Хуссар Ирыстоны паддзахадон университеты музейон комплексы равдыстыты залы байгом цуангæнæг æхсæнгæрзты уникалон иубонон равдыст. Бекъойты Роланд йæ хисæрмагонд коллекци фыццаг хатт адæмы рæгъмæ рахаста. Бирæ азты дæргъы зæрдиагæй æмбырд кодта зынаргъ мигæнæнты коллекци. Равдысты экспозицийы уыд æртын иуæгæй фылдæры бæрц. Ацы рæсугъд æмæ элитон мигæнæнтæ сты дунейы зындгонд хæцæнгарзуадзджыты конд, куыд зæгъæм, Герман, Бельги, Англи, Франц, Уæрæсе æмæ æндæр бæстæты уагъд. Равдысты экспонаттыл зындис, сæ хицау сыл рыг абадын дæр кæй нæ уадзы æмæ сæм хорз кæй зилы, уый.
Культурон мадзалмæ фæуазæг сты нæ республикæйы къухдариуæгад Президент Гаглойты Аланы сæргълæудæй, Хуссар Ирыстоны Уæрæсейы Федерацийы æххæстбарджын минæвар Марат Кулахметов, Уæрæсейы Федерацийы Хуссар Ирыстоны æххæстбарджын минæвар Гасситы Знауыр æмæ нæ бæстæйы министрадтæ æмæ ведомствоты бæрнон кусджытæ, университеты ахуыргæнджытæ, студенттæ æмæ, кæй зæгъын æй хъæуы, Бекъойты Роланды бинонтæ æмæ йе ‘ввахс адæм. Равдыст байгом кодта университеты ректор Тедеты Вадим. Уый арфæ ракодта æппæтæн дæр равдысты сæраппонд æмæ сæрмагондæй та бузныджы ныхæстæ загъта Бекъойты Роландæн йæ коллекци равдисыныл кæй сразы ис республикæйы адæмæн, уый тыххæй. «Махæн нæ университеты музейон комплексы арæх вæййы æнгæс равдыстытæ, æрбахонæм нывгæнджыты æмæ сын се сфæлдыстадимæ базонгæ вæййынц фæсивæд дæр. Архайæм, цæмæй нæ музейы уагъдцæуæг мадзæлттæ уой æндæр æмæ æндæртæ æмæ сæм адæм цымыдис кæной. Нæ республикæйы хæдбардзинад нын Уæрæсейы Федераци куы банымадта, ууыл ацы аз æххæст кæны 15 азы æмæ сæрмагондæй уыцы бæрæгбонмæ дæр музей бацæттæ кæндзæн равдыст. Ис нæм куклæты коллекцитæ æмæ сæ адæмæн равдисдзыстæм. Бузныг Бекъойты Роландæн, ивгъуыд азы нæ музейæн æхсæнгарз берданкæ кæй балæвар кодта. Уыцы хæцæнгарзыл цæуы 140 азы бæрц æмæ ссардта йæ бынат æндæр экспонатты æхсæн», – банысан кодта университеты ректор.
Равдыст байгом кæныны цытджын мадзалы раныхас кодта Бекъойты Роланд йæхæдæг дæр. Уый банысан кодта, зæгъгæ, равдыст организацигонд æрцыд уый нысанæн, цæмæй нæ республикæйы адæм базонгæ уой кæддæры уникалон мигæнæнты рауагъдимæ. Уыдон сты 19-æм æнусы кæронæй 20-æм æнусы райдианы рæстæджы уагъд. «Дунейы иууыл зындгонддæр цуангæнæн хæцæнгæрзтæуадзæг фирмæтæ сæ рауагътой æмæ мын бантыст уыдонæй самал кæнын. Нæ абоны акцийæн ис культурон характер æмæ мын æхсызгон у нæ адæмæй бирæтæ ацы хъуыддаджы ног зонындзинæдтæ кæй райсдзысты, уый. Бузныг мæ фæнды зæгъын, равдыст чи сорганизаци кодта, æппæт уыдонæн æмæ уæ ныр та стыр æхсызгонæй бæстондæр базонгæ кæндзынæн мæ коллекциимæ», – банысан кодта коллекционер æмæ равдысты уазджыты бахуыдта залмæ. Уый фыццаг бацыд æмæ æрлæууыд Германийы уагъд æхсæнгарзмæ (Меркель), кæцы у тынг зынаргъ, цалдæр милуан сомы аргъ æмæ цыдæриддæр зыдта, уый радзырдта бæстæйы сæргълæууæг Гаглойты Алан æмæ æндæр бæрнон адæймæгтæн. Бекъойты Роланд тынг хорз кæй зоны йæ коллекцийы алкæцы мигæнæны истори дæр, уый бæрæг уыдис йæ зæрдиаг æмæ бæстон дзуаппытæй.
ЦХУЫРБАТЫ Ларисæ
