Бахардз кодтай электроэнерги, газ – бафид сын сæ аргъ

Нæ республикæйы цæрджытæй бирæтæ электроэнерги æмæ газы тыххæй сæ фиддонтæ кæй нæ фидынц, ууыл дзырд фæцæуы æндæр æмæ æндæр æмвæзадтыл.

Республикæйы электроэнерги æмæ газифтонгады службæтæ ахæм цæрджытæн бæргæ бамбарын кæнынц, фиддонтæ афоныл куынæ фидой, уæд хицæн кæй æрцæудзысты ацы лæггæдтæ, фæлæ иуæй-иу абоненттæ куыд нæ фыстой къорд азты дæргъы, афтæ сæ нæ фидынц ныр дæр. Абонент, кæцыйæн, газæй пайдагæнгæйæ, йæ фиддон ахызт 5 мин сомæй, хъуамæ ахицæн æрцæуа газы хаххæй æмæ уый æнæнхъæлæджы ма хъуамæ уа абонентæн. Цалынмæ ацы службæйы кусджытæ газ нæ ахицæн кæнынц, уæдмæ контролер бафæдзæхсы уый тыххæй бинонты. Дæс боны куы рацæуы, уæд газы службæйы кусджытæн бар ис абонентæн æрдзон газ ахицæн кæнын.

Хъыгагæн, абонентæн æрмæстдæр йæ газ æмæ рухс куы æрцæуынц хицæн, уæд базмæлынц.

Газы службæйы кусджытæ куыд зæгъынц, афтæмæй, 2017 азмæ абаргæйæ, 2018 азы фиддонтæ фидыны уавæр чысыл фæхуыздæр. Фæлæ уæддæр арæх бахъæ-уы, газы фиддонтæй стыр хæстæ кæмæн ис, ахæмты ахицæн кæнын. Хуыздæр, дам, уаид, æмæ цæрджытæ цалынмæ хицæн не ‘рцæуынц æрдзон газæй, уæдмæ амал куы скæниккой сæ фиддонтæ бафидынæн, уадз, фидой хайгай, чысыл суммæтæ хæсгæ, фæлæ – стабилонæй. Науæд, уый фæстæ инструкци куыд амоны, уымæ гæсгæ коммуникацитæм куы иу кæной абонентты, уæд хъуамæ бафидой уæлæмхас æхцайы фæрæзтæ. Стæй  хызæгтæй кæй ахицæн кæнынц, ууыл арæзт æрцæуы акт дæр æмæ йæ хъуыддаг æрвыст æрцæуы тæрхондонмæ.

Ахæм æнгæс тенденци ис энергетикæйы фадыджы дæр. Энергохызæджы системæйы та хицæн цæуынц ахæм абоненттæ, кæцытæн сæ фиддонтæ схызтысты 3 мин сомæй. Уыдоны ныхмæ дæр ист цæуынц æнгæс мадзæлттæ.

Хъуамæ алчидæр æмбара, «Энергоресурс»-ы куыстуатыл негативонæй кæй æндавынц, нæ цæрджытæ фиддонтæ кæй нæ фидынц афоныл, уыцы хъуыддаг. «РАОЭС»-ы раз йæ хæстæ азæй-азмæ фылдæр кæнынц. Уæ зæрдыл дарут, æндæр республикæтæй уæлдай махмæ газ æмæ электроэнергийы фиддонтæ кæй нæ фæфылдæр сты 2019 азæн. Хъуамæ ма рох кæнæм, цалдæр азы размæ дæр ма ацы лæггæдтæй цух куы уыдыстæм, уæд цы зындзинæдтæ æвзæрстам.

Ныртæккæ Хуссар Ирыстоны газы кубометры аргъ у 4,27 сомы, Цæгат Ирыстоны та – 5,47 сомы. Нæ хъæуты газификацийы фæдыл проект реализаци куы æрцæуа, уæд «Газпром» Хуссар Ирыстоны газы тарифтæ хъуамæ скæна цæгатирыстойнаг тарифты онг. Уый æмбæрстгонд у, уымæн æмæ алы организаци дæр кусы æмæ архайы йæхи æфтиагыл.

Уæрæсейы Федераци нæ республикæйæн цы æххуыс кæны, уымæн æнæгуырысхойæ хъæуы аргъ кæнын. Æмæ алчидæр бæрндзинад хъуамæ æнкъара æмæ зона, коммуналон фиддонтæн æнæ фидгæ кæй нæу.

Нæ уацх.