Хуссар Ирыстоны президент Гаглойты Алан къуырисæры ауагъта кусæгон æмбырд республикæйы районты администрациты сæргълæуджытимæ. Фембæлды ма хайад райста премьер-министр Джуссойты Константин.
Фыццаг йæ бакæнгæ куысты тыххæй хыгъд радта Ленингоры районы администрацийы сæргълæууæг Гæджиты Иларион. Йæ ныхæстæм гæсгæ, ацы бынатмæ йæ куы снысан кодтой, уыцы бонæй рацыд иу мæй, æмæ ныридæгæн сæ къухты бафтыд бирæ плæнттæ среализаци кæнын æмæ проблемæты иу хай аскъуыддзаг кæнын. «Районы нæй техникæ, кæцы нæ къуылымпы кæны нæ плæнттæ сæххæст кæнынæн, фæлæ нын уæддæр саразын бирæ бантыст – уалдзыгон-сæрдыгон тæрккъæвдатæ бахъыгдардтой хъæутæм фæндæгты иу хай. Цалдæр хъæумæ ныри-дæгæн сæндидзын кодтам фæндæгтæ, куыст цæуы иннæ хъæутæм дæр сæ сæндидзын кæныныл», – загъта уый. Фæлæ, уымæ нæкæс-гæйæ, тыхджын къæвдатæ ракодтой стыр зиæнттæ æмæ сæ афоныл куынæ аиуварс кæнæм, уæд проблемæтæ баззайдзысты уалдзæгмæ æмæ сæ аскъуыддзаг кæнын уыдзæн вазыгджындæр. Цæмæй фарст тагъддæр скъуыддзаг æрцæуа, уый тыххæй æнæ-мæнгхъæуæг у техникæ, афтæ ма бетонон конструкцитæ дæр сæ бындуртæ сфидар кæнынæн. Хайгай ма скъуыддзаг æрцыд доны фарст дæр – къорд хъæумæ уагъд æрцыдысты доны хæтæлтæ æмæ дон адæттыны шлангтæ.
Уымæй дарддæр ма, къуырийы кæрон æрцæудзæн машинæ, кæцы газ ласдзæн Ленингоры районы хъæутæм. Резервуары уыдзæн аст кубометры газ, кæцыйы йедзаг кæндзысты Цхинвалы æмæ йæ ласдзысты хъæутæм.
Президент банысан кодта, зæгъгæ, фæн-дæгтæ, дон æмæ газ сты районы хъæуты сæйрагдæр проблемæ бирæ азты дæргъы.
Цхинвалы район
Цхинвалы районы администрацийы сæргълæууæг Бæззаты Инал фехъусын кодта президентæн, зæгъгæ, ног ахуыры азмæ æртæ скъолайы æрцæудзысты косметикон цалцæг, ноджы ма цалдæр скъолайы райсдзысты ног хъармгæнæн котелтæ. Æппæт куыстытæ дæр фæуыдзысты сентябры райдианмæ. Бынæттон цæрджыты ахсджиаг проблемæ у дон, кæцы цæуы чъизийæ æмæ нæ фаг кæны. Бæззаты Иналы хъуыдымæ гæсгæ, хъæуы график саразын донæн, фæлæ йæ среализаци кæнын нырма къухты не ‘фты. Иуæй-иу хъæу-тæн æнæмæнгхъæуæг у доны ног гуырæнтæ ссарын.
Гаглойты Алан æрсидт администрацийы сæргълæууæгмæ, цæмæй хъусдард аздаха зæххы фадгуытæм, кæцыты цæрджытæ райстой арендæйы хицауадæй. Уыдонæй бирæтæ куыстгонд нæ цæуынц, æнæхъуаджы лæууынц æмæ къутæр кæнынц. «Юстицийы министрадимæ иумæ æнæмæнгхъæуæг у зæххытыл ревизи саразын. Бирæтæ райсынц зæххы фадгуытæ, нæ фидынц арендæйæн æмæ сæ нæ кусынц», – бафиппайдта паддзахады сæргълæууæг.
Знауыры район
Дыууæ мæймæ нæ къухы бафтыд 12 хъæумæ 22 километры фæндæгтæ сæндидзын кæнын, – фехъусын кодта Знауыры районы администрацийы сæргълæууæг Гобозты Алан. Афтæ ма аст хъæумæ бауагътам дон. Йæ ныхæстæм гæсгæ, районы сæйрагдæр проблемæтæй иу у, донуадзæн хæтæлтæм æндæр объекттæ кæй сиу кæнынц, уый, кæцыты тых-хæй æрхауы доны æлхъывдад æмæ дон алкæмæ нал фæхæццæ вæййы.
Гаглойты Алан бахæс кодта æппæт цæр-джытæн дæр информаци фехъусын кæнын, ахæм архайдæн бар кæй нæй, уый тыххæй. Æмæ уый фæстæ хъæуы басгæрстытæ рай-дайын æмæ хивæндæй донуадзæн хæтæлмæ объект чи сиу кæна, уыдоны бæрндзинадмæ кæнын.
Дзауы район
Донифтонгадимæ проблемæтæ ис Дзауы районы дæр. Администрацийы сæргълæууæг Тыбылты Вандæйы ныхæстæм гæсгæ, сбæрæгчындæуыд донуадзæн хæтæлы атынд, кæцыйы фæстиуæгæн бирæ азты дæргъы 50 проценты дон æнæхъуаджы сæфт, фадыг цалцæг æрцыд, фæлæ уайтагъд æндæр ран атыдта, доны æлхъывдад кæй фæбæрзонддæр, уымæ гæсгæ – ацы фадыг сцалцæг кæнын нын нырма нæ бантыст.
Тыбылты Вандæ хицæнæй банысан кодта электроны рухсимæ проблемæтæ дæр, цæмæй уагъд æрцæуа, уый тыххæй хъæуы «телтæ айвазын».
Горæт Къуайсайы администрацийы сæргълæууæг Хуыгаты Аланы ныхæстæм гæсгæ, ацы аз сæйраг куыстытæ æххæст æрцæудзысты горæтæн йæхи мидæг – бирæфатерон хæдзæртты сцалцæг кæндзысты бацæуæнтæ. Афтæ ма фехъусын кодта доны проблемæйы тыххæй, кæцы цæуы чъизийæ æмæ нуазынæн нæ бæззы.
Президент бахæс кодта иннæ æмбырдмæ фарстыл бакусын – зæронд донуадзæн среставраци кæнын æмæ донсыгъдæггæнæнтæ сæвæрын, кæнæ та дон æндæр ранæй рауадзын. Уый æнæмæнгхъæуæгыл нымайы горæт Къуайсайы цæрæнуатон къамис саразын, кæцы скъуыддзаг кæнид горæты хæдзæрттæ дих кæныны тыххæй фарст, афтæ ма карзæй скъуыддзаг æрцæуа, республикæйы районты дыгай æмæ фылдæр бынæтты чи кусы, уыцы фарст дæр.
Comments are closed, but trackbacks and pingbacks are open.