Ацы бонты Тедеты Георгийы номыл Цхинвалы 1-æм музыкалон скъолайы уагъд æрцыд бæрæгбонон концерт Сылгоймæгты Дунеон бон – 8-æм марты цытæн. Концерты хайад райстой музыкалон скъолайы фортепиано, хор, скрипкæ, гитарæ, аккордеон, вокалон æххæсткæнынады, домрæйы хайадты хъомылгæнинæгтæ. Мадзалмæ æрбамбырд сты музыкалон ахуыргæнæндоны ахуыргæнинæгтæ, аивадæн табугæнджытæ, РХИ-йы Культурæйы министрады æмæ горæт Цхинвалы администрацийы минæвæрт-тæ, сывæллæтты ныййарджытæ.

Бæрæгбонон концерт хъуамæ уагъд æрцыдаид 8-æм марты размæ, фæлæ сывæллæттæй бирæтæ гриппæй кæй фæрынчын сты, уымæ гæсгæ йæ ахастой фæстæдæр æмгъуыдмæ. Йæ ауадзын та æнæмæнгхъæуæг уымæн уыд, æмæ сывæллæттæ сæхи бацæттæ кодтой хорз, стæй дæр традицион ссис æрвылаз дæр сылгоймæгты дунеон боны бæрæгбонон концерт уадзын.

Мадзал амыдта РХИ-йы сгуыхт ахуыргæнæг Котолиты Тамарæ. Уый раарфæ кодта залы æрæм-бырдуæвджытæн Сылгоймæгты Дунеон боны сæраппонд.

Бæрæгбонон концерт байгом кодтой музыкалон скъолайы кæстæр кълæсты хоры хайадисджытæ РХИ-йы сгуыхт ахуыргæнæг Тасойты Валентинæйы къухдариуæгадæй æмæ сæххæст кодтой æртæ зарæджы: “Красный шар”, “Победа”, “Взрослые и дети”. Уый фæстæ концерт адарддæр кодтой иннæ æххæстгæнджытæ. Хъуыстысты зынгæ композитортæ С. Майкапар, А. Гедике,  Р. Шуман, Б. Антюфеев, Ф. Шуберт,  А. Петров, В. Гомес, Л. Вальтер, В. Шаинский, М. Бугоев, И. Резник, К. Рябовой, афтæ ма ирон композитортæ Галаты Барис, Макъоты Ацæмæз, Гуырдзыбегты Георги, Гæздæнты Булаты уацмыстæ.

Программæ адарддæр кодтой, нырма фæлтæрддзинад кæмæ нæй, уыцы фыццагкъласонтæ. Кæд сыл зынд, кæй тыхстысты, уый уæддæр тынг хорз сарæхстысты: Дзæгъиаты Альвинæ, Джиголаты София,  Плиты Елизаветæ, Джиголаты Мария æмæ æндæртæ. Сценæмæкæсджыты зæрдæмæ тынг фæцыдис 2-аг къласы ахуыргæнинаг Чи-лæхсаты Линæйы ралæуд, кæцы сæххæст кодта скрипкæйыл Гæздæнты Булаты уацмыс «Мæ уарзон Ирыстон», Гатыгкоты Линæ, Багаты Валери, Мæлдзыгаты Еленæ дæр тынг хорз сæххæст кодтой сæ номыртæ. Сæ арæхæстдзинадæй ма сценæмæкæсджыты зæрдæтæ барухс кодтой 3-аг æмæ 4-æм кълæсты ахуыргæнинæгтæ Леонтьев Клим, Денис Репухов, Гуыцмæзты Марианнæ, Коцты Беллæ, Гобозты Роман, Козаты Дианæ æмæ æн-дæртæ. Максим Савицкий сæххæст кодта аккордеоныл композитор И. Гуырджыбегты Георгийы уацмыс «Зæрдæйы зарæг». Сценæмæкæсджытæ ма райгондæй баззадысты 5-æм æмæ 6-æм кълæсты ахуыргæнинæгтæй – Хаситы Ланæ, Гæззаты Аленæ, Джиоты Марияйы арæхстдзинадæй. Тасойты Анас-тасия аккордеоныл сæххæст кодта композитор С. Ревазовы уацмыс «Малусæг”

Кæронбæттæны концерт адарддæр кодтой вокалон къорд, уыдон сæххæст кодтой зарæг «Моя семья – вселенная». Сывæллæттæ афтæ хорз цæттæ уыдысты, æмæ сыл залы уæвджытæ æмбæлдысты тыхджын къухæмдзæгъдимæ. Концерты иумиагæй æвдыст æрцыд 35 номыры.

Концерты фæстæ 1-æм музыкалон скъолайы директор Тедеты Маринæ загъта: “Æрвылаз дæр мах ауадзæм бæрæгбонон концерттæ. Нæ концерт уагъд æрцыд бæрзонд æмвæзадыл æмæ райгондæй баззадтæн нæ хъомылгæнинæгты ар-хайдæй, уæлдайдæр та – фыццагкъласонтæй».

Чертхъоты Жаннæ

Comments are closed, but trackbacks and pingbacks are open.