Цæгат Ирыстон-Аланийы Нывгæнджыты цæдисы равдыстыты залы фыццаг хатт байгом не ‘мзæххон сылгоймаг, нывгæнæг-график Быценты Гулойы (Дзерассæ) персоналон равдыст.
Быценон райгуырдис Ленингоры районы Цъинагары хъæуы. Скъолайы фæстæ ахуыр кодта Цæгат Ирыстоны зындгонд ирон график Цогъойты Эльбрусы къухдариуæджы бын æмæ ныр куыд рабæрæг, афтæмæй йын нывкæнынады стилы ис стыр æнтыстытæ. Быценты Гуло йæ равзаргæ дæсныйадыл æнувыд кæй у, уый зыны йæ куыстыл скъоладзау фæсивæдимæ дæр. Уый разамынд кæны Ленингоры районы Сывæллæтты сфæлдыстадон галуанæн. Йæ хъомылгæнинæгтимæ хайад райсынц куыд районы, афтæ республикон æрмдæсныты фестивалты. Ивгъуыд азы та йæ инициативæмæ гæсгæ Цхинвалы Сывæллæтты сфæлдыстадон галуаны фыццаг хатæны республикæйы районты сывæллæтты сфæлдыстадон галуантæн уагъд æрцыдис декоративон-прикладон æмæ хуызфыссынады аивады фестиваль «Мир творчества», зæгъгæ, ахæм номимæ æмæ сæ бæркадджын равдыстæй адæмы дисы æфтыдтой.
Быценты Гуло йæ персоналон равдыстмæ бахаста 60 куыстмæ æввахс. Уыдон фылдæр сты фантастикон стилы, нывгæнæджы сисы бын ногæй райгуырдысты нарты кадджытæ, ссардтой ног цард. Уымæй дарддæр ма нывгæнæджы аивады бæрæгæй зыны уарзондзинады темæ æмæ сылгоймаджы рæсугъддзинад. Нывтыл бæрæгæй зыны нывгæнæджы индивидуалон æрмдзæф.
Персоналон равдыстмæ фæуазæг сты Цæгат Ирыстоны Нывгæнджыты цæдисы уæнгтæ æмæ аивадæн табугæнджытæ. Равдыст байгом кодта Нывгæнджыты цæдисы сæргълæууæг Мæргъиты Таймураз æмæ банысан кодта персоналон равдысты ахадындзинад æмæ нысаниуæг. «Мах иу Ирыстон кæй стæм, ууыл дзурæг у нæ культурæ дæр. Цæгаты дæр æмæ хуссары дæр уый тыххæй чи кусы, уыдоны фарсмæ кæддæриддæр æрбалæууын хъæуы. Абон мах Быценты чызджы куыстытæм куы бакæсæм, уæд зæгъдзыстæм, йæ аивадæй адæмы зæрдæтæ кæй рухс кæны, уый. Адæймагмæ æвзæрын кæнынц æвæрццаг эмоцитæ æмæ рæсугъд хъуыдытæ», – банысан кодта уый.
Уæрæсейы адæмон нывгæнæг Чилæхсаты Магрез та адæмы зæрдыл æрлæууын кодта Быцен-ты Гулойы студентон азтæ. Цæгат Ирыстоны куыд ахуыр кодта æмæ куыд тырныдта ацы дæсныйад райсынмæ, уый. «Мæнæн тынг цæуынц Быценоны куыстытæ мæ зæрдæмæ. Уыдон сты фæлмæн æмæ аив. Зыны сæ йæ удыхъæд дæр. Никуы хъуыды кæнын уый, æмæ искуы йæ лекцитæ рауагъта, науæд сæм байрæджы кодта. Æз сæрыстыр дæн, ацы курдиатджын æмæ æгъдауджын сылгоймаг нæ ахуыргæнинаг кæй уыд, уымæй», – банысан кодта нывгæнæг.
Быценты чызгыл йæ персоналон равдысты байгомы бон цы бирæ арфæтæ сæмбæлд, уыдон ыл хорз тæлмæнтæ ныууагътой æмæ сæ нырæй фæстæмæ æхсызгонæй йæ зæрдыл дардзæнис. Йæ равдыстæн та йын цæгатирыстойнаг аивадуарзджытæ аргъ кæндзысты ацы мæйы кæронмæ.
ЦХУЫРБАТЫ Ларисæ
