Цалдæр боны размæ Хетæгкаты Къостайы номыл Паддзахадон драмон театры æвдыст æрцыд спектакль «Фатимæ». Театруарзджытæ тынг райгондæй баззадысты спектаклæй, æмдзæгъд сын кодтой лæугæйæ æмæ театры сфæлдыстадон коллектив райста бирæ бузныджы ныхæстæ.
Театры директор Уалыты Мадинæ æмæ йæ аивадон къухдариууæгæнæг Дзудцаты Тамерлан фæуазæг сты Информаци æмæ мыхуыры комитеты пресс-центрмæ æмæ дзыллон информацийы фæрæзтæн радзырдтой сæ дарддæры куысты плæнтты тыххæй. Фыцца-джыдæр уал фехъусын кодтой, 21 æмæ 22 февралы ногæй æвдыст кæй æрцæудзæн спектакль «Фатимæ».
Дзудцаты Тамерлан куыд загъта, афтæмæй ныридæгæн куыст цæуы цалдæр спектаклыл æмæ та тагъд рæстæджы барухс кæндзысты нæ театруарзджыты зæрдæтæ. «Хъуамæ сног кæнæм Мамсыраты Дæбейы пьесæ «Ӕфхæрдты Хæсанæ», кæцыйы режиссер уыдзæн Бекъойты Розæ. Стæй ма æввахс рæстæджы равдисдзыстæм Уалыты Гивийы æвæрд комеди «Инæлартæ къабаты». 20 февралы та æвдыст æрцæудзæн комеди «Рæстæгмæ ус» кæцы тынг популярон у нæ театруарзджыты æхсæн. Тынг бирæ плæнттæ нæм ис, фæнды нæ бирæ ног спектаклтæ равдисын нæ адæмæн, цæмæй та раздæрау æнæ-зивæгæй цæуой театрмæ», – банысан кодта Дзудцаты Тамерлан.
«Нæ театры ис бирæ хорз режиссертæ æмæ сын нырæй фæстæмæ уыдзæн фадат сæ курдиат ирдæй равдисынæн. Ис нын диссаджы бæстыхай, ис нæм тынг хорз актертæ. Ӕрмæст ма нæ хъæуы иузæрдионæй кусын. Хицауады æрдыгæй дæр нæм ис æмбæлон хъусдард. Ныридæгæн иууылдæр стæм куыстыл ифтонг. Хъæцмæзты Фатимæ æмæ Чилæхсаты Эдуард кусынц хицæн æмæ хицæн спектаклтыл. Нæ чысыл сабитæн та цæттæ кæнæм аргъау «Ныфсджын куыдз», – зæгъы Дзудцаты Тамерлан.
Театры аивадон къухдариуæггæнæджы ныхæстæм гæсгæ стыр куыст цæуы нæ театры сценæйыл «Скифтæ-сæрмæттæ-аланты трилоги» сæвæрыныл, кæцыйы хъуамæ ирдæй æвдыст æрцæуой нæ фыдæлты цард æмæ æгъдæуттæ. 2020 азы 100 азы æххæст кæны 1920 азы ирон адæмы геноцидыл æмæ уый фæдыл театры сфæлдыстадон коллективы фæнды театры сценæйыл равдисын пьесæ «13 коммунары». Стæй ма ацы аз у Хетæгкаты Къостайы аз, æмæ йын йæ райгуырды бонмæ бацæттæ кæндзысты сæрмагонд равдыст. Октябры мæйы ма сæ фæнды фестиваль «Кавказский дом» ауадзын дæр.
«Мах фæндон рахастам, цæмæй Дзудцаты Тамерлан бавдыст æрцæуа Хетæгкаты Къостайы номыл премимæ, уымæн æмæ стыр куыст бакодта спектакль «Фатимæ» сæвæрыныл æмæ у нæ культурæйы зынгæ архайæг», – банысан кодта Уалыты Мадинæ.
Ӕввахс рæстæджы ма равдисдзысты спектакль «Ныййарæджы кадæг», кæцыйы сæйраг ролы ахъаздзæн Хуссар Ирыстоны адæмон артисткæ Галуанты Людæ æмæ ма йын цытджын æгъдауæй банысан кæндзысты йæ юбилей дæр.
Уымæй уæлдай ма театры къухдариуæгады фæнды, цæмæй-иу Уæрæсейæ æрхоной зынгæ режиссерты æмæ актерты. Уый стыр ахъаз фæуыдзæн театры сфæлдыстадон коллективæн сæ дарддæры рæзты.
«Хицауады æрдыгæй нæм ис аккаг хъусдард, исты хъуыддаджы фæдыл сæм куы бахатæм, уæд нын нæ къух саразынц. Ахæм ахаст нæм кæй ис нæ республикæйы къухдариуæгады æрдыгæй, уый нын у тынг æх-сызгон, – зæрдæ райы куыстмæ. Ис нын алы уавæртæ дæр, цух ницæмæй стæм. Ӕгæрыстæмæй ма театрмæкæсджы-тæн ис тæлмацгæнæн аппарат дæр, цæмæй æндæр нацийы минæвæрттæ дæр кæсой ирон æвзагыл спектаклтæм», – зæгъы Уалыты Мадинæ.
Ӕмæ, æцæгæйдæр, стыр æххуыс кæны театры сфæлдыстадон коллективæн бæс-тæйы Президент Бибылты Анатоли. Премьерон спектакль «Фатимæ»-йы равдысты хæдразмæ сын балæвар кодта 50 театралон биноклы. Уыдон та стыр æххуыс фæуыдзысты, театрмæ кæсгæйæ дæрддзæф бынæтты чи бада, уыдонæн. Стæй сын сæ проблемон фарстатæ аскъуыддзаг кæнынæн дæр феххуыс кæны Президент, сæ фарсмæ балæууы тыхст рæстæджы. Ахæм иттæг хорз уавæрты кусгæйæ, мах, театрдзаутæ, та æнхъæлмæ кæсæм бирæ хорз спектаклтæм.
Джиоты Александр
Comments are closed, but trackbacks and pingbacks are open.