Ахæм дзырдтимæ райдыдта æрæджы, Хуссар Ирыстоны информаци æмæ мыхуыры паддзахадон комитеты йæ пресс-конференци Хетæгкаты Къостайы номыл Хуссар Ирыстоны паддзахадон драмон театры директор Уалыты Мæдинæ. Уый банысан кодта, зæгъгæ, ирон адæм уарзынц театр æмæ ног театр кæй сырæзт, кæй скуыста, уый нæ адæмæн у стыр лæвар.
Ацæугæ азы театры къухты цахæм æнтыстытæ бафтыд, уыдон тыххæй та Мæдинæ банысан кодта, зæгъгæ, коллектив уыдысты Ульяновск, Луганск, Майкоп, Налцыкк æмæ æндæр горæтты. Стыр программæимæ нæ артисттæ ралæууыдысты Цæгат Ирыстоны сæйраг горæт Дзæуджыхъæуы ирон сценæмæкæсджыты раз. Мæдинæ æхсызгондзинады æнкъарæнтимæ банысан кодта, зæгъгæ, нæ алы ран дæр райстой мидбылхудтимæ, алы ран дæр нæ артисттæн кодтой дæргъвæтин къухæмдзæгъд. Мыхуыры фæрæзты кусджытæ йæм радтой, цы фарстытæ сæ цымыдис кæны, уыдон.
– Мæдинæ, цины æнкъарæнтимæ банысан кодтай, театр арæзт кæй æрцыд æмæ йæ куыст кæй райдыдта, уый. Зæгъ-ма, цахæм цухдзинæдтæ дзы баййæфтат?
– Йæ арæзтадон куыстытæ дæргъвæтин кæй уыдысты, уый тыххæй адæмы ‘хсæн апарахат алыгъуызон хъуыдытæ, фæлæ уыдон се ‘ппæт раст нæ уыдысты. Æз дзы нæ федтон, артисты куыстыл мæгуырауæрдæм чи бандава, рæгъмæ кæй рахæссон, ахæм цухдзинæдтæ. Ис æмæ уыдзæнис чысыл хъæндзинæдтæ æмæ куыд æргом кæной, афтæ иуварс цæудзысты. Æнæуый та йæ арæзт, куыд æддейæ, афтæ мидæгæй дæр у, адæймаг тынг кæуыл бацин кæна, йæ зæрдæ цæмæй барухс уа, ахæм.
– Æрдзырдтай, театр кæмыты уыд, спектакльтæ кæмыты равдыста, уыцы бынæтты тыххæй, зæгъ-ма мæскуыйаг театрты коллективтæй нæм исгæцы æрцæуинаг у?
– Кусын куы райдыдтон, уæд мæ фыццаг аскъуыддзаг кæнын цы фарстатæ фæндыд, уыдонæй иу уыд ацы фарст. Фарст нæу, бынтон æнцонæй кæй аскъуыддзаг кæнай, ахæм. Цы фарстытæ сæвзæрд, уыдоныл куыст цæуы æмæ мæ уырны, тагъд, гæнæн ис æмæ ацы аз дæр, ирон сценæмæкæсджытæ базонгæ уой мæскуыйаг зындгонд театры артистты архайдимæ. Æввахс рæстæджы Цхинвалмæ æрцæудзæнис Мæскуыйы театртæй иуы аивадон къухдариуæггæнæг А. Карягин. Цы фарстытæ аскъуыддзаг кæнæм, уыдон цæудзысты æххæст.
-Ацæугæ аз театры коллективы уæнгтæ фæфылдæр сты æви нæ?
– Фæфылдæр сты. Æрбакодтам æртæ ног артисты. Райстам сæ сфæлдыстадон советы фæндонмæ гæсгæ. Цæмæй кадрты фарсты фæдыл зындзинæдтæ ма уа, уый тыххæй, ацы аз нæ театры скусдзæнис артисттæ цæттæгæнæн студи, фæахъаз уыдзæнис театры артистты фæлтæрддзинад фæхуыздæр кæнынæн дæр.
– Дзырд цыдис, зæгъгæ, Хуссар Ирыстоны паддзахадон университеты конд æрцæудзæнис театралон факультет. Ацы фарст цы стадийы ис?
– Цæуы йыл куыст. Куыд университеты факультет, афтæ нæ театры студи дæр ахъаз уыдзысты артистты фæлтæрддзинад фæхуыздæр кæнынæн. Куы скусой, уæд, кæрæдзийæн æххуысæй дарддæр, зиан ницы хæсдзысты.
– Зæгъ-ма, хистæр фæлтæртæ куыд райстой, ногæй уæм чи æрбацыд, уыдоны, æмткæй цахæм æмбарындзинад ис артистты ‘хсæн?
– Афтæ мæм кæсы, æмæ сфæлдыстадон коллективты, уæлдайдæр та театры артистты ‘хсæн никуы вæййы мæгуырау ахастытæ. Се ‘хсæн бæрзонд æмвæзадыл æвæрд у кæрæдзиæмбарынад, зонынц кæрæдзийæн аргъ кæнын, исгæй се ‘ххуыс куы бахъæуы, уæд нæ базивæг кæнынц.
– Ацы аз ирон адæмы фыццаг геноцидыл æххæст кæны 100 азы. Театр цахæм мадзæлдтæ цæттæ кæны æмæ сценæйыл æвдыст цы æрцæудзæнис?
– Ацы аз нæ сæйрагдæр хæстæй иу у, цæмæй ирон сценæмæкæсæджы размæ рахæссæм æмæ йын æрымысын кæнæм, нæ фыдæлтæ 1920 азы цы хъизæмæрттæ бавзæрстой, уыдон. Ацы фарсты фæдыл театры аивадон совет ауагъта цалдæр рабадты. Цы фарстытæ аскъуыддзаг кодтам, уыдон æххæст цæудзысты азы фæудмæ.
– Зæгъ-ма, театр ацы аз цал сценæмæкæсæджы райста?
– Театралон сезон байгом сентябры мæйы. Уæдæй нæм азы фæудмæ æрбацыд аст мин сценæмæкæсæгæй фылдæр. Театры спектаклтæ цæуынц синхронон тæлмац æмæ нæ сценæмæкæсджыты ‘хсæн дзæвгар вæййы уырыссаг æмæ æндæр нациты минæвæрттæ. Сценæмæкæсджыты уавæртæ кæнынц хуыздæрæй хуыздæр. Æрæджы байгом кодтам «Сабиты хатæн». Театрмæ сабитимæ чи æрбацæуа, уыцы ныййарæг, гæнæн ис æмæ йæ саби ныууадза ацы хатæны æмæ йæхæдæг æдыхстæй бакæса спектаклмæ. «Сабиты хатæн»-ы кусынц, сывæллæтимæ куысты стыр фæлтæрддзинад кæмæ ис, ахæм кусджытæ. Уымæй дарддæр ма хатæн ифтонг у æнæ-мæнгхъæуæг хъазæнтæ æмæ ифтонггæрзтæй.
Гæззаты Иван
Comments are closed, but trackbacks and pingbacks are open.