8 июны бæстæйы Президент Бибылты Анатоли бабæрæг кодта Хуссар Ирыстоны нывгæнджыты равдыст «Tskhinval 5» Уæрæсейы бон нысан кæныны цытæн, кæцы уагъд æрцыд Паддзахадон кино-концертон зал «Чермен»-ы фойейы. Ардæм ма фæуазæг сты Хуссар Ирыстоны Уæрæсейы Федерацийы Уæлвæткон æмæ Æххæстбарджын минæвар Марат Кулахметов, Россотрудничествойы къухдариуæггæнæг Сергей Скворцов, РХИ-ы культурæйы министр Зассеты Жаннæ, нæ республикæйы æхсæнады минæвæрттæ, нывкæнынадæн табугæнджытæ æмæ журналисттæ.
Ацы мадзал сорганизаци кодтой нæ республикæйы Культурæйы министрад æмæ Россотрудничествойы кусджытæ. Равдысты æвæрд æрцыдысты æрыгон нывгæнджытæ Саулохты Георги, Дзигойты Каринæ, Кокойты Мария æмæ Дыгъуызты Марияйы куыстытæ.
Президент азылд нывтыл, стæй зæрдиаг арфæ ракодта организатортæн, загъта, зæгъгæ стыр æхцондзинад райста равдыстæй.
«Нывтæм кæсгæйæ уайтагъд бафиппайæн ис, кæй сыл бафыдæбон кодтат. Уæ куыстыты руаджы радæттат уæ миддунейы æнкъарæнтæ æмæ йæ уынæм, æдде бакæсгæйæ куыд рæсугъд стут, уæ миддуне дæр афтæ рæсугъд кæй у. Уæлдай æхсызгон та мын уый тыххæй у, æмæ ацы равдыст кæй бацæттæ кодтат Уæрæсейы боны цытæн. Уымæн æмæ махæн Уæрæсеимæ ис тынг æнгом ахастытæ. Уымæ гæсгæ ацы бæрæгбон махæн дæр тынг æввахс у, ис нын иу истори æмæ ма нæ фидæн дæр хъуамæ кæрæдзийыл баст уа. Ацы æрыгон нывгæнджыты куыстыты дæр уыцы бастдзинад бæрæгæй зыны», – банысан кодта Бибылты Анатоли.
Марат Кулахметов йæ раныхасы стыр бузныг загъта ахæм диссаджы мадзал бацæттæ кæныны тыххæй, банысан кодта, зæгъгæ ацы равдыст рабæрæг кодта, Хуссар Ирыстоны кæй ис æрыгон курдиатджын нывгæнджытæ.
Сергей Скворцов дæр стыр аргъ скодта нывгæнджыты куыстытæн æмæ банысан кодта, зæгъгæ паддзахады культурæ куы уæвынад кæна æмбæлон æмвæзадыл, уæд цæры æмæ размæ цæуы йе ‘хсæнад.
Джиоты Александр
Comments are closed, but trackbacks and pingbacks are open.