Хицауады Сæрдар Джуссойты Константин Хицауады Аппараты коллективæн базонгæ кодта сæ ног къухдариуæггæнæг Хъотайты Сæрмæты.
Хицауады Сæрдар ын раарфæ кодта йæ ног бынаты тыххæй æмæ йын загъта æнтыстджын куысты фæндиæгтæ.
«Куыд зонут, афтæмæй Хъотайты Сæрмæт Эдуарды фырт Президенты барамындæй нысан æрцыд Хицауады Аппараты къухдариуæггæнæгæй. Уый нырмæ дæр куыста паддзахадон службæйы фадыджы, уæ коллегæ у æмæ йын йæ профессионалон куыстимæ зонгæ стут. Мæн уырны, æмæ Сæрмæты æрбацыдæй Аппараты куысты эффективондзинад фæбæрзонддæр уыдзæн», – загъта Джуссойты Константин æмæ банысан кодта, зæгъгæ, кад-рон ивындзинæдтæ здæхт сты паддзахадон структурæйы куыст фæхуыздæр кæнынмæ.
Йæ рады Хъотайты Сæрмæт бузныг загъта республикæйы къухдариуæгадæн се ууæнчы тых-хæй æмæ ныфс бавæрдта, æппæт тыхтæй дæр кæй бацархайдзæн, аппараты раз цы хæстæ ис, уыдон æххæст кæнынмæ.
«Бузныг дæн республикæйы къухдариуæгадæй, Президент Гаглойты Алан Эдуарды фыртæй, Дæуæй, Константин Хасаны фырт, кæй мыл баууæндыдыстут, уый тыххæй. Æппæт мæ тыхтæ аздахдзынæн, цæмæй уын уе ‘ууæнк ма фæмæнг кæнон, уымæ. Коллективимæ иумæ æппæт дæр сараздзыстæм, цæмæй эффективонæй скъуыддзаг кæнæм нæ разы лæууæг хæстæ», – загъта Хъотайты Сæрмæт.
Хицауады Сæрдар хъусдард аздæхта куысты дисциплинæ фæбæрзонддæр кæныны æнæмæнгхъæуындзинадмæ, цæмæй тырной сæ тыхтæ кæройнаг фæстиуæгмæ аздахынмæ.
«Махæн иу нысан ис – республикæ æмæ йе ‘мбæстæгты хæрзиуæгæн кусын æмæ алчи дæр йæ бынаты æппæт тыхтæй хъуамæ архайа уый тыххæй», – банысан кодта Джуссойты Константин.
