14-æм сентябры Хицауады Сæргълæууæг Бекъойты Геннади хайад райста хосгæнæндон «Ныфс»-мæ электроадæттæн хахх баиу кæныны церемонийы. Уымæн йæ дæргъ у 10 километры, йæ тых та – 100 киловаты æмæ æххæст кæндзæн бальнеологион курорты домæнтæ.
«Абон мах баиу кодтам электроадæттæн хахх, кæцы арæзт цыд 2018 азы дæр Президент Бибылты Анатолийы бахæсмæ гæсгæ. Фæлæ бæрæг аххосæгтæм гæсгæ махæн ныры онг нæ бон не ссис уый эксплуатацимæ радтын.
Хосгæнæндон «Ныфс»-ы электрификаци скæнын фæахъаз уыдзæн бальнеологион хосгæнæн доны лæггæдты гъæд фæхуыздæр кæнын æмæ медицинон лæггæдтæ рауæрæх кæнынæн. Республикæйы къухдариуæгад кусдзæн фæндагон инфраструктурæ æмæ бастдзинад фæхуыздæр кæныныл курорты территорийыл, иумæйагæй – республикæйы рекреацион комплекс рæзын кæнынæн уавæртæ саразыныл», – банысан кодта Бекъойты Геннади.
Уый ма фехъусын кодта, зæгъгæ, Знауыры районы сæргълæууæгæн бахæс æрцыд, цæмæй фидæны сезонмæ хосгæнæндонмæ фæндаг сцæттæ уа, цæмæй йыл рог машинæтæ цæуой сæрибарæй.
Бекъойты Геннади банысан кодта, зæгъгæ, Президент Бибылты Анатолийы бахæсмæ гæсгæ фæнд кæнынц фидæны Нагутнимæ оптикофæскъауон кабель ауадзын, кæцы фадат ратдзæн хосгæнæндоны интернет-бастдзинадæй сифтонг кæнынæн, уый ахсджиаг у ам улæфæг адæмæн.
Бекъойты Геннади бузныджы ныхæстæ загъта, электрохаххы арæзтады цы куыстуæттæ хайад райстой, уыдоны æппæт кусджытæн, сæйраджыдæр, Паддзахадон унитарон куыстуæттæ «Энергоресурс», «Арæзтадон æрмæджыты завод», «Юго-сетнефтепродукт», Хъæууон хæдзарады управлени, Знауыры районы цæрæнуатон-коммуналон хæдзарад, афтæ ма Знауыры районы сæргълæууæг Сиукъаты Олегæн.
Хосгæнæн комплексы директор Чилæхсаты Владимир бузныджы ныхæстæ загъта республикæйы къухдариуæгадæн хосгæнæндоны проблемæтæм сæ хъусдарды тыххæй æмæ банысан кодта, зæгъгæ, ног электрохахх эксплуатацимæ лæвæрд кæй æрцыд, уый фадат ратдзæн рекреацион зонæйы рæзты сæйраг ныхдур аиуварс кæнынæн æмæ ног хосгæнæн процедурæтæ уадзынæн курорты электроифтонггæрзтæм ифтонг кæнынæн.
Уый ма фехъусын кодта, иу сезоны хосгæнæндоны кæй уыд 270 адæймаджы, уыдонæй 70 уыдысты Цæгат Ирыстонæй.
Банысан кæнын хъæуы, пансионаты стабилон электроифтонгад нæ уыд 20 азæй фылдæр æмæ йæ архайдæн æвзæрын кодта зындзинæдтæ.
Знауыры районы Нагутнийы доны хосгæнæн миниуджытæ зындгонд сты 1972 азæй. 90-æм азты уый раууатмæ æрцыд, æмæ ногæй архайын райдыдта æрмæстдæр 2003 азы.
Хосгæнæндонмæ æрбацæуынц æнцойгæнæн-змæлæн аппарат, хæлцтайæн системæ, периферион æмæ централон нуæртты системæимæ баст низтимæ адæм.
Comments are closed, but trackbacks and pingbacks are open.