«Хурзæрин»-ы уацхæссæг аккредитацигонд уыдис Знауыры æмæ Цхинвалы районты. Развӕлгъау бӕрӕггӕнӕнтӕм гӕсгӕ Хуссар Ирыстоны цӕрджыты 97 проценты сӕ хъӕлӕстӕ радтой Владимир Путинӕн. Иумæйагӕй сисгӕйӕ та уӕрӕсейаг ӕмбӕстӕгтӕй Путиныл се ‘ууӕнк бафтыдтой 87 процентæй фылдӕрӕй.
Фыццаг бон ӕвзарӕн фадгуытӕм се ‘мбӕстагон хӕс радтынмӕ бацыдысты 7 минӕй фылдӕр адӕймаджы. Уымӕй размӕ ма развӕлгъау хъӕлӕс радтой иу мин адӕймагӕй фылдӕрӕй. Ӕвзӕрстыты дыккаг бон дӕр адӕм цыдысты активонӕй ӕвзарӕн фадгуытӕм ӕмӕ та сӕ нымӕц ахызт 6 минӕй. Ӕртыккаг бон ӕвзарӕн фадгуыты бирӕ адӕм фенӕн нал уыд, уымӕн ӕмӕ сӕ фылдӕр хай схъӕлӕс кодтой. Иумæйаг нымадӕй изӕры 8 сахатмӕ схъӕлӕс кодта 17 мин адӕймагӕй фылдӕр.
Цхинвалы районы Дменисы хъӕуы ӕвзарӕн фадыг бакодтой бынӕттон администрацийы бӕстыхайы. Ӕвзарӕн къамисы сӕргълӕууӕг Петр Мазин куыд зӕгъы, афтӕмӕй цӕрджытӕ хъӕлӕс дӕттынмӕ цыдысты хорз зӕрдӕйыуагимӕ, куыд бӕрӕгбонмӕ, афтӕ. Ӕртӕ боны дӕргъы ацы ӕвзарӕн фадыджы не ‘рцыд иу фӕткхалӕн цау дӕр. Афтӕ сабыр ма ӕвзӕрстытӕ ацыдысты Знауыры районы ӕвзарӕн фадыджы дӕр. Знауыры районы хъӕутӕй бирӕты цӕрджытӕ иууылдӕр хайад райстой ӕвзӕрстыты ӕмӕ уыцы факт дӕр хорзыл дзурӕг у.
ДЖИОТЫ Александр
