Студенты боны цытæн нæ уацхæссæг фембæлд Хуссар Ирыстоны паддзахадон университеты студенттæй цалдæримæ æмæ сæм радта цалдæр фарсты.
– Цахæм æнкъарæнтимæ райдайы студенты бон ?
Медойты Аннæ – «Дунеон ахастыты истори»- йы факультеты 2-æм курсы студенткæ:
– Алы студентæн дæр, мæ хъуыдымæ гæсгæ, йæ бон хъуамæ райдайа уæнгрогæй, хорз æнкъарæнтæ æмæ зæрдæйы равгимæ. Æрвыл-бон дæр хъуамæ зона, йæ разы цы хæстæ ис æрмæст ахуыры нæ, фæлæ иумиагæй сисгæйæ дæр æмæ тырна сæ сæххæст кæнынмæ.
Мæнæн алы бон дæр университет мæ цардмæ бахæссы ног зонындзинæдтæ, æмгæрттимæ æнгомдæр ахастытæ, амоны мын царды фæндагыл æдæрсгæ къахдзæфтæ аразын æмæ йæм фæцæуын цингæнгæ, æхсызгон æнкъарæнтимæ.
– Вæййы афтæ, æмæ студенты нæ фæфæнды лекцитæм цæуын? Кæд «о», уæд, куыд иуварс æрцæуынц ахæм æппæрццаг хъуыдытæ?
Тедеты Азæмæт – «Прикладон математикæ æмæ информатикæ»-йы факультеты 5 курсы студент:
– Раздæры студенттæн ныры хуызæн фадæттæ кæм уыд, уыдон тыххæй ницы дзурдзынæн. Абоны студенттæн та арæзт æрцыдис иттæг хорз бæстыхай æппæт фадæттимæ, цыран кусынц æмæ фæллой кæнынц, сæ дæсныйад хорз чи зоны, ахæм лектортæ. Студенттæ, кæцыты фæнды сæ равзаргæ дæсныйад хорз базонын, уыдонæн ис æппæт фадæттæ дæр ахуыры фæндагыл размæ цæуынæн. Кæй зæгъын æй хъæуы, не ‘хсæн ис, йæ лекцитæм уазал цæстæй чи кæсы, чи сæм зивæг кæны, ахæмтæ, фæлæ уыдонимæ мæнæн ницы иудзинад ис.
– Цахæм аргъ скæндзынæ университеты студентты ‘хсæн ахуыр-хъомыладон куыстæн?
Джиоты Джаконда – «Журналистикæ»-йы факультеты 3 курсы студенткæ:
– Ныртæккæ, мах, Хуссар Ирыстоны паддзахадон университеты студенттæ, ахуыр кæнæм ног бæстыхайы, æрмæст ацы цау дæр нæ разæнгард кæны ахуыры бæрзæндтæм. Хуыздæр ахуыр кæнынмæ ма нæ разæнгард кæны паддзахад æмæ хицауады разамынды хорз ахаст. Нæ цытджын ректор Тедеты Вадим æнæрынцойæ архайы, цæмæй алы хъуыддаджы дæр университет уа размæдзыд. Нæ уарзон лектортæ цæсгомджынæй æххæст кæнынц сæ ахсджиаг æмæ вазыгджын хæстæ. Фылдæр кæнынц университеты бастдзинæдтæ Уæрæсейы уæлдæр ахуыргæнæндæттимæ.
Университеты стыр хъусдард здæхт цæуы хæрзæгъæдауон хъомылады фарстытæм. Æрвылбон дæр уагъд фæцæуы алыгъуызон мадзæлттæ, фембæлдтытæ æмæ ерыстæ. Ныртæккæ нæ университеты ахуыр-хъомыладон куыст ис æмбæлон æмвæзадыл æмæ йæм ивындзи-нæдтæ бахæссын дæр нæу хуымæтæджы хъуыддаг.
– Абоны студенттæн кæрæдзимæ цахæм ахастытæ ис? Уæрæсейы уæлдæр ахуыргæнæндæттæй дарддæр ма уын кæимæ ис бастдзинæдтæ ?
Габатты Альберт– “Юридикон факультет”-ы 5 курсы студент:
– Университеты хорз уавæртæ нын бакодтой бирæ ног фадæттæ æмæ сæ мæ хъуыдымæ гæсгæ, пайда кæнæм æнтысгæйæ. Лекцитæй дарддæр, æнтысгæйæ архайæм алыгъуызон культурон æмæ спортивон мадзæлтты. Студенты ‘хсæн хорз ахастытæ кæй ис, уый фæрцы не ‘нтыстытæ алы хатт дæр вæййынц раппæлинаг.
Нæ университеты студенттæн ма хорз ахастытæ ис æфсымæрон Донецк æмæ Луганскы уæлдæр ахуыргæнæндæтты студенттимæ. Арæх уадзæм тымбыл фынгтæ, онлайн-видеоконференцитæ.
– Кæй зæгъын æй хъæуы, студент фылдæр рæстæг æрвиты хæдзары. Лекцитæм хи бацæттæ кæнынæй дарддæр ма дæ сæрибар рæстæг куыд æрвитыс?
Тедеты Роксанæ – «Куыстуаты экономикæ æмæ управлени»-йы факультеты 3 курсы студенткæ:
– Кæд студенты сæйрагдæр хæс у ахуыр кæнын, уæддæр хæдзары æнæ исты аразгæ дæр нæ вæййын. Уарзын бинонты ‘хсæн мæхи равдисын, сæ къух сын фæрогдæр кæнын. О, фæлæ лекциты фæстæ арæх цалдæр студентæй афæстиат вæййæм университеты. Сарæзтам кафджыты къорд æмæ нæхи цайдагъ кæнæм кафыныл.
– Студенты боны цытæн дæ студенттæн цахæм фæндиæгтæ зæгъын бафæнддзæнис ?
Абайты Алинæ – «Журналистикæ»-йы факультеты 3 курсы студенткæ:
– Æрбалæугæ ног азы хорзæх уæт алы студент, алы лектор æмæ ахуыргæнæджы, æппæт ирон адæмы. Студенттæн ма мæ фæнды, цæмæй суой сомбоны иттæг хорз специалисттæ æмæ цæсгомджынæй фæллой кæной нæ адæмы хæрзиуæгæн.
Гæззаты Иван
СТУДЕНТЫ БОНЫ ИСТОРИЙÆ
2005 азы 25 январы «Уæрæсейаг студентон боны тыххæй» Уæрæсейы президенты бардзырд официалон æгъдауæй сфидар кодта Уæрæсейы студенты «профессионалон» бæрæгбон.
Ацы хъæлдзæг бæрæгбон, сæйраджыдæр, баст у Сыгъдæг хъизæмаргæнæг Римаг Татья-нæйæн кад кæнын æмæ Мæскуыйы паддзахадон Университетæн бын æрæвæрынимæ. Райдианы уал бæрæгбон нысан кодтой æрмæстдæр Мæскуыйы. Нысан æй кодтой уæрæх æмæ уыд кæддæриддæр хъæлдзæг, хайад дзы истой горæты æппæт цæрджытæ. Хуыдтой йæ Мæс-куыйы университетæн бындур æрæвæрыны бон.
Татьянæйы бон та йæ уымæн рахуыдтой, æмæ 1755 азы Сыгъдæг Римаг Татьянæйы бон, ома, 25-æм январы (ног нымад-мæ гæсгæ) Уæрæсейы императрицæ Елизаветæ йæ къух æрфыста Мæскуыйы университет саразынæн бар радтыны тыххæй барамындыл. Фæстæ-дæр ацы университет ссис уы-рыссаг раззагон культурæ æмæ æхсæнадон хъуыдыйы центр. Университет куы сырæзт, уæд дзы иу фарс сарæзтой кувæндон Сыгъдæг хъизæмар-гæнæг Татьянæйæн. Уæ-дæй фæстæмæ Сыгъ-дæг Татьянæ нымад цæуы студентты бардуагыл. Фæстæдæр Николай l барамынд радта, цæмæй ацы бæрæгбон «Университетæн бын æрæвæрыны бон» ма хоной, фæлæ нымад цæуа «Университет байгом кæныны тыххæй актыл къух æрфыссыны бон»-ыл. Афтæмæй паддзахы хъæппæрисæй фæзынд студенты бæ-рæгбон æмæ æрхæццæ ис абоны онг.
18-æм æнусы кæрон æмæ 19-æм æнусы райдиан-иу бæрæгбон райдыдта университеты бæстыхайы официалон церемонийæ, фæхуыдтой-иу бирæнымæц уазджыты, лæвæрдтой-иу хорзæхтæ аккагдæртæн, уый фæстæ-иу студенттæ рахызтысты горæтмæ хъæлдзæг зарджытимæ, кафгæйæ, æмæ-иу æнæхъæн горæт дæр уыдонимæ нысан кодтой бæрæгбон.
Стыр Октябры революцийы фæстæ Татьянæйы бон нал нысан кодтой, фæлæ та 1995 азы Мæскуыйы университеты цур Сыгъдæг хъизæмаргæнæг Татья-нæйы аргъуан куы сæндидзын кодтой, уæдæй фæстæмæ йæ ногæй нысан кæнын райдыдтой.
2005 азы январæй та, куыд ма йæ банысан кодтам, афтæмæй Уæрæсейы президенты барамындмæ гæсгæ нысан цæуы официалонæй. Символиконæй ма 25-æм январь у ахуыры фыццаг семестры сессийы кæрон, йæ фæстæ райдайынц студентты зымæгон улæфтытæ.
Comments are closed, but trackbacks and pingbacks are open.