Национ политикæ, культурæ, дин æмæ дзыллон информацийы фæрæзты фæдыл парламентон комитеты æруынаффæ кодтой «Хуссар Ирыстоны истори»-йы ахуыргæнæн чиныг рауадзыны фæдыл рекомендацитæ сæххæст кæныныл.
Комитеты сæргълæууæг Диакъонты Амиран банысан кодта, зæгъгæ, Хуссар Ирыстоны историйы ахуыргæнæн чиныг рауадзыны проблемæ у национ политикæйы æнæаргъæвгæ фарст æмæ йæ хъæуы аскъуыддзаг кæнын.
«Президент Парламент æмæ адæммæ йæ Ныстуаны хъусдард аздахын кодта, ахæм ахуыргæнæн чиныг нæм кæй нæй, уымæ æмæ, зæгъгæ, ацы фарст скъуыддзаг кæй нæма æрцыд. Комитет ацы фарсты фæдыл ауагъта рабадт æмæ хæслæвæрдтæ радта æмбæлон органтæн», – загъта Диакъоны фырт.
Ахуырады министр Лолаты Аслан радзырдта, хæслæвæрды хатдзæгтæм гæсгæ комитеты сæрдар Диакъонты Амираны номыл æрвыст æрцыд фыстæг.
«Фембæлдтæн президентимæ. Уый банысан кодта, ацы азы декабры мæйы министрад кæй райсдзæн историйы ахуыргæнæн чиныджы макет йæ версткæйы гъæд равзарын æмæ чиныджы мидис историйы ахуыргæнджытæм анализмæ радтыны тыххæй. Ирон æвзаг æмæ литературæйы рæзты программæйы ис æхцайы фæрæзтæ йæ рауадзын æмæ республикæйы ахуырадон уагдæттыл адих кæныны фаг. Мах ныр æнхъæлмæ кæсæм макетмæ», – загъта Лолайы фырт.
Диакъонты Амиран банысан кодта, зæгъгæ, ацы фарсты фæдыл комитеты ивгъуыд рабадты, Ахуырады министрадæн бахæс æрцыд Хуссар Ирыстоны историйы фæдыл ахуыргæнæн чиныг рауадзыны закъазы барадон формæ сбæрæг кæнын. Уый ма загъта, зæгъгæ, куысты барадон формæ ис, цæмæй чиныджы рæдыдтытæ уагъд ма æрцæуой.
«Уымæй уæлдай ма, комитеты уый размæйы рабадты ист æрцыд уынаффæ къамис ног скондæй саразын, уырдæм профессор Бзарты Русланы æмæ республикæйы æндæр зынгæ ирон ахуыргæндты фæхонын. Уыдон та сæ рады бавдисгæ æрмæджыты бындурыл хъуамæ сахуыр кодтаиккой æрбавдыст куыстытæ, цæмæй «куыдфæндыйæ» ма æрымбырд кæной æмæ радтой макет», – загъта Диакъоны фырт.
Комитеты сæргълæууæг банысан кодта, зæгъгæ, ахæм масштабон æмвæзады куыст хъуамæ арæзт æрцæуа æмбæлон барадон арæнты.
«Ома æмбæлон æгъдауæй хъуамæ арæзт æрцæуа къамис, æмбæлон æгъдауæй хъуамæ ист æрцæуа ацы къамисы куыст, æмæ ацы къамисы куысты уагæвæрды хъуамæ ирдæй фыст æрцæуа къамисы куысты æппæт спецификæ. Мах уый фæдыл дзырдтам комитеты уый размæйы рабадты, æмæ та йыл ногæй дзурæм», – загъта Диакъонты Амиран.
Ахуырады министр банысан кодта, зæгъгæ, барадон формæтæ ис, чиныджы мидисы фæдыл куыст фактон æгъдауæй фæцис.
«Ныртæккæ нæ разы лæууы хæс, цæмæй чиныг версткæ æрцæуа, зонадон æвзагæй йæ ракæнын хъæуы скъолайы æвзагмæ æмæ йемæ хъуамæ базонгæ уой историйы ахуыргæнджытæ», – загъта уый.
Хуссарирыстойнаг зонад-иртасæн институты директор Гаглойты Роберт банысан кодта, зæгъгæ, чиныгыл куыст фæуд кæны.
«Зонад-иртасæн институты кусджытæ бакуыстой чиныгыл, æмæ йæ æз не ‘мбарын, ног къамис цæмæн хъæуы аразын, уый. Мах æппæт скъолаты ахуыргæнджытæй райстам фиппаинæгтæ. Уыдон базонгæ сты чиныджы мидисимæ æмæ сæ бахынцыдтой. Ацы чиныджы рацыд махæн ахсджиаг хъуыддаг у. Фæлæ у зын æмæ егъау куыст, æмæ уый дæр хъæуы хынцын. Мах фæнды, цæмæй 2024 азы чиныг райсой республикæйы ахуырадон уагдæттæ», – загъта Гаглойы фырт.
Комитеты сæргълæууæг банысан кодта, Парламенты æмæ Президенты фарсæрдыгæй ацы проблемæмæ кæй ис лæмбынæг хъусдард.
«Нæ комитеты фыццаг рабадты фæстæ мах ныхас кодтам Президентимæ, æмæ уый бахатыд Парламентмæ, цæмæй æппæт мадзæлттæ райсыны тыххæй, цæмæй Хуссар Ирыстоны историйы фæдыл ахуыргæ-нæн чиныг рауадзыны фарст аскъуыддзаг кæныныл», – банысан кодта Диакъоны фырт.
Уый бафиппайдта, зæгъгæ, барадон фарст нырма скъуыддзаг не ‘рцыд.
«Ныхас кодтам Юстицийы министримæ. Уый фембæлдзæн Ахуырады министримæ æмæ бæрæг æрцæудзысты барадон хицæндзинæдтæ, кæцыты фæдыл хъуамæ арæзт æрцæуа ацы чиныджы рауагъд. Уымæй уæлдай ма, Роберт Хазбийы фырт ныхас кæндзæн Бзарты Русланимæ æмæ бацархайдзæн, цæмæй чиныджы макеты тагъддæр сырæза», – йæ ныхасмæ бафтыдта Диакъоны фырт æмæ бацымыдис кодта, цас рæстæг бахъæудзæн ацы хæслæвæрдтæ сæххæст кæнынæн, зæгъгæ.
Гаглойты Роберт банысан кодта, зæгъгæ, чиныджы макет цæттæ уыдзæн ацы аз декабры мæйы.
Диакъонты Амиран загъта, зæгъгæ, ацы фарст ис парламенты контролы бын.
Комитеты рабадты ма хайад райстой депутаттæ Медойты Дзамболат æмæ Сланты Иван.
