Бæрæг куыд, афтæмæй электроэнерги æмæ æрдзон газы æргътæ нæ республикæйы фæфылдæр сты 2021 азы январæй. 2020 азы декабры мæйы фæстаг бонты уый охыл Æфснайæн банджы фиддонты хайады сæвзæрд стыр радтæ. Алчи дæр архайдта, цæмæй йæ хæстæ бафида, цалынмæ сæ тыхы нæ бацыдысты ног тарифтæ, уæдмæ. Науæд, дам, зæронд хæстæ дæр паддзахадон унитарон куыстуат «Энергоресурс» фидын кæндзæнис ног уагæвæрдмæ гæсгæ. Фæлæ нын уый фæдыл «Энергоресурс»-ы коммерцион хайад хистæр Козаты Радион куыд фехъусын кодта, афтæмæй «ивгъуыд азæй хæс кæмæн баззад электроэнерги æмæ газæн, уыдонæн сæ бон у сæ хъалонтæ бафидой 1 февралмæ. Фидын та сæ хъæуы зæронд аргъмæ гæсгæ. Фæлæ уымæй фæстæмæ сæ тыхы бацæудзысты ног тарифтæ». Уый ма загъта, зæгъгæ, тарифтæ фæлхасгæнджытæн фæфылдæр уыдзысты хицæн бæрæг-гæнæнтæм гæсгæ. Цæрджытæ æмæ юридикон цæсгæмттæ цы æргътæ фиддзысты, уыдон æхсæн уыдзæн ивындзинæдтæ.
Ног тарифтæ, электроэнергийæ уыдзысты горæты цæрджытæн – 3 сомы, газы аргъ та – 4,51 сомы.
Тарифты фæфылдæры аххосаг у, уæрæсейаг оптон базары электроэнерги æмæ газы æргътæ кæй фæфылдæр сты. Фæлæ адæм хъуамæ зоной, тарифты фæзынаргъдæр кæныны 50 проценты хæрдзтæ бафидын йæхимæ паддзахад кæй райста. Ног азы хæдразмæ Хицауады æмбырды Хицауады Сæрдары хæстæ æххæстгæнæг Бекъойты Геннади фехъусын кодта, зæгъгæ, паддзахад æппæт дæр сарæзта, цæмæй æнæбындуронæй ма фæзынаргъ уой тарифтæ республикæйы цæрджытæн. Фæлæ Уæрæсейы оптон базары электроэнергийы æргътыл нæ бон нæу бандавын. Уымæ гæсгæ, дам, цæрджытæн æххуысæн хицауад паддзахадон бюджеты хыгъдæй дарддæр дæр компенсаци кæндзæн электроэнерги æмæ газы аргъы иу хай. Уый ма ныфс бавæрдта, кæй бакусдзысты 2021-æм азæн электроэнергийы хæрдзты тыххæй субсидитæ фæфылдæр кæныны фарстыл, бюджет куыд амона, уымæ гæсгæ.
Республикæйы электроэнерги æмæ газифтонгады службæтæ цæрджытæй домынц, цæмæй афоныл фидой сæ лæггæдты æргътæ. Хъыгагæн, бирæ абоненттæн сæ фиддонтæ цалынмæ 10-15 мин соммæ не схизынц æмæ сын контролертæ сæ электроэнерги нæ ахицæн кæнынц, уæдмæ сæ фиддонтæ нæ бафидынц. Хатт сæ хъуыддаг ахауы тæрхондонмæ дæр. Фæлæ уый æнæнхъæлæджы нæ вæййы, цалынмæ ацы службæйы кусджытæ газ нæ ахицæн кæнынц, уæдмæ контролер бафæдзæхсы бинонты, сæ фиддонтæ æгæр кæй сбирæ сты. Уый фæстæ сæм бацæуы официалонæй гæххæтт дæр. Дæс боны куы рацæуы уыцы хъусынгæнинагæй, уæд ацы службæты кусджытæн бар ис абонентæн йæ лæггæдтæ ахицæн кæнынæн. Хуыздæр уаид, æмæ цалынмæ хицæн не ‘рцæуынц, уæдмæ куы фидиккой сæ фиддонтæ. Науæд инструкци куыд амоны, уымæ гæсгæ ногæй коммуникацитæм куы иу кæной абоненты, уæд уæлæмхас хъуамæ бафида1280 сомы.
Паддзахадон унитарон куыстуат «Энергоресурс»-ы нын куыд загътой, афтæмæй адæм сæ фиддонтæ кæй нæ фидынц, уый негативонæй æндавы æмткæй куыстыл. Хъуамæ нæ рох ма уа, цалдæр азы размæ дæр ма ацы лæггæдтæй цух куы уыдыстæм, уæд цы зындзинæдтæ æвзæрстам.
Æрæджы Президент Бибылты Анатоли, Мæскуыйы кусæгон балцы уæвгæйæ, уæлдæр æмвæзадыл фембæлдтыты рæстæджы ахсджиаг фарстатыл ныхас кодта Уæрæсейы хицауадимæ, цæмæй æввахсдæр рæстæджы Ирыстоны районтæ дæр газификаци æрцæуой. Куыд зонæм, афтæмæй УФ акционерон æхсæнад «Газпром» сарæзта газификацийы программæ, кæцымæ гæсгæ Хуссар Ирыстоны регионтæ æмæ дæрддзæф хъæутæ се ‘ппæт дæр æрцæудзысты газификаци. Ног азы хæдразмæ Президент дзыллон информацийы фæрæзтимæ цы пресс-конференци ауагъта, уым райгон-дæй фехъусын кодта, ацы аз уыцы куыстытæм кæй бавналдзысты. Ацы фарст скъуыддзаг куы æрцæуа, республикæйы газотранспортон инфраструктурæ куы скуса, уæд уый ахъаз уыдзæн хъæууон хæдзарадæн æмæ экономикæйы рæзтæн.
Уæрæсейы Федерацийы къухдариуæгад æмæ хицæнæй сисгæйæ та «Газпром», нæ республикæмæ цы ахаст дары, уымæн æнæгуырысхойæ хъæуы аргъ кæнын! Уадз, алчи дæр бæрндзинад æнкъара æмæ зона фиддонтæн æнæфидгæ кæй нæй.
УАЗÆГТЫ Марфа
Comments are closed, but trackbacks and pingbacks are open.