Раздæримæ абаргæйæ машинæты нымæц дзӕвгар фæфылдæр, кӕцыдӕр хӕдзӕртты кӕртыты лӕууы дыууӕ кӕнӕ фылдӕр машинæйы. О, хорз у машинæ, фæлӕ фӕзынд йемӕ баст проблемӕтӕ дӕр. Фыццаджыдӕр фӕфылдӕр сты фӕндагон-транспортон цаутӕ. Уымӕй уӕлдай ма уынгтæ уынгӕг кӕмыты сты, уым азмӕлӕн нал вӕййы. Ацы проблемӕ уӕлдай ирддӕрӕй зыны горӕт Цхинвалы уынгты.
Ахӕм уавӕрты милицийы фӕндагон змӕлды ӕдасдзинады инспектортæ исынц алыгъуызон мадзӕлттӕ фӕндӕгтыл ӕмбӕлон фӕтк ӕрӕвӕрыны тыххӕй.
Ӕрӕджы паддзахадон инспекци хыгъд радтой сӕ бакӕнгӕ куыстӕн азы дӕргъы. Хыгъдон ӕмбырды анализ сарӕзтой аваритӕн, ӕрдзырдтой фӕндӕгтыл ӕндыгъд уавӕр сӕвзӕрыны аххосӕгтыл ӕмӕ дарддӕр цахӕм мадзӕлттӕ хъӕуы райсын, уыдӕттыл.
2023 азы республикӕйы фӕндӕгтыл ӕрцыд 183 фӕндагон-транспортон цауы, кӕцыты фӕмард авд адӕймаджы ӕмӕ дзы 35 та райстой алыгъуызон цӕфтӕ. 2022 азы та ӕрцыдис 191 аварийы, кӕцыты фӕмард сты 6 адӕймаджы ӕмӕ дзы 26 та райстой алыгъуызон цӕфтӕ.
Шофырты аххосӕй ӕрцыд 108 аварийы, кӕцытӕ фехӕлдтой фӕндагон фӕткойтӕ. Уыдонӕй 58 шофыры разындысты нозтджынтӕ. Азы дӕргъы ма 18 фистӕг бӕлццоны бахаудтой машинæты бын ӕмӕ райстой алыгъуызон цӕфтӕ. Хъыгагӕн дзы иу бӕлццон фӕмард. 11 аварийы дзы аххосджын разындысты фистӕг бӕлццӕттӕ. Уымӕй уӕлдай ма хӕдзарон фосы дӕр машинæтæ ныццавтой 18 хатты. Ахӕм фӕндагон-транспортон цауты фылдӕр хатт аххосджын разынынц хӕдзарон фосы хи-цӕуттӕ.
Азы дӕргъы милицийы кусджытӕ сбӕлвырд кодтой 14 711 фӕткхалӕн цауы. Фаронимӕ абаргӕйӕ фӕткхалджыты нымӕц фӕкъаддӕр – уæд та сбӕлвырд кодтой 16 694 фӕткхалӕн цауы. Автоинспектортӕ профилактикон ӕмӕ рейдон мадзӕлтты рӕстӕджы баурӕдтой 541 нозтджын шофыры. Фаронимӕ абаргӕйӕ сӕ нымӕц иу ахӕмы фӕфылдӕр. Не ‘мбӕстӕгтӕ нозтджынтӕй автомашинӕ арӕхдӕр кӕй скъӕрынц, уый ахъуыдыйаг у. Уыдон хӕссынц фыдбылыз алкӕмӕндӕр ӕмӕ хъӕуы карздӕр мадзӕлттӕ райсын сӕ ныхмӕ.
Анализ саразыны фӕстиуӕгӕн рабӕрӕг, авариты сӕйраг аххосӕгтӕ кӕй сты нозтджынӕй машинæ скъӕрын, стыр тагъдадӕй цӕуын, дӕ ныхмӕ цӕуӕг автотранспорты фӕндагмӕ рахизын ӕмӕ светофоры сырх рухсыл аскъӕрын. Авариты фылдӕр хайы-иу автомашинӕтӕ сӕмбӕлдысты сӕ кӕрӕдзийыл. Иууыл арӕхдӕр аваритӕ ӕрцӕуы цыппӕрӕм, майрӕмбон æмæ хуыцаубонты.
Цӕмӕй куысты хъӕндзинӕдтӕ иуварс ӕрцӕуой, уый фӕдыл ногӕй ист ӕрцӕудзысты алыгъуызон мадзӕлттӕ. Фӕндагон инспектортӕ ӕппынӕдзух сӕ хъус дарынц республикӕйы фӕндӕгты уавӕрмӕ, кӕсынц фӕндагон нысӕнттӕм, светофортӕм, фӕндаджы хӕххытӕм, канализациты ӕмбӕрзӕнтӕм, ӕмӕ сӕ фиппаинӕгтӕ бавдисынц горӕты ӕмӕ районты администрацитӕм. Ӕппӕт ацы проблемӕтӕ аскъуыддзаг кӕнын хауы бынӕттон администрацитӕм, фӕлӕ сын, бӕрӕг аххосӕгтӕм гӕсгӕ, нӕ бантысы сӕ аиуварс кӕнын. Проблемӕ фылдӕр баст вӕййы финанстимӕ – сӕ бюджеты ӕхцайы фӕрӕзтӕ фаг нӕ вӕййы ӕмӕ проблемӕ иу азӕй иннӕ азмӕ ахизы.
ДЖИОТЫ Алыксандр
