Нӕ республикӕйы ахуыргӕнӕнӕн уагдӕтты айзӕлыдысты фыццаг дзӕнгӕрӕджы зӕлтӕ ӕмӕ та уыцы зӕлланг уынӕртимӕ райдыдта ног ахуыры аз. Беслӕны ӕвирхъау трагедийы фӕстиуӕгӕн ныр дыккаг аз Хуссар Ирыстоны скъолаты дӕр Зонындзинæдты бон нысан кӕнынц 5-ӕм сентябры. Ӕвӕццӕгӕн ацы хъуыддаг раздӕр хъуыдис саразын. Уымӕн ӕмӕ дыууӕ Ирыстоны дӕр 2004 азӕй фӕстӕмӕ сентябры фыццаг бонтӕ зӕрдӕриссӕн сты ӕмӕ ӕрвылаз дӕр фыдохы мадзӕлттӕ фӕуадзӕм, ӕмӕ ма уыцы бонты бӕрӕгбоныл та цахӕм зӕрдӕйы уагимӕ хъуамӕ ӕмбӕлӕм.
Рагӕй фӕстӕмӕ нӕм баззадис ахӕм традици, ӕмӕ ног ахуыры аз байгом кӕныны бон алы ахуырадон уагдонмӕ дӕр сфидар кӕнынц бӕрнон кусджыты.Уыдон скъоладзаутӕм бацӕуынц зӕрдылдарӕн лӕвӕрттимӕ ӕмӕ сын раарфӕ кӕнынц сӕ бӕрӕгбоны цытӕн.
Йӕ дуӕрттӕ байгом кодта рӕзгӕ фӕлтӕрӕн Знауыры районы Балтайы хъӕуы астӕуккаг скъола дӕр. Ацы скъолайы ис 12 ахуырдзауы, дыууӕйӕ дзы сты фыццагкъласонтӕ. Сӕ бӕрӕгбонӕн сын арфӕйы ны-хӕстӕ зӕгъынмӕ хъуамӕ фӕуазӕг уыдаид Мид-хъуыддӕгты министр Наниты Игорь, фӕлӕ бӕрӕг аххосӕгтӕм гӕсгӕ йӕ бон не ссис ӕрбацӕуын. Фӕлӕ скъоладзаутӕ рохуаты нӕ баззадысты, – йӕ бӕсты бӕрӕгбонон мадзалмӕ фӕуазӕг сты министры уынаффӕгӕнӕг Багаты Марат ӕмӕ милицийы Экономикон фыдракӕндты ныхмӕ тох кӕныны управленийы сӕргълӕууӕг Санахъоты Сослан. Уыдон Наниты Игоры номӕй раарфӕ кодтой ӕрӕмбырдуӕвджытӕн ӕмӕ скъолайæн балӕвар кодтой теннисӕй хъазӕн стол.
Знауыры районы ис 8 скъолайы, кӕцыты ӕдӕппӕт ахуыр кӕны 300 бæрц ахуыргӕнинаджы. Ацы аз фыццаг къласмӕ бацыдысты 20 скъоладзауы. Банысан кӕнын хъӕуы уый, ӕмӕ ацы 20 фыццагкъласонӕй 10 кӕй сты Знауыры астӕуккаг скъолайӕ.
Горӕты ӕртыккӕгӕм скъолайы бӕстыхай аварион уавӕры кӕй ис, уый фӕдыл ахуырдзаутӕн уроктӕ уадзынц горӕты дыууадӕсӕм скъолайы бӕстыхайы. Фӕлӕ уымӕ нӕ кӕсгӕйӕ фыццаг дзӕнгӕрӕджы бон банысан кодтой сӕ зӕронд бӕстыхайы кӕрты.
Ленингоры район у дӕрддзӕф ӕмӕ бирӕ рӕстӕг Гуырдзыстоны паддзахады юрисдикцийы бын кӕй уыдис, уымӕ гӕсгӕ ам 2008 азы хӕсты фӕстӕ бирӕ зындзинӕдтӕ ӕвзӕрстой ахуыргӕнӕн уагдӕттӕ. Ирон ӕмӕ уырыссаг ӕвзӕгтӕ ацы скъолаты уыдысты проблемон куыд скъоладзаутӕн, афтӕ ахуыргӕнджытӕн дӕр. Фӕлӕ бирӕ алыхуызон мадзӕлттӕ райсыны фӕстиуӕгӕн уавæр сабыргай хуыздӕр кӕны ӕмӕ ныр районы ахуыргӕнӕн уагдӕтты ахуыры ӕмвӕзад фӕбӕрзонддӕр. Ӕдӕппӕт районы ис 9 скъолайы, фӕлӕ дзы ахуырдзаутӕ бирӕ нӕй – 220 скъоладзауы бӕрц. Уыдонӕй 24 сты фыццагкъласонтӕ. Хӕсты размӕ бӕрӕг фылдӕр уыдис сӕ нымӕц. Зӕгъӕм, Къоринтайы астӕуккаг скъолайы ныр ахуыр кӕны 5 скъоладзауы ӕмӕ 2008 азы хӕдразмӕ та ам ахуыр кодта 70 скъоладзауы бӕрц. Хӕсты фӕстӕ уыдон алыгъдысты Гуырдзыстонмӕ ӕмӕ нал ӕрбаздӕхтысты. Ахуырады министрады ‘рдыгӕй ис ӕмбӕлон хъусдард, ифтонг сӕ кӕнынц алцӕмӕй дӕр. Ардӕм сӕм фыццаг дзӕнгӕрӕджы бӕрӕгбонмӕ фӕуазӕг ис Мидхъуыддӕгты министрады Штабы сӕргълӕууӕг Кокойты Тарзан ӕмӕ сын арфӕйы ныхӕстӕ загъта ног ӕрлӕугӕ ахуыры азы фӕдыл.
Цхинвалы районы Сатихъары хъæуы астӕуккаг скъолайы дӕр бӕрӕгбонон мадзалмӕ сæхи бацӕттӕ кодтой. Ардӕм сӕм фӕуазӕг сты Мидхъуыддӕгты министрады Слестгӕнӕн управленийы сӕргълӕууӕг Тадтаты Петр ӕмӕ Цхинвалы районы администрацийы сӕргълӕууӕджы хӕдивӕг Бибылты Валери. Ис дзы 18 ахуырдзауы, фæлæ дзы фыццагкъласонтæ нæй. Скъолайы директор Уазæгты Ритæ куыд фехъусын кодта, афтæмæй скъоладзаутæн ис иттæг хорз уавæртæ ахуыр кæнынæн.
Мидхъуыддæгты министры хæдивæг Марданты Спартак та фæуазæг ис Дзауы районы Хуыцъейы хъæуы астæуккаг скъоламæ æмæ сын зæрдиаг арфæтæ ракодта сæ бæрæгбоны цытæн. 18 скъола-дзауы ахуыр кæны ацы скъолайы, фыццаг къласмæ сæм æрбацыдис иу ахуырдзау. Дзауы районы, иннæ районтæм абаргæйæ, кæд къаддæр скъолатæ ис, уæддæр скъоладзауты нымæц фылдæр у. Ацы районы скъолаты ахуыр кæны 500 ахуырдзауæй фылдæр, 50 бæрц та сæм ис фыццагкъласонтæ.
Кæд Цхинвалы скъолаты ахуырдзауты нымæц ахызтис 5 минæй, уæд районты скъолаты æдæппæт ис 1 200 ӕввахс ахуырдзауы. Ӕмæ афтæ зæгъæн нæй, æмæ хъæууон скъолатæ æнæркаст сты. Хорз уавӕртӕ ис районты скъолатӕн ахуырадон процесс ӕнӕкъуылым-пыйӕ уаддзынӕн, фӕлӕ, хъыгагӕн, ахуыргӕнинӕгтӕй цух ӕййафынц.
ДЖИОТЫ Александр
Comments are closed, but trackbacks and pingbacks are open.