Митинг-концерт
Нæ республикæйы политикон парти «Ныхас»-ы хъæппæрисæй 12-æм мартъийы Театралон фæзуаты уагъд æрцыдис митинг-концерт Владимир Путины кандидатурæйы фарс балæууыны фæдыл. Зæрдæйæн æхцон хæссæг акцимæ æрбацыдысты нæ республикæйы министрадтæ æмæ ведомствоты кусджытæ, бæстæйы разамынад Президент Гаглойты Аланы сæргълæудæй, республикæйы æмбæстæгтæ æмæ уазджытæ.
Владимир Путины кандидатурæйы фарс рахæцыны тыххæй митинг-концерты раныхас кодтой зынгæ политиктæ, культурæйы кусджытæ, ахуырад æмæ медицинæйы фадыджы минæвæрттæ.
«Владимир Путин у тыхджын политик æмæ йæ Фыдыбæстæйы патриот. Дунейы æцæг лидер. Махæн тынг ахсджиаг у, Уæрæсейы æдасдзинад æмæ стабилондзинад куы уа, уый. Уæрæсейы Федераци Хуссар Ирыстонæн у йæ стратегион партнер. Нæ фарс рахæцы цардархайды алы фадыджы дæр. Ныртæккæ Уæрæсейæн тынг зын рæстæг у æмæ ахсджиаг хъуыддагыл нымайын, цæмæй балæууæм Владимир Путины кандидатурæйы фарс», – радзырдта парти «Ныхас»-ы сæргълæууæг Бесаты Зитæ.
2014-æм азы уæгъдибар хъæбысхæстæй дунейы чемпион, æмæ 2016-æм азы Олимпион хъæзтыты чемпион, Уæрæсейы спорты сгуыхт мастер Рæмонты Сослан, загъта, зæгъгæ, Владимир Путины кандидатурæйы фарс балæууыны нысанæн митинг-концерты хайад кæй исы, уый йын æхсызгон у. Радзырдта, Уæрæсейы фæрцы нæ адæм мæлæтæй кæй фервæзтысты иууыл уæззаудæр рæстæджыты.
РХИ-йы Парламенты депутат, «Уацамонгæ»-йы ордены кавалер Остъаты Роберт:«Ныфс мæ ис сымахæй, мæ зынаргъ æмбæстæгтæ, Уæрæсейы президенты æвзæрстыты рæстæджы кæй æрбацæудзыстут æвзарæн фадгуытæм æмæ кæй æрбалæудзыстут Владимир Путины кандидатурæйы фарс, цæмæй иумиагæй схъæлæс кæнæм тыхджын Уæрæсейы ирд фидæны тыххæй».
Владимир Путины фæрцы Уæрæсе суыдзæн дунеон лидер, æмæ Владимир Путин та æппæт дунейы нымад цæуы æмæ цæудзæн фыццаг номыр политикыл, – загъта паддзахадон университеты ректор Тедеты Вадим. Уый куыд банысан кодта, афтæмæй Хуссар Ирыстон дунейæн тугæй равдыста йæ æфсымæрдзинад Уæрæсеимæ.
«Мах æй æмбарæм, кæй нын ис иумæйаг знæгтæ, иухуызон риск æмæ йæ зонæм Уæрæсейы уæлахиз у Хуссар Ирыстоны уæлахиз дæр», – радзырдта Тедеты Вадим.
Акцимæ æрбацæуджытæн сæ мидбылхудт æмæ хъæлдзæг уагæй бæрæг уыд, кæй сты Владимир Путины сæргълæудæй Уæрæсейы размæцыды æвварс.
Ныхасы рацыдысты нæ республикæйы адæмон артист Уанеты Æхсар, Знауыры районы рынчындоны сæйраг дохтыр Цъæритты Иннæ, Луганскы цæрæг Лагачева Светланæ, кæцыйæн Хуссар Ирыстон ссис йæ дыккаг райгуырæн бæстæ, æхсæнадон архайæг Ушаков Сергей, 2016 азты Олимпион чемпион Рæмонты Сослан. Уыдонæй алчидæр дзырдта, Ирыстоны æмбæстæгты хуыздæр цардархайды тыххæй Владимир Путин цы егъау политикон къахдзæфтæ аразы, уый тыххæй.
Акцийы ма патриотикон зарджытæ сæххæст кодтой Ирыстоны зынгæ зарæггæнджытæ: Харебаты Вадим, Бекъойты Вано, Гатыгкоты Нинæ, Хъæбæлоты Руслан æмæ æндæртæ.
Уый фæстæ театралон фæзуатыл айзæлыдысты Хуссар Ирыстон æмæ Уæрæсейы паддзахадон гимнты зæлтæ.
Танделаты Вилена
