Зонадон-студентон конференци

31-æм майы Тыбылты Алыксандры номыл Хуссар Ирыстоны паддзахадон университеты уагъд æрцыд æрвылазон 69-æм зонадон-студентон конференци. Конференцийы пленарон рабадты куысты хайад райстой ХИПУ-йы ректор, доцент Тедеты Вадим, зонадон куысты фæдыл проректор Тедеты Анатоли, университеты ахуыргæнджытæ, студенттæ.

Конференци бацæуæн ныхасæй байгом кодта Тедеты Анатоли. Уый зæрдæбын арфæтæ ракодта конференцийы хайадисджытæн, бафæндыд æй уыдонæн æнтыстджын куысты фæндиæгтæ.

Æрæмбырдуæвджыты раз раныхас кодта Тедеты Вадим. Уый банысан кодта, зæгъгæ, ацы конференци уагъд æрцæуы æрвылаз дæр, æмæ фидæн азы та ХИПУ-йы уагъд æрцæудзæн 70-æм студентон зонадон-практикон конференци. Йæ ныхæстæм гæсгæ, уыцы конференци уагъд æрцæудзæн бындурон æмæ масштабондæрæй, уыимæ ма уый уагъд æрцæудзæн ног уавæрты ног университетон комплексы. Тедеты Вадим бамбарын кодта, зæгъгæ, конференцийы программæмæ гæсгæ бакæсдзысты пленарон докладтæ, уый фæстæ та куыст адарддæр уыдзæн секциты. Æрвылаз дæр нæ университеты студенттæ бакæсынц цымыдисон докладтæ. Кæй зæгъын æй хъæуы, ахæм æнтыстытæ сæ къухты æфтынц сæ зонадон къудариуæггæнджыты руаджы. Ректоры ныхæстæм гæсгæ, номхуындæй, зонадмæ фæндаг райдайы студентон бонтæй фæстæмæ æмæ сæм æрсидт, цæмæй ноджы лæмбындæгдæр хъусдард аздахой зонадмæ.

Информатикæйæ университеты конкурсы уæлахиздзауты ректор схорзæхджын кодта дипломтæ æмæ зæрдылдарæн лæвæрттæй. Фыццаг бынат бацахста инженерон-экономикон факультеты студенткæ Гуыцмæзты Анастасия, дыккаг бынат лæвæрд æрцыд истори æмæ юриспруденцийы факультеты студенткæ Джиоты Аннæйæн æмæ æртыккаг бынат та  фæцис инженерон-экономикон факультеты студент Гæджиты Арсены.

Конференцийы пленарон рабадтмæ хаст æрцыдысты фондз доклады. Фыццаг доклад «Роль сармато-аланских племен в формировании рыцарской идеологии», зæгъгæ, раныхас кодта историон факультеты 4-æм курсы студенткæ Тъехты Дзерассæ (зонадон къудариуæггæнæг Джиоты З.).

Уый йæ доклады æрдзырдта фыццаг егъау бабырстыты аланты хайадисты алыгъуызон аспектты фæдыл, Итали, Испани æмæ Африкæмæ сæ балцыты тыххæй. Уый банысан кодта, зæгъгæ, Римы историктæ хицæн кодтой аланты, сæ хæстмондагдзинадыл сын дзургæйæ. «Сæрмæтты æмæ аланты зонындзинæдтæ æмæ фæлтæрддзинад тынг бандæвдтой нормандаг æмæ бретонаг рыцарты дуджы арæзтыл. Уыдонæй Европæ базыдта ныллæг быдираг бæхты æмæ алайнаг цуанон куыйты тыххæй», – радзырдта Тъехты Дзерассæ.

Рыцарты дуджы эталонты схуыдта паддзах Атруры, Нарты Батрадзы, афтæ ма сæрмæттаг сылгоймæгтæ-хæстонты.

Доклад ахæм темæйыл «Архитектурные стили в строительстве», зæгъгæ, æрбавдыстой сæудæджерадон æмæ æмбæстагон арæзтады дæсныдзинады 4-æм курсы студенттæ Елойты Æхсар æмæ Тасойты Вячеслав (зонадон къухдариуæггæнæг – хистæр ахуыргæнæг Мамиты Л.). Уыдон сæ докладты æрдзырдтой алыгъуызон архитектурон стилты тыххæй.

«Социокультурные процессы в публицистике Инала Канукова» – ахæм номимæ доклад æрбавдыста журналистикæйы факультеты 5-æм курсы студенткæ Чысиаты Аленæ (зонадон къухдариуæггæнæг – хистæр ахуыргæнæг Дамбегты Иринæ). Уый банысан кодта, зæгъгæ, Хъаныхъуаты Иналы публицистикæйы уæрæсейаг æхсæнады социокультурон трансформациты равдыстæн ис уæлдай нысаниуæг 19-æм æнусы дыккаг æмбисы зынгæ фыссæг-рухстауæг æмæ публицисты æппæт сфæлдыстад сахуыр кæныны тыххæй. «Иртасджытæ иу æмæ дыууæ хатты сæ хъусдард нæ аздæхтой ацы курдиатджын фыссæджы публицистон бынтæм. Фæлæ, уæддæр фæстаг рæстæджы Хъаныхъуаты Иналы публицистикæмæ сæ хъусдард аздæхтой æрмæст литературæзонджытæ æмæ историктæ нæ, фæлæ социологтæ, педагогтæ, психологтæ. Уый та æвдисæн у уымæн, æмæ зынгæ фыссæджы сфæлдыстадмæ уæлдай хъусдард здæхт кæй цæуы. Фыссæджы публицистон бынтæн  анализ  фадат радта этнокультурон процессты социалон динамикæйы сæйраг параметртæ банысан кæнынæн, кæцытæ цыдысты бацамынд эпохæйы куыд Ирыстоны, афтæ уæрæсейаг æхсæнады иумиагæй», – радзырдта уый.

«Гуырдзиаг-ирон хæст ирон поэзийы (1989-2008 азты)», зæгъгæ, ахæм номимæ доклад æрбавдыста журналистикæйы факультеты 3-æм курсы студенткæ Кокойты Анжелæ (зонадон къухдариуæггæнæг, доцент Хъазиты М.). Психологийы факультеты 3-æм курсы студенткæ Элбачиты Аннæйы доклад та уыд ахæм: «Влияние эмоций на физическое здровье человека (РХИ-йы постконфликтон уавæры контексты), зæгъгæ, (зонадон къухдариуæггæнæг,  хистæр ахуыргæнæг Гæбулты И.).

Конференцийы пленарон рабадты кæрон уыд цытджын æгъдауæй схорзæхджын кæныны церемони. ХИПУ-йы ректор Кады грамотæтæй схорзæхджын кодта конференцийы хайадисджыты.

Нæ уацх.