Ацы бонты Хуссар Ирыстоны Президент Гаглойты Алан бабӕрӕг кодта республикӕйы иууыл егъаудӕр рауагъдадон уагдон – хуыйӕн фабрикӕ БТК-4.
Банысан кӕнын хъӕуы уый, ӕмӕ Хуссар Ирыстоны территорийыл ацы уагдон архайын кӕй райдыдта 2013 азы раздӕры хуыйӕн фабрикӕйы базӕйыл. БТК-4 ис уӕрӕсейаг холдинг «БТК къордты» сконды ӕмӕ у алы фадыджы сӕрмагонд уӕлӕдарӕсыл бакусын, рауадзын ӕмӕ реализаци кӕныны уӕрӕсейаг размӕдзыд ком-панитӕй сӕ иу.
Бӕстӕйы сӕргълӕууӕг йӕ балцы рӕстӕджы базонгӕ рауагъдады куысты уавӕртимӕ, ныхас кодта уагдоны къухдариуӕгад ӕмӕ кусджытимӕ. Фенын ын кодтой рауагъдадон ӕмӕ ахуыргӕнӕн цехтӕ. Ныртӕккӕ дзы ахуыр кӕнынц 20 адӕймагӕй фылдӕр, уыдон ӕввахс рӕстӕджы ифтонг ӕрцӕудзысты куысты бынӕттӕй.
Хуыйӕн фабрикӕйӕн стыр нысаниуӕг ис
Президент Гаглойты Алан хуыйӕн фабрикӕйы къухдариуӕгад ӕмӕ «БТК къордты»-йы минӕвӕрттимӕ æмбырды рӕстӕджы банысан кодта, Хуссар Ирыстоны фабрикӕ БТК-4-йæн стыр нысаниуӕг кӕй ис, уымӕн ӕмӕ не ‘мбæстæгтæн фадат дæдты сæ бинонты дарынæн.
БТК къордты»-ы холдингы хицау Боллоты Таймуразимӕ, зӕгъгӕ, куы фембӕлдыстӕм, уӕддӕр бӕрӕг уыд, ацы куыстуатмӕ стыр хъусдард здӕхт кӕй цӕуы. Таймураз йӕ ӕххуысы къух даргъ кӕны йе ‘фсымӕртӕ ӕмӕ хотӕм, ӕмӕ у йӕ ныхасы хицау. Хуссар Ирыстоны ноджыдӕр ног кусӕн бынӕтты арӕзтадыл ныхасы. Ӕмӕ уый хӕдфӕстӕ нӕ республикӕмӕ ӕрцыдысты Боллойы фырты минӕвӕрттӕ, арӕзт ӕрцыд иумæйаг кусӕгон къорд, ӕмӕ йын йӕ фӕстиуджытӕн ӕвдисӕн стӕм мах.
«Махӕн сӕйраг у, куысты бынӕттӕ арӕзт кӕй цӕуы ӕмӕ нӕ цӕрджытӕ, уыцы нымӕцы ӕвзонг фӕсивӕдӕн дӕр фадат кӕй ис куыстӕй ифтонг уæвынæн. Ныртӕккӕ куыст цӕуы рауагъдады хъомыс фӕфылдӕр кӕнын ӕмӕ республикӕйы территорийыл хуыйӕн фабрикӕйы филиалтӕ бакӕныныл. Уыимӕ иумӕ ма куыст цӕуы бирӕпрофилон колледжы базӕйыл хуыйӕн хайад байгом кӕныныл, цӕмӕй фабрикӕмӕ кусынмӕ цӕуой цӕттӕ специалисттӕ», – дзырдта Президент.
Нӕ республикӕмӕ цы инвестортӕ се ‘ргом раздахой, уыдон фарсмӕ балӕудзӕн бӕстӕйы къухдариуӕгад. Уымӕн ӕмӕ сын ӕмбӕлон гарантитӕ ӕмӕ рӕстмӕ ахаст куынӕ уа, уӕд нӕ республикӕмӕ ничи ‘рцӕудзӕн. «Мах та хъуамӕ саразӕм кусӕн бынӕттӕ, цӕмӕй бюджетмӕ цӕуой фиддонтӕ ӕмӕ адӕм куыстӕй ифтонг цӕуой. Ӕрмӕстдӕр уӕд нӕ республикӕ размӕ цӕудзӕн», – загъта Президент.
Уый ӕгӕрон арфæтæ ракодта не ‘мбӕстаг Боллоты Таймуразæн, Хуссар Ирыстоны адӕмӕн куысты уавӕртӕ кӕй аразы, хуыйӕн фабрикӕйы коллективӕн та сӕ куысты тыххӕй.
Фӕсивӕды цалх кӕнынц куыстыл
Хуыйӕн фабрикӕйы директор Цакъоты Артур куыд банысан кодта, афтæмæй бӕстӕйы сӕргълӕууӕг «БТК къордты» минӕвӕрттимӕ фембӕлды рӕстӕджы куысты бынӕттӕ фӕфылдӕр кӕныныл кӕй бауынаффӕ кодтой, уый фӕстиуӕгӕн гом ӕрцыд дыууӕ ног цехы. Уыдонӕй иу у ахуырадон-рауагъдадон. Ахуыр дзы кӕнынц 20 адӕймаджы ӕмӕ иннӕ та у рауагъдадон. Уым та кусы 33 адӕймаджы.
«Азы райдианӕй фӕстӕмӕ куыстмӕ райстам 86 адӕймаджы, сӕ фылдӕр сты фӕсивӕды минӕвӕрттӕ. Уымӕн ӕмӕ нӕ сӕйраг хӕс у, нӕ уагдонмӕ фӕсивӕды ӕрбахонын ӕмӕ сӕ куысты бынӕттӕй сифтонг кӕнын», – банысан кодта уый.
Компани зӕрӕмӕдзӕугӕ куыстуат у. «Астӕуккаг куыстмызды бӕрц у 60 мин сомы, вӕййы, афтӕ дӕр ӕмӕ кусджытӕ райсынц сӕдӕ минӕй фылдӕр суммӕтӕ. Куыстмӕ хонӕм ӕрмӕст адӕймагады уӕздан хайы нӕ, фӕлӕ нӕлгоймӕгты дӕр. Уымӕн ӕмӕ уыдон дӕр иттӕг хорз кусынц, хатт сылгоймӕгтӕй хуыздӕр», – загъта БТК-4 директор.
Архайӕм иумæйаг хъуыддагыл
Хуыйӕн фабрикӕйы куысты уавӕртимӕ базонгӕйы фӕстӕ информацион фӕрӕзтӕн Гаглойты Алан афтӕ радзырдта, зӕгъгӕ, Хуссар Ирыстонӕн сӕйраг ӕмӕ ахсджиаг у, ног куысты бынӕттӕ арӕзтимæ ма куыст цӕуы республикӕйы районты куысты бынӕттӕ бакӕныны фарстыл. Уый тыххӕй та хъӕуы ӕмбӕлон бӕстыхӕйттӕ, æмбæлон уавӕрты арæзтад, ифтонггӕрзтӕ. Районты сӕргълӕуджытӕн бахӕс ӕрцыд, цӕмӕй саразой, уагдӕтты кусыны фӕнд чи кӕны, уыдоны номхыгъдтӕ.
Мах, зӕгъгӕ, архайӕм иумæйаг хъуыддагыл ӕмӕ нӕ республикӕйы территоримӕ цы инвестор ӕрцӕуа, уый хъуамӕ ӕнкъара бӕстӕйы разамынады фарсхӕцынад. Боллоты Таймуразæн, зæгъгæ, аргъ кæнæм йæ иузæрдион архайдæн æмæ йæ æмбарæм.
