Хуссар Ирыстоны цы алæмæттаг æмæ фенддаг бынæттæ ис, уыдонæй сæ иу у Нагутнийы хосгæнæндон, кæцы июлы мæйæ байгом кодта йæ дуæрттæ.
Ацы аз скъуыддзаг æрцыд хосгæнæндоны сæйраг проблемæ дæр. Электроны рухс æм уагъд æрцыд æмæ ныр нал пайда кæндзысты электрогенераторæй, кæцыйыл алы сезон дæр хардз цыд стыр æхцайы фæрæзтæ. Нырмæ дзы нæ уыд мобилон бастдзинад æмæ интернет. Уый тыххæй йæм æвзонг адæймæгтæ зивæггæнгæ цыдысты. Ныр уыдонæн дæр пансионат «Ныфс»-ы фадат уыдзæн социалон хызæгтæй пайда кæнынæн. Хосгæнæндоны сæргълæууæг Чилæхсаты Владимир куыд зæгъы, афтæмæй уыдонмæ хоскæнынмæ, сæйраджыдæр, цæуынц, æрхæджыты, нуæрттæ æмæ зæрдæйы низтæй чи тыхсы, ахæм адæймæгтæ. Цæмæй улæфджытæ ваннæтæ райсой, уый тыххæй-иу бахъуыд арт скæнын æмæ уыцы фæздæг та тыхсын кодта улæфджыты, ныр уыцы проблемæ дæр иуварс æрцыд.
Хосгæнæндонæн уыцы-иу рæстæг йæ бон у райса 40 адæймаджы бæрц, фæлæ нырма фыццаг фæлтæр кæй у, уый тыххæй афтæ бирæ адæм нæ ацыд. Æрвылаз дæр куыд вæййы, афтæмæй 2-аг æмæ 3-аг фæлтæры фылдæр адæм вæййы. Нагутнийы хосгæнæндон æрбынат кодта диссаджы рæсугъд бынаты – кæмтты ‘хсæн тар хъæды, цалдæр километрæй хæстæгдæр æм цæрæг нæй, уырдæм æрдз уынынмæ æмæ дзы баулæфынмæ бацæуынц бынтон æнæниз адæм дæр. Фæлæ йæм хоскæныны охыл чи цæуы, уый тыххæй пациенттæм хъуамæ уа дохтырæй гæххæтт. Развæлгъау сæм хъуамæ уа сæ низы тыххæй бæлвырдгæнæн, ваннæтæ алкæмæн кæй нæ бæззынц, уымæ гæсгæ. Ам ис дохтыр-терапевт, кæцы сгары алы улæфæджы дæр, саразы сын хосгæнæн курс æмæ сын снысан кæны алыгъуызон процедурæтæ. Ацы хосгæнæндонæй чи рацæуы, уыдон вæййынц тынг райгонд.
Хосгæнæндоны ис хиирхæфсæн бынат дæр: бильярдон стол, шашкæтæ, шахматтæ, музыкалон инструменттæ, ис дзы библиотекæ дæр. Цы цæугæдон дзы ис, уымæн йæ хуырдуртæ дæр йедзаг сты минералтæй, фæлæ æрмæст уый тыххæй нæ тырнынц ардæм фæсивæд. Горæты æрвылбон цардæй рыг æмæ иугъæдондзинадæй йæхи аирхæфсын кæй бафæнды, уыдон дæр хуыздæрыл нымайынц Нагутни. Дыккаг фæлтæрмæ балцæг чи райста, ахæм æвзонг лæппу Сиукъаты Азæмæт мын афтæ загъта: «Раст цыма æрдз куы сæвзæрд, уæ-дæй нырмæ йæм адæймаджы къах никуы бахæццæ, ахæм æнкъарæнтæ æвзæрын кæны адæймаджы мидзæрдæйы. Мæнæ нывгæнджытæ дзæнæт куыд сныв кæнынц, афтæ. Ацы аз æз уырдæм ацæудзынæн ме ‘мбæлттæй дыууæимæ. Денджызмæ ныр æртæ аз фæд-фæдыл цæуæм. Фæлæ нæхимæ ахæм рæсугъд бынæттæ ис æмæ уыдон раз денджыз цæсты нал ахады. Мах æнхъæлдтам, ацы аз дæр дзы нæ уыдзæн мобилон бастдзинад æмæ, дам, нæ смартфонтæй баулæфдзыстæм. Фæлæ, уæддæр сфæнд кодтам, немæ сæ кæй нæ ахæсдзыстæм».
Нагутнийы чи фæулæфы, уыдон канд бынæттон цæрджытæ нæ вæййынц. Ардæм æрбацæуынц Цæгат Ирыстон-Аланийæ, æгæрыстæмæй Мæскуы æмæ Санкт-Петербургæй дæр. Уыдоны-иу фæндыд сæ бинонтимæ аныхас кæнын, цæмæй сæм мобилон бастдзинад уыдаид, уый тыххæй та сæ хъуыд дзæвгар ацæуын. Ацы проблемæйыл рагæй дзырдта хосгæнæндоны сæргълæууæг, ныфсытæ-иу ын бавæрдтой, фæлæ йæм лæмбынæгдæр йæ хъус æрдардта экс-президент Бибылты Анатоли. Дыууæ азы размæ уый æмбæлон органтæн бахæс кодта, цæмæй аскъуыддзаг кæной Нагутнимæ рухсы бауадзыны проблемæ. Зын аразæн уыд, уыцы хъуыддаг, хъæд æмæ йæм цы фæндаг цыд, уый уыд уынгæг æмæ дзы спецтехникæ нæ арæхст. Фæлæ, Знауыры районы цæрæнуатон-коммуналон хæдзарад, Паддзахадон унитарон куыстуæттæ Арæзтадон æрмæджыты заводы фæрцы Нагутнимæ бауагътой электроны рухс.
11-æм июлы райдайдзæн дыккаг фæлтæр. Балцæгы аргъ 10 бонæн у 14 мин сом. Балцæгтæ райсæн ис Профцæдисты хæдзары.
УАЗÆГТЫ Марфа
Comments are closed, but trackbacks and pingbacks are open.