивгæ – Гуырдзыстон хъуамæ аиуварс кæна полицийæгты æнæзакъонон пост æмæ уыцы районы цы хотыхджын баиугæндтæ ис, уыдон уырдыгæй ацæуой.
Коцты Егор куыд банысан кодта, уымӕ гӕсгӕ 6 ноябры Хуссар Ирыстон ӕмӕ Гуырдзыстоны ӕхсӕн паддзахадон арӕнтыл цы инцидент ӕрцыд, ууыл бирӕ дзырд цыд Инциденттӕ ма ӕруадзын ӕмӕ сӕм хъусдард здахыны фӕдыл механизмты радон рабадты. Инцидент уыд афтӕ – паддзахадон арӕнтӕ чи фехӕлдта, уыцы Гуырдзыстоны ӕмбӕстаджы ӕруромыны рӕстӕджы уый спайда кодта хӕцӕнгарзӕй, цӕй фӕстиуӕгӕн фӕцӕф ӕмӕ уый фӕстӕ фӕмард.
Цӕмӕй ахӕм цаутӕ фӕлхатт мауал ӕрцӕуой, уый тыххӕй Хуссар Ирыстоны фарс бирӕ хӕттыты фехъусын кодта, кӕй хъӕуы уадзын профилактикон мадзӕлттӕ паддзахадон арӕнтыл. Уымӕн ӕмӕ хӕлд цӕуынц ӕппынӕдзух гуымир ӕгъдауӕй. Ахӕм цаутӕ фылдӕр хынцыд цӕуынц Цхинвалы районы Громы хъӕумӕ ӕввахс. Уӕлдӕрзагъдгонд инцидент дӕр ӕрцыд ацы цӕрӕн пунктмӕ хӕстӕг. Уымӕй та бӕрӕг у уый, ӕмӕ Гуырдзыстоны фарсӕрдыгӕй арӕнты фӕткхалыны цаутӕ ӕмӕ провокацион архӕйдтытӕ ацы районы сты тынг бирӕ.
Делегацийы сӕргълӕууӕджы ныхӕстӕм гӕсгӕ хуссарирыстойнаг фарс «тӕвд хаххы» ӕмӕ механизмты фембӕлтыты руаджы рӕгъмӕ хӕссы ацы проблемӕтӕ ӕмӕ амоны, ӕнӕмӕнгдӕр кӕй хъӕуы информацион куыст кӕнын гуырдзиаг фарсы цӕрджытимӕ, уымӕн ӕмӕ сӕ фӕткхалӕн цаутӕн дарддӕр дӕр уыдзӕн серьезон фӕстиуджытӕ.
Хъыгагӕн, зӕгъгӕ, нӕ фӕдзӕхстытӕ гуырдзиаг фарс мурмӕ дӕр не рдардта, ӕмӕ ӕрцыд ахӕм цау. Ацы хъуыддагмӕ гуырдзиаг фарс ӕмбӕлон хъусдард куы аздӕхтаит, уӕд уыцы ӕнамонд цау дӕр не ‘рцыдаит.
РХИ-йы Президенты Ӕххӕстбарджын минӕвары хӕдивӕджы ныхӕстӕм гӕсгӕ арӕнхъахъхъӕнджытӕ хӕцӕнгарзӕй кӕй спайда кодтой, уымӕй, зӕгъгӕ, уыдон архайдтой инструкцимӕ гӕсгӕ, кӕцытӕ архайынц ӕмӕ уӕвынад кӕнынц дунейы фылдӕр бӕстӕты.
Абоны онг дӕр ахсджиаг у полициӕгты ӕнӕзакъонон посты уӕвынад
Механизмты фӕлгӕтты цы ахсджиаг фарстытӕ рахаста рӕгъмӕ хуссарирыстойнаг фарс, уыдонӕй сӕйраг у Хуссар Ирыстоны территорийыл Уисты хъӕуы цы гуырдзиаг ӕнӕзакъонон полициӕгты пост уӕвынад кӕны, уый. Уымӕй дарддӕр ма уынаффӕ цыд ӕдасдзинады ӕмӕ гуманитарон фарстатыл дӕр. Ацы фарсты фæдыл Хуссар Ирыстоны позици у æнæаивгæ – Гуырдзыстон хъуамæ аиуварс кæна полициæгты æнæзакъонон пост æмæ уыцы районы цы хотыхджын баиугæндтæ ис, уыдон уырдыгæй конд æрцæуой. Хуссар Ирыстон æндæргъуызон фадæттæ нæ уыны ацы фарст æрбæстон кæнынæн.
Куыд зонӕм, уымӕ гӕсгӕ Хуссар Ирыстоны уӕлдӕфон тыгъдад ӕппынӕдзух хӕлд цӕуы Гуырдзыстоны фарсӕрдыгӕй. Уыцы фарст дӕр рӕгъмӕ хаст цӕуы иу фембӕлдӕй иннӕмӕ.
«Хуссарирыстойнаг делегаци ӕрвылхатт дӕр сиды гуырдзиаг фарсмӕ, цӕмӕй уадзой профилактикон мадзӕлттӕ ӕмӕ Гуырдзыстоны ӕмбӕстӕгтӕ кӕдӕй уӕдмӕ мауал халой паддзахадон арӕнты фӕтк ӕмӕ уыимӕ баст провокацион архӕйдтытӕ», – банысан кодта уый.
Информацион фӕрӕзтӕ дӕр хайад хъуамӕ исой механизмты куысты
Фебӕлдӕн хатдзӕгтӕ аразгӕйӕ ма делегацийы сӕргълӕууӕг банысан кодта, зӕгъгӕ, Женевӕйы уагъдцӕуӕг дунеон дискусситы радон рабадты хуссарирыстойнаг фарс рӕгъмӕ рахӕсдзӕн Инциденттӕ ма ӕруадзын ӕмӕ сӕм хъусдард здахыны фӕдыл механизмты форматы куыстмӕ информацион фӕрӕзтӕ уагъд кӕй нӕ цӕуынц, уыцы фарст, уымӕн ӕмӕ уый цӕлхдуртӕ ӕвӕры информаци парахат кӕнынӕн.
«Мӕн фӕнды гуырдзиаг информацион фӕрӕзтимӕ ныхас кӕнын дӕр, цӕмӕй хуссарирыстойнаг фарсы хъуыды хӕццӕ кӕна Гуырдзыстоны цӕрджытӕм дӕр», – дзырдта уый.
Коцты Егор ма куыд банысан кодта, уымӕ гӕсгӕ кӕддӕриддӕр цӕттӕ у куыд хуссарирыстойнаг, афтӕ гуырдзиаг ӕмӕ дунеон информацион фӕрӕзтимӕ ныхас кӕнынмӕ.
КЪӔБУЛТЫ Маринӕ
