Президент Гаглойты Алан раарфæ кодта Владимир Путинæн, æвзæрстыты кæй фæуæлахиз æмæ Уæрæсейы Федерацийы Президенты бынатмæ ногæй æвзæрст кæй æрцыд, уый цытæн.
Арфæйы телы дзырдæуы:
«Цытджын Владимир Владимиры фырт!
Республикæ Хуссар Ирыстоны æппæт адæмы æмæ уын сæрмагондæй мæхи номæй арфæ кæнын, æвзæрстыты кæй фæуæлахиз дæ æмæ Уæрæсейы Федерацийы Президенты бынатмæ ногæй æвзæрст кæй æрцыдтæ, уый цытæн.
Дæ разамынды руаджы Уæрæсе рахызт рæзты бæрзонд æмвæзадмæ æмæ дунейы зынгæ сфидардæр кодта йæ позицитæ. Дисы æппары экономикæйы рæзты, æгуыстдзинад фæкъаддæр кæныны æмæ æмбæстæгты фæрныгад ифтонг кæныны дæ æвæллайгæ куыст.
Уырны мæ, Уæрæсейы адæм кæй сарæзтой раст равзæрст, кæцыйы фæстиуæгæн бæстæ дарддæр дæр цæудзæн снысангонд фæндагыл, суыдзæн ноджы тыхджындæр, æнтыстджындæр.
Нæ дызæрдыг кæнын, не ‘фсымæрон адæмты ‘хсæн традицион æгъдауæй хæлар æмæ æууæнкджын ахастытæ, кæцытæ бындуриуæг кæнынц бирæнусон хæлардзинадыл, дарддæр дæр кæй фидар кæндзысты æмæ активонæй кæй рæздзысты Уæрæсейы Федерацийы æмæ Республикæ Хуссар Ирыстоны алы цæрæджы хæрзиуæгæн дæр.
Мæ цæст дын уарзы, цытджын Владимир Владимиры фырт, продуктивон æмæ æнтыстджын куыст Уæрæсейы паддзахады сæргълæууæджы бынаты. Уырны мæ, дæ ног президентон æмгъуыд нысан кæй æрцæудзæн егъау уæлахизтæ æмæ æппæт фадгуыты прогрессæй.
Мæ зæрдæ дын зæгъы æнæниздзинад, æвидигæ хъару, æнтыстытæ æппæт дæ архайдтыты, снысангонд пълæнтты, Уæрæсейы адæмæн та – дидинæфтыд æмæ сабыр арвы бын царды фæндиæгтæ!»
Дыууæ президенты ныхас телефоны
Республикæ Хуссар Ирыстоны Президент Гаглойты Алан æмæ Уæрæсейы Федерацийы Президент Владимир Путин ныхас кодтой телефоны.
Гаглойты Алан раарфæ кодта Владимир Путинæн йæхи æмæ Хуссар Ирыстоны æппæт адæмы номæй, æвзæрстыты кæй фæуæлахиз æмæ УФ-йы Президенты бынатмæ ногæй æвзæрст кæй æрцыд, уый тыххæй.
Хуссарирыстойнаг паддзахады сæргълæууæг Владимир Путинæн æмæ УФ-йы бирæнацион адæмæн йæ цæст бауарзта æнæниздзинад, æнтыстытæ, фæрныгад æмæ сабыр арвы бын царды фæндиæгтæ.
Гаглойты Алан банысан кодта, зæгъгæ, Хуссар Ирыстоны æвзарджыты 97 проценты схъæлæс кодтой УФ-йы национ лидерæн.
Йæ рады, Владимир Путин бузныг загъта Гаглойты Аланæн æмæ банысан кодта, зæгъгæ, Уæрæсе дарддæр дæр æххуыс кæндзæн Хуссар Ирыстоны адæмæн.
