Хуссар Ирыстоны Хъæууон хæдзарады министрадмæ цæрджытæ арæхдæр бахатынц, ставд æмæ лыстæгкъах фос, афтæ ма хуытæ дæр цæрæгойтæн тæссаг низ пироплазмозæй кæй фæрынчын вæййынц, уый тыххæй. Низхæсджытæ сты иксодон джыбытæ, – фехъусын кодта Цхинвалы районы ветеринарон службæ-йы кусæг, ветеринарон зонæдты кандидат Лолоты Владимир.
Йæ ныхæстæм гæсгæ, фæстаг рæстæджы республикæйы сарæх сты хъæууонхæдзарадон цæрæгойтæ пироплазмозæй кæй фæрынчын вæййынц, ахæм цаутæ, уыимæ низ бахæцы куыд куыйтæ, гæдытыл, афтæ хъæддаг цæрæгойтыл дæр.
Лолоты Владимир ма куыд банысан кодта, афтæмæй низы цырынгæнджытæ сты хуымæтæджы паразиттæ æмæ цæрæгойæн афоныл æмбæлон æххуыс куынæ æрцæуа, уæд, гæнæн ис, амæла. Ветеринартæ рекомендаци кæнынц, цæмæй цæрæгойтæн сæ буар арæхдæр сгарой хъæндилты уæвынады тыххæй, уымæн æмæ сыл хъæндил куы фæхæцы, уæд сæм инфекци баирвæзы. «Хъæндилтæй сæ бахизыны тыххæй фосы систематикон æгъдауæй хъæуы специалон акарицидон препараттæй пырх кæнын, æмæ сæ буарыл хъæндилтæ куы ссардæуа, уæд сæ хъæуы скуынæг кæнын. Кæд æмæ цæрæгойæн йæ тæвд схиза 40-42 градусмæ, сæ улæфт æмæ зæрдæйы куыст фæтыхджындæр уа, сæ гуыбынтæ риссын райдайой, сæ доны хуыппы хуыз фæива, уæд уый нысан кæны цæрæгой пироплазмозæй кæй фæрынчын, уый. Уымæ гæсгæ æнæмæнгхъæуæг у æвæстиатæй ветеринартæм бахатын, цæмæй йын афоныл хос æрцæуа», – загъта ветеринар.
Пироплазмозы профилактикæйы тыххæй фыццаг рады хъæуы низхæсджытæ – джыбыты ныхмæ тох кæнын. Лолоты Владимир бакуыста æмæ Хъæууон хæдзарады министрадмæ æрбавдыста нысанон программæ ацы уырынгонты ныхмæ тох кæныны тых-хæй, цыран нысан æрцыд æмбæлон мадзæлтты комплекс.
Comments are closed, but trackbacks and pingbacks are open.