Милицийы районон управленитæ хатдзæгтæ сарæзтой сæ бакæнгæ куысты тыххæй ивгъуыд азæн. Сæ хистæртæ куыд банысан кодтой, афтæмæй 2022 азы дæр милицийы куыст нысанмæздæхт уыд цæрджыты сабырад æмæ æдасдзинад бахъахъхъæнынмæ, фыдбылызтæй сæ бахизынмæ, фыдракæндтæ раргом кæнынмæ æмæ ма фыдгæнджытæй чи бамбæхст, уыдоны æрцахсын æмæ бæрндзинадмæ æркæнынмæ.

Дзауы районы милицийы управленийы сæргълæууæг Дзæххойты Алим йæ раныхасы банысан кодта, зæгъгæ, сæ разылæууæг оперативон-службæйон хæстæ æххæст æрцыдысты æмæ статистикæйæн анализ саразыны фæстиуæгæн бафиппайæн ис, иумийагæй сисгæйæ, ивгъуыд аз фыдракæндты нымæц кæй фæкъаддæр Дзауы районы территорийы, уый.

«Азы дæргъы нæм регистраци æрцыдис 12 фыдракæнды æмæ дзы 9 раргом ис. Фыдракæнд раргомдзинады хъуыддаг схызт 75 %-мæ. 2021 азы та нæм регистраци æрцыдысты 19 фыдракæнды æмæ дзы раргом ис 15», – зæгъы Дзæххойты Алим.

Ленингоры районы дæр фæкъаддæр ис фыдракæндты нымæц. Кæд æмæ 2021 азы районы территорийы регистраци æрцыдис 7 фыдракæнды æмæ дзы 6 раргом ис, уæд 2022 азы та æрцыдис æрмæстдæр дыууæ фыдракæнды æмæ дзы иу раргом ис.

Знауыры районы фæфылдæр ис фыдракæндты нымæц – регистраци дзы æрцыдис 10, фæлæ иууылдæр раргом сты. 2021 азы та срегистраци кодтой 8 фыдракæнды.

Мидхъуыддæгты министр Гæззаты Валери бахынцыдта районты управлениты хыгъдтæ æмæ сын бацамыдта сæ рæдыдтытæ, сæ хъæндзинæдтæ. Уымæй уæлдай ма сын банысан кодта сæ хæстæ дæр, сæ службæ фæхуыздæр кæнынæн цы мадзæлттæ хъуамæ райсой, уыдæттæ. Фыццаджыдæр æрдомдта, цæмæй рæнхъон сконды æхсæн ма цуда дисциплинæ, кæцы бындур æвæры милицийы кусæджы кад æмæ намысæн.

«Милицийы кусджытæй æнæмбæлонæй æмæ æнæгъдауæй йæхи чи дары, уыдонæн барадхъахъхъæнæг органты бынат нæй. Уæлдайдæр та нозтджынæй машинæ чи фескъæрынц, уыдонæн. Ахæм фактты фæдыл алыхатт дæр фарст æвæрд цæудзæнис, цæмæй уыцы кусæг милицийы рæнхъытæй сæрибар æрцæуа», – загъта ведомствойы сæргълæууæг.

Гæззаты Валери ма йæ раныхасы бацамыдта, цæмæй сæ дарддæры куысты здахой прокуратурæимæ æмæ бынæттон администрациимæ æмгуысткæнынадмæ.

Алы районы дæр ис ахæм проблемæтæ, куыд æнæхицау хæдзарон фос, æнæхицау куыйтæ æмæ æнæзакъонæй цуан кæнын. Бынæттон цæрджытæ арæх фæхъаст кæнынц, хæдзарон фос сын сæ тыллæг кæй бабын кæнынц, уый фæдыл. Уыцы фос ма арæх зиан æрхæссынц паддзахадон фæллойæн дæр. Уымæй уæлдай аваритæ дæр арæх вæййы дзæгъæл фосы аххосæй – фарон æрцыдис 16 ахæм аварийы. Æмæ фылдæр хатт фосы хицæуттæ сæхи бааууон кæнынц бæрндзинадæй. Барадхъахъхъæнæг органтæ æрцыдысты ахæм хъуыдымæ, цæмæй æнæмæнгæй хæдзарон фосыл кæнын райдайой биркатæ. Афтæмæй – æнцон сбæлвырд кæнæн уыдзысты дзæгъæл фосы хицæуттæ æмæ фадат уыдзæнис сæ бафхæрынæн закъоны фæлгæтты.

ДЖИОТЫ Алыксандр

Comments are closed, but trackbacks and pingbacks are open.