Республикæ Хуссар Ирыстоны Президент Гаглойты Алан æрæджы ауагъта æмбырд горæт æмæ районты администрациты сæргълæуджытимæ. Бæрæг куыд у, уымæ гæсгæ бæстæйы разамонæг æрвыл къуыри дæр æмбæлы Администрациты сæргълæуджытимæ æмæ зонгæ кæны горæт æмæ районты цæрджыты проблемæтимæ.
Æмбырды хайад райстой Хицауады Сæрдар Джуссойты Константин, Президенты Администрацийы къухдариуæггæнæг Джиоты Алан, Арæзтад, архитектурæ æмæ цæрæн-коммуналон хæдзарады директор Зæгъойты Эдуард, Арæзтад æмæ автомобилон фæндæгтæ эксплуатацимæ дæттыны фæдыл комитеты сæрдар Елдзарты Константин æмæ æндæр бæрнон кусджытæ.
Бæстæйы разамонæг цымыдис кодта, нæ республикæйы столицæйы уынгты хæрзарæзтадыл цы куыст цæуы, уымæ. Горæты Администрацийы сæргълæууæджы хæдивæг Лолаты Жаннæйы ныхæстæм гæсгæ, ныртæккæ куыст цæуы цалдæр уынгыл машинæвæндæгты хъæндзинæдтæ аиуварс кæныныл.
Цхинвалы районы Администрацийы сæргълæууæг Бæззаты Инал цы информаци сарæзта, уымæ гæсгæ районы цæрджытæ цы сæйраг проблемæтыл æмбæлынц, уыдоны фылдæр хай сты фæндæгты æдзæллаг уавæр, нуазыны доны хъуагдзинад æмæ хатт йæ ифтонгады къуыхцытæ. Уымæй дарддæр ма хынцыд цæуы хъæуты уынгты электроны рухсыты хъуагдзинад.
Куыд банысан кодта, уымæ гæсгæ нуазыны донæй ифтонгад къорд хъæуы бæстон æрцыд. Фæлæ цæрджытимæ ныхасгæнгæйæ, бæрæг кæнынц ног проблемæтæ, уыдон æхсæн фæндæгты æмæ цæрæн хæдзæртты æдзæллаг уавæр. Финансон фæрæзты кадавардзинады аххосæй проблемæты фылдæр хай хаст æрцæуы иннæ азмæ.
Йæ ныхæстæм гæсгæ, районы Администрацийы тыхтæй Арцеу æмæ Къостайыхъæуы бынæттон скъолатæ цалцæг кæныны хъуыддаг кæронмæ бахæццæ. Куыст дарддæр цæуы Джер, Къостайыхъæу, Дампъалет æмæ Рустауы хъæутæм фæндæгтæ цалцæг кæныныл.
Уыцы рæстæджы ма Администрацийы сæргълæууæг банысан кодта, æмбæлæм техникæ кæй цъæл кæны æмæ сын ивæн хæйттæ кæй нæй, уыцы проблемæйы. Фæлæ йæ ныфс ис, æввахс рæстæджы фарст бæстон кæй æрцæудзæнис, уымæй.
Бæззаты Иналы ныхæстæм гæсгæ ма районы хъæутæй сæ иуы цы проблемæ хъæуы æрбæстон кæнын, уый у цæрæн хæдзары арæзтад. Хъуыддаг уый мидæг ис, æмæ йæ арæзтадмæ æрæвнæлдæуыд, фæлæ йыл ныртæккæ куыст нал цæуы. Йæ арæзтады тыххæй фæрæзтæ хицæн нæ цæуы. Æмæ йæ хицæуттæн та нæй, кæм цæрой, уый.
Гаглойты Алан банысан кодта, кæй у зонгæ ацы проблемæимæ.
«Районы цæрджытæ бахатыдысты ацы проблемæ æрбæстон кæныны тыххæй. Куыд рабæрæг, уымæ гæсгæ хæдзæртты арæзтадыл контроль кодта Президенты раздæры Контролон управленийы къухдариуæггæнæг.
Фарсты фæдыл семæ ныхас цыд. Йæ æрбæстон кæнынæн ис дыууæ фæрæзы: кæнæ æхцайы фæрæзтæ хъуамæ æрбаздахой фæстæмæ, кæнæ арæзтад кæронмæ хъуамæ конд æрцæуа. Ныфс бавæрдтой, сентябры мæйы кæрон кæй æрæвналдзысты цæрæн хæдзæртты арæзтад кæронмæ бакæныны хъуыддагмæ», – дзырдта бæстæйы разамонæг.
Знауыры районы уæвæг проблемæтæ рæгъмæ рахаста районы Администрацийы сæргълæууæг Гобозты Алан. Йæ ныхæстæм гæсгæ районы карзæй лæууы электроадæттæн цæджындзты аварион уавæр. Бæрæг цæуы нуазыны доны хъуагдзинад дæр.
Куыд банысан кодта, уымæ гæсгæ нуазыны донæй ифтонг æрцыд Убиаты хъæуы. Ахæм куыстытæ кæронмæ конд æрцæудзысты Терегуаны хъæуы дæр. Фæлæ ацы проблемæ нырма ис Арчънеты хъæуы, уымæн æмæ нæма ссардæуыд, нуазыны дон кæцæй хъуамæ уагъд æрцæуа, уыцы бынат.
Дзауы районы Администрацийы сæргълæууæг Тыбылты Вандæйы ныхæстæм гæсгæ, районы цалдæргай бынæтты чи кусы, уыдоны фарст проблемон у нырма дæр. Цалдæр бынаты чи кусы, уыдон фæдзæхст куы æрцæуынц, уæд чи лæгъзтæ фæкæны, чи та тæрхондонон органтæм курдиат бадæттынæй фертхъирæн кæны.
Фæлæ алы адæймаг дæр хъуамæ æмбара, уал бынаты кусгæйæ æндæр æмбæстаг та æгуыстæй кæй бады хæдзары.
Банысан кæнын хъæуы уый, æмæ ацы проблемæ актуалон у иннæ районты дæр.
Бæстæйы разамонæг бахæс кодта районты сæргълæуджытæн, цæмæй къуырийы æмгъуыдмæ æрбæстон кæной ацы фарст, уымæн æмæ уый гæнæн нæй, æмæ иу адæймаг цалдæр бынаты куса.
Ленингоры районы Администрацийы сæргълæууæг Гæджиты Илларионы ныхæстæм гæсгæ, районы хынцыд цæуы æрдзон газы хъуагдзинады проблемæ æмæ æмбæстæгтæ æнæвгъау æрдзон ресурстæ кæй куынæг кæнынц, уый. Æмбæстæгтæ электроны тыххæй пайдагæнгæйæ донбадæнты куынæг кæнынц кæсаджы мыггаг. Афтæмæй уым æввахс рæстæджы æппындæр нал баззайдзæн кæсаг.
Гаглойты Алан бахæс кодта ацы проблемæ æрбæстон кæныны тыххæй барадхъахъхъæнæг органтæм фехъусын кæнын.
Нæ уацх.
Comments are closed, but trackbacks and pingbacks are open.