15-æм февралы информацион агентад «Спутник-Хуссар Ирыстон»-ы пресс-центры нæ республикæйы Информаци æмæ мыхуыры паддзахадон комитеты сæрдар Хъотайты Марияйæн радон брифинг уыдис Хетæгкаты Къостайы номыл Хуссар Ирыстоны паддзахадон драмон театры аивадон къухдариуæггæнæг, режиссер Дзудцаты Тамерланимæ.
Брифингы райдианы Хъотайты Мария журналистты зæрдыл æрлæууын кодта, ге-ниалон классик Хетæгкаты Къостайы æнæмæлгæ уацмыс «Фатимæ»-мæ гæсгæ æвæрд спектакль 40 азы фæстæ ногæй æвæрд кæй æрцыдис, ногæй кæй байгом кодтам, нæ уыцы культурон артдзæст – театры фæрнджын сценæйыл. Ацы цаумæ æнæрхъæцæй æнхъæлмæ кастысты æппæт Хуссар Ирыстоны æмбæстæгтæ, уæлдайдæр та – аивад æмæ театрæн табугæнджытæ. Уыдонæй алкæй дæр тынг фæндыдис спектакльмæ бахауын æмæ куыд рабæрæг, афтæмæй уайтагъд æлхæд æрцыдысты билеттæ дæр. Театрдзаутæй алкæй дæр цымыдис кодта, зæгъгæ, куыд æвæрд у спектакль æмæ театры артисттæ та куыд сарæхстысты Къостайы поэмæ «Фатимæ»-йы.
Дзудцаты Тамерлан дæр сразы ис ацы хъуыдыимæ æмæ брифингы цыбыртæй æрдзырдта йæ куысты фæстиуджытыл æмæ спектаклы тыххæй, афтæ ма сын дарддæр цы плæнттæ ис, æппæт уыдæттыл.
Театры аивадон къухдариуæггæнæг радзырдта 14-æм февралы фыццаг къорды артисттимæ спектакль куыд ацыдис æмæ йыл адæм куыд зæрдиагæй сæмбæлдысты, уый тыххæй. «Сценæмæкæсджытæ сæхи куыд дардтой, ома, сæ реакцимæ гæсгæ зæгъæн ис уый, æмæ алцыдæр хорз кæй уыдис. Режиссер кулисæты фæстæ куы вæййы, уæд йæ бон нал вæййы, сценæйыл цы архайд фæцæуы, ууыл бандавын. Уымæн æмæ уый раздæр алцыдæр сарæзта. 5-6 спектаклы фæстæ та бакæсын хъæуы ногæй спектаклмæ, уæд йæ гаччы æрбады æмæ куыд хуыздæр уа, куыд хъуамæ уа, афтæ йæ хъæуы рацаразын», – загъта спектаклы режиссер.
Йæ ныхæстæм гæсгæ артисттæ къаддæр нæ тыхстысты, спектакль куыд ацæудзæнис, уый тыххæй. Уымæн æмæ сæ алчидæр æнкъардта стыр бæрндзинад. «Иуæй – ног театралон сезон кæй байгом ногарæзт бæстыхайы, аннæмæй – уый уыдис ирон æвзаг æмæ литературæйы бындурæвæрæджы уацмыс æмæ сæ йæхицæн уыцы бар ничи лæвæрдта, цæмæй ахъазыдаид сценæйыл æвзæр. Фæлæ уыимæ иумæ кæй тыхстысты, уый дзы уæддæр бæрæг уыдис», – банысан кодта брифингы уазæг.
Дзудцаты Тамерлан ма куыд радзырдта, афтæмæй хуссарирыстойнаг театры сценæ-йыл фыццаг хатт иу спектаклы кæй сæххæст кæндзысты дыууæ къорды артисттæ. Уый куыд загъта, уымæ гæсгæ йæм ацы хъуыды фæзындис спектаклыл куы куыста, уæд, æмæ, зæгъгæ, ахæм практикæ ис æндæр театрты дæр. «Æз ацы хъуыддагмæ рагæй цыдтæн. Мæн фæндыд ссарын Фатимæйы, кæцы сæххæст кæндзæнис йæ ролы, æрмæстдæр мæн куыд фæнды, афтæ. Фыццаг артистты сконды Фатимæйы ролы чи хъазыд, уыцы Мæргъиты Ингæйы уырнгæ дæр нæ кодта æмæ сарæхсдзæнис ацы роль сæххæст кæнын. Дыккаг сконды чи хъазы, уыцы актрисæ Хуыгаты Альбинæ ныридæгæн у фылдæр фæлтæрддзинад кæмæ ис, ахæм артисткæ æмæ йæ тынг фæндыдис рагæй кæмæ бæллыд, уыцы Фатимæйы роль сæххæст кæнын. Алкæцы артисты дæр фæфæн-ды йæ бæллиццаг роль сæххæст кæнын. Афтæ у ацы хъуыддаджы дæр», – банысан кодта аивадон къухдариуæггæнæг.
Уый ма куыд банысан кодта, афтæмæй дыууæ къорды дæр спектаклы хъазынц сæхирдыгонау æндæр æмæ æндæргъуызон, æгæрыстæмæй, мизансценæты дæр. Йæ ныхæстæм гæсгæ хуымæтæджы нæ уыдис кусын ацы уацмысыл, бирæ хатт-иу бахъуыд, Къоста бирæ тæппытæ кæм æвæры йæ поэмæйы æмæ йæ дзы цы зæгъын фæндыд, уыцы хъуыдытæ æрцахсын æмæ йæ баххæст кæнын спектаклы. «Хетæгкаты Къоста уыйас æнæрайхалгæ фарстытæ æвæры «Фатимæ»-йы æмæ уымæ гæсгæ ацы дыууæ къордæй алкæцыдæр йæхирдыгонау у цымыдисон. Режиссеры ахæм хъуыды ма баст у уыимæ, цæмæй артистты ‘хсæн конкуренци уа хорзæрдæм. Артисттæн та уыдзæнис уыцы тырнындзинад, кæцыйы фæрцы æрмæстдæр кæндзысты рæзгæ æмæ хуыздæр. Зæгъын ма мæ фæнды уый, æмæ ацы поэмæмæ гæсгæ фыст кæй æрцыдис цалдæр пьесæйы æмæ иу та – кинофильм. Ацы уацмысимæ чидæриддæр куыстой, уыдонæй алчидæр куыд æмбæрста, ахæм хуызы арæзтой пьесæты, фæлæ æз, цæмæй уыдонæй мачи фæхъыг уыдаид, уый тыххæй аскъуыддзаг кодтон æмæ æрмæстдæр спайда кодтон оригиналæй. Уымæн æмæ Къостайæн йæхицæй хуыздæр ничи ныффысдзæн «Фатимæ»-йы, – загъта театры аивадон къухдариуæггæнæг.
Уымæй дарддæр ма брифингы уазæг журналисттæн радзырдта, спектаклы премьерæйæ дарддæр ма театры сценæйыл театрдзаутæ фыццаг хатт кæй байхъуыстой зындгонд ирон композитор Æлборты Феликсы оперæмæ. «Æлборты Феликсæн нал бантыст кæронмæ ацы музыкалон уацмыс ныффыссын, фæлæ нын йæ цардæмбал куыд баныфсæвæрдта, уымæ гæсгæ йыл дарддæр бакусдзæнис Магкоты Ацæмæз. Спектаклы рæстæджы цы зарджытæм хъуыстат, уыдон дæр уыдысты Æлборты Феликсы æмæ зæлыдысты фыццаг хатт. Нæ республикæйы Президент Бибылты Анатоли та театрæн балæвар кодта 50 биноклы æмæ сæ ныр пайда кæндзысты нæ зынаргъ сценæмæкæсджытæ», – загъта спектаклы режиссер.
1931-æм азы июлы мæйы фыццаг театралон сезон куы байгом, уæд сценæйыл æвдыст æрцыд Цъеретелийы пьесæмæ гæсгæ æвæрд спектакль «Лихорадка», кæцыйы æвæрæг-режиссер уыд уæды театры директор æмæ аивадон къухдариуæггæнæг Хетæгкаты Владимир. Тамерлан куыд загъта, афтæмæй театры къухдариуæгадмæ фæзындис ахæм хъуыды, цæмæй ацы аз ног театралон сезон дæр бакодтаиккой уыцы спектаклæй. Фæлæ йын не ссардтой йæ оригинал, æгæрыстæмæй, архивты дæр. Уымæ гæсгæ курæг у, кæд искæмæ ис, уæд æй бавдисой театрмæ.
Цхуырбаты Ларисæ
Comments are closed, but trackbacks and pingbacks are open.